កីឡាអន្តរជាតិ
អន្តរជាតិ
ស៊ីហ្គេមលើកទី២៩៖ ម៉ាឡេស៊ីប្តូរថ្ងៃបិទកម្មវិធីកុំឲ្យជាន់ថ្ងៃបុណ្យ Hari Raya Haji
× ការប្រកួតកីឡាស៊ីហ្គេមលើកទី២៩ នឹងប្រព្រឹត្តទៅនៅក្នុងទីក្រុងគូឡាឡាំពួ ប្រទេសម៉ាឡេស៊ីនាខែសីហាឆ្នាំ២០១៧នេះ។ បើតាមការបរិច្ឆេទ ពិធីបិទព្រឹត្តិការណ៍កីឡាប្រចាំតំបន់អាស៊ាននេះនឹងត្រូវធ្វើឡើងនៅថ្ងៃទី៣១ខែសីហា ឆ្នាំ២០១៧នោះទេ ប៉ុន្តែដោយសារចំថ្ងៃឈប់សម្រាកនៃសាសនាអ៊ីស្លាម ក៏ត្រូវបានប្តូរមកថ្ងៃទី៣០ខែសីហាវិញ។ នេះបើតាមសារព័ត៌មាន Rappler ចុះផ្សាយរបស់ ថ្ងៃទី១២ ខែសីហាកន្លងមក។
ព្រឹត្តិការណ៍កីឡាប្រចាំតំបន់អាស៊ានលើកទី២៩ នឹងធ្វើពិធីបើកជាផ្លូវការនៅថ្ងៃទី១៩ខែសីហា នាទីក្រុងគូឡាឡាំពួប្រទេសម៉ាឡេស៊ី និងបិទបញ្ចប់វិញនៅថ្ងៃទី៣១សីហា ប៉ុន្តែត្រូវបានផ្លាស់ប្តូរកាលវិភាគមកបិទថ្ងៃទី៣០សីហាវិញ ដោយសារជាន់ថ្ងៃគ្នាជាមួយនឹងកម្មវិធីបុណ្យសាសនាអ៊ីស្លាម Hari Raya Haji។
បើតាមរដ្ឋមន្ត្រីកីឡាលោក Khairy Jamaluddin ការប្រារព្ធពិធីបិទនឹងប្រព្រឹត្តទៅនៅថ្ងៃទី ៣០ ខែសីហាវិញដើម្បីជំនួស ថ្ងៃទី៣១ ខែសីហា ដែលចំនឹងថ្ងៃឈប់សម្រាកសំខាន់សម្រាប់ប្រជាជនម៉ូស្លីម។
លោករដ្ឋមន្ត្រីដរដែលបានថ្លែងថា៖«ថ្ងៃបិទបញ្ចប់កីឡាស៊ីហ្គេមត្រូវធ្វើនៅថ្ងៃទី៣០សីហាវិញ ហើយថ្ងៃ៣១សីហាគឺសម្រាប់យើងប្រារព្ធពិធីសាសនាមូស្លីម Hari Raya Haji។ ហើយការផ្លាស់ប្តូរនេះនឹងមិនបង្កើតជាបញ្ហាធំណាមួយដល់ការប្រកួតប្រជែង និងការស្នាក់នៅរបស់អត្តពលិកទាំងអស់នោះឡើយ»។
សូមបញ្ចាក់ថាព្រឹត្តិការណ៍កីឡាប្រចាំតំបន់អាស៊ាន ឬកីឡាស៊ីហ្គេមនេះធ្វើឡើងរៀងរាល់២ឆ្នាំម្តង ដោយមាន១១ប្រទេសចូលរួម រួមមាន៖ ម៉ាឡេស៊ី កម្ពុជា វៀតណាម ថៃ មីយ៉ាន់ម៉ា ព្រុយណេ ឥណ្ឌូនេស៊ី សិង្ហបុរី ហ្វីលីពីន ឡាវ និងទីម័រខាងកើត៕
© រក្សាសិទ្ធិដោយ thmeythmey.com