កីឡាទាញព្រ័ត្របង្ហាញពីកម្លាំងសាមគ្គីភាព

កីឡាជាតិ

ជាតិ

កីឡាទាញព្រ័ត្របង្ហាញពីកម្លាំងសាមគ្គីភាព

14, Apr 2017 , 6:03 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ ជារៀងរាល់ឆ្នាំ នៅក្នុងកម្មវិធីអង្គរសង្ក្រាន្តគឺតែងលើកយកកីឡាចម្រុះមកលេងសប្បាយរីករាយ ក្នុងនោះក៏មានកីឡាទាញព្រ័ត្រផងដែរ។ ដូចឆ្នាំនេះ ពិធីទាញព្រ័ត្រមិត្តភាពអង្គរសង្ក្រាន្ត បានប្រព្រឹត្តិទៅនៅរសៀលថ្ងៃទី១៤ មេសា ក្រោមវត្តមានសម្តេច ហ៊ុន សែន និងលោកជំទាវ ព្រមទាំងថ្នាក់ដឹកនាំរាជរដ្ឋាភិបាលជាច្រើននាក់។ កីឡាទាញព្រ័ត្រ គឺជាកីឡាមួយ ដែលបង្ហាញពីកម្លាំងសាមគ្គីរវាងគ្នាទៅវិញទៅមក។

លោក អ៊ុំ វុទ្ធី សាស្ត្រាចារ្យនៃសាលាមធ្យមវិចិត្រសិល្បៈភ្នំពេញផ្នែកនាថសាស្ត្រមានប្រសាសន៍ថា កីឡាទាញព្រ័ត្រនេះខ្មែរមានរាប់ពាន់ឆ្នាំមកហើយ។ លោកបន្ថែមថា មានចម្លាក់មួយចំនួននៅក្នុងប្រាសាទអង្គរ ដែលទាក់ទងនឹងកីឡាទាញព្រ័ត្រ ក្នុងនោះរួមមាន រឿងកូរសមុទ្រទឹកដោះ រាមកេរ្តិ៍ និងមហាភារត។

លោកសាស្ត្រាចារ្យបន្ថែមទៀតថា ពាក្យ «ព្រ័ត្រ»មានន័យថា កម្លាំងមហាសាមគ្គីរវាងទេវ និងអាសូរ ហើយជាការកកើតភោគផលដំណាំផ្សេងៗ ដែលកើតចេញពីការកូរសមុទ្រទឹកដោះ។ «ហើយរាល់ពិធីបុណ្យចូលឆ្នាំម្តងៗ ខ្មែរមិនដែលភ្លេចកីឡាទាញព្រ័ត្រនេះទេ ព្រោះវាជាកីឡាល្បងប្រាជ្ញា ល្បងកម្លាំង»។ នេះជាការបញ្ជាក់របស់លោកសាស្ត្រាចារ្យ អ៊ុំ វុទ្ធី។

គួរបញ្ជាក់ថា កីឡាទាញព្រ័ត្ររបស់ខ្មែរ ត្រូវបានបញ្ចូលជាសម្បត្តិបេតិកភណ្ឌពិភពលោកនៅអង្គការយូណេស្កូ កាលពីថ្ងៃទី២ ធ្នូ ឆ្នាំ២០១៥៕

សូមទស្សនាការទាញព្រ័ត្រមិត្តភាពអង្គរសង្ក្រាន្ត ដែលចូលរួមដោយសម្តេចនាយករដ្ឋមន្ត្រី និងលោកជំទាវ នៅមុខប្រាសាទអង្គរវត្តដូចតទៅ៖