ជាតិ
សង្គមជាតិ
ឆក់ខ្សែភ្លើងនៅPub Street៖តុលាការសម្រេចឃុំខ្លួនម្ចាស់ហាងម៉ាស្សាបណ្តោះអាសន្ន
×
តុលាការបានចោទប្រកាន់ស្ត្រីជាម្ចាស់ហាងម៉ាស្សា Baray Spa នៅតំបន់ Pub Street ពីបទមនុស្សឃាតដោយអចេតនា បន្ទាប់ពីយុវតីម្នាក់ត្រូវខ្សែភ្លើងឆក់ស្លាប់ នៅមុខហាងរបស់ខ្លួន។ បច្ចុប្បន្ន ជនចាប់ចោទកំពុងជាប់ឃុំបណ្តោះអាសន្ន នៅពន្ធនាគារខេត្តសៀមរាប។
តុលាការសាលាដំបូងខេត្តសៀមរាប បានចោទប្រកាន់ស្ត្រីដែលជាម្ចាស់ហាងម៉ាស្សា ពីបទមនុស្សឃាតដោយអចេតនា តាមមាត្រាទី២០៧ នៃក្រមព្រហ្មទណ្ឌ និងបញ្ជូនទៅឃុំខ្លួនបណ្តោះអាសន្ន នៅពន្ធនាគារខេត្តសៀមរាប។ លោក រៀម ច័ន្ទម្នី ព្រះរាជអាជ្ញារងខេត្តសៀមរាប បានបញ្ជាក់តាមទូរសព្ទប្រាប់សារព័ត៌មានថ្មីៗដូច្នេះ នៅថ្ងៃទី១៩ ខែមេសានេះ។
ការសម្រេចនេះ ធ្វើឡើងបន្ទាប់ពីយុវតី លី មុនីរដ្ឋានី អាយុ១៤ ប្អូនស្រីរបស់តារាសម្តែង លី មុនីនាថ ត្រូវខ្សែភ្លើងឆក់ស្លាប់នៅមុខហាងរបស់ជនជាប់ចោទ នៅតំបន់ Pub Street ទីរួមខេត្តសៀមរាប កាលពីរំលងអធ្រាត្រថ្ងៃទី១៦ ខែមេសា ដែលជាថ្ងៃបង្ហើយ នៃពិធីបុណ្យចូលឆ្នាំខ្មែរ។
យោងតាមមាត្រា២០៧ នៃក្រមព្រហ្មទណ្ឌ ដែលចែងពីបទល្មើសមនុស្សឃាតដោយអចេតនា ជនជាប់ចោទអាចប្រឈមនឹងការជាប់ឃុំក្នុងពន្ធនាគារពី ១ ឆ្នាំ ទៅ ៣ឆ្នាំ និងពិន័យជាប្រាក់ពី ២ លានរៀល ទៅ ៦លានរៀល៕
Tag:
Pub Street
ឆក់ខ្សែភ្លើង
© រក្សាសិទ្ធិដោយ thmeythmey.com