៣ថ្ងៃ នៃព្រឹត្តិការណ៍ «សង្ក្រាន្តវត្តភ្នំ» មានមនុស្សចូលរួមជិត ១០ម៉ឺននាក់

ជាតិ

សង្គមជាតិ

៣ថ្ងៃ នៃព្រឹត្តិការណ៍ «សង្ក្រាន្តវត្តភ្នំ» មានមនុស្សចូលរួមជិត ១០ម៉ឺននាក់

17, Apr 2017 , 2:40 pm

រូបភាព

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ក្នុងពិធីបុណ្យចូលឆ្នាំថ្មី ប្រពៃណីជាតិខ្មែររយៈពេល៣ថ្ងៃនេះ នៅរាជធានីភ្នំពេញ មានរៀបចំព្រឹត្តិការណ៍ «សង្ក្រាន្តវត្តភ្នំ» ដើម្បីបង្កើតភាពសប្បាយរីករាយជូនពលរដ្ឋ ដែលមិនបានចាកចេញពីភ្នំពេញ។ រយៈពេល ៣ថ្ងៃ នៃព្រឹត្តិការណ៍នេះ មានប្រជាពលរដ្ឋចូលរួមកម្សាន្តជិត ១០ម៉ឺននាក់ ដែលធ្វើឲ្យសង្ក្រាន្តវត្តភ្នំ មានភាពអ៊ូអរ។

បើតាមអ្នកនាំពាក្យសាលារាជធានីភ្នំពេញ លោក ម៉េត មាសភក្ដី រយៈពេល ៣ថ្ងៃ នៃព្រឹត្តិការណ៍ «សង្ក្រាន្តវត្តភ្នំ» នេះ មានពលរដ្ឋ និងភ្ញៀវទេសចរចូលរួមជិត ១០ម៉ឺននាក់។ លោក ម៉េត មាសភក្ដី លើកឡើងថា វត្តមាន ស្នាមញញឹម ប្រជាជនជិត ១០ ម៉ឺននាក់ បានធ្វើឲ្យវត្តភ្នំមានមោទកភាពខ្លាំង។ រីឯក្រុមការងារវិញ ក៏បាត់ភាពនឿយហត់ ដែលទទួលមកវិញនូវកម្លាំងចិត្តពិបាកពណ៌នា។

អ្នកនាំពាក្យរូបនេះ លើកឡើងថា ក្នុងនាមរដ្ឋបាលរាជធានីភ្នំពេញ លោកសប្បាយរីករាយ និងមោទកភាពខ្លាំងណាស់ ដោយឆ្នាំនេះ បានរៀបចំសង្ក្រាន្តវត្តភ្នំធំជាងមុន ដែលមានការគាំទ្រពីប្រជាពលរដ្ឋជាច្រើន។ លោក ម៉េត មាសភក្ដី បញ្ជាក់ទៀតថា ការចូលរួមរបស់ប្រជាពលរដ្ឋនេះ ជាមោទកភាពរបស់រដ្ឋបាលរាជធានីភ្នំពេញ ដែលរៀបចំសម្រាប់ពលរដ្ឋដែលមិនចាកចេញពីក្រុង ឲ្យមានភាពសប្បាយរីករាយ។

ចំពោះបញ្ហាសន្តិសុខ សុវត្ថិភាពវិញ អាជ្ញាធរ បានថែរក្សាសុខសុវត្ថិភាព ជូនប្រជាពលរដ្ឋដោយមិនមានបញ្ហាអសកម្មអ្វីឡើយ ។ នេះជាការអះអាងរបស់លោក មាសភក្តី មុននឹងអះអាងថា «សង្ក្រាន្តវត្តភ្នំ» នឹងមានវត្តមាននៅនៅឆ្នាំក្រោយបន្តទៀត ថែមទាំងរៀបចំធំជាងនេះទៅទៀត។

«សង្ក្រាន្តវត្តភ្នំ» រៀបចំដោយរដ្ឋបាលរាជធានីភ្នំពេញ និងមានការចូលរួមពីសំណាក់ខណ្ឌទាំង១២ ។ ក្នុងកម្មវិធីនេះមានកម្មវិធីតាំងបង្ហាញផលិតផលកសិករ ការតាំងបង្ហាញផ្ទះបុរាណ និងល្បែងប្រជាប្រិយចំនួន ១៦ប្រភេទ៕