ជាតិ
មេធាវី ជួប សម្លាប់ ប្តឹងជំទាស់សាលក្រមសាលាដំបូងរាជធានីភ្នំពេញ លោក យុង ផានិត មេធាវីរបស់ជួប សម្លាប់ បានផ្តល់បទសម្ភាសដល់ក្រុមអ្នកសារព័ត៌មាននៅមុខសាលាដំបូងរាជធានីភ្នំពេញ បន្ទាប់ពីចូលស្តាប់ការប្រកាសសាលក្រម កាលពីថ្ងៃទី២៣ ខែមីនា ឆ្នាំ២០១៧។
× ភ្នំពេញ៖ លោក យុង ផានិត មេធាវីការពារក្ដីលោក អឿត អាង ហៅជួប សម្លាប់ បានប្តឹងជំទាស់សាលក្រមសាលាដំបូងរាជធានីភ្នំពេញដែលបានផ្តន្ទាទោសកូនក្តីខ្លួនឲ្យជាប់ពន្ធនាគារអស់មួយជីវិតទៅសាលាឧទ្ធរណ៍។ មេធាវីការពារទណ្ឌិតរូបនេះ បានឲ្យដឹងថា កូនក្តីលោកស្នើឧទ្ធរណ៍ឲ្យផ្តល់ស្ថានសម្រាលទោស ពីព្រោះកូនក្តីរបស់លោកចង់កែប្រែកំហុស។
លោក យុង ផានិត បានប្រាប់សារព័ត៌មានថ្មីៗថា ជួប សម្លាប់ មិនព្រមទទួលយកសាលក្រមតុលាការភ្នំពេញដែលសម្រេចឲ្យលោកជាប់ពន្ធនាគារមួយជីវិត ក្នុងរឿងឃាតកម្មលោក កែម ឡី នោះទេ។ មេធាវីរូបនេះ បានចាត់ទុកសាលក្រមតុលាការដំបូងដែលដាក់ទោស ជួប សម្លាប់ អស់មួយជីវិត គឺជាការផ្តន្ទាទោសធ្ងន់ធ្ងរដែលកូនក្តីលោកគ្មានឱកាសកែប្រែកំហុស។
«ការដាក់ទោស ជួប សម្លាប់ អស់មួយជីវិតនេះធ្ងន់ធ្ងរពេក។ គេបានសារភាពកំហុសរួច ហើយគេចង់កែប្រែកំហុសចូលរួមធ្វើការងារជួយសង្គមដូចធម្មតាវិញ»។ មេធាវីការពារទណ្ឌិតដែលបាញ់សម្លាប់លោក កែម ឡី បញ្ជាក់ពីមូលហេតុដែលលោកសម្រេចប្តឹងទាស់កាលពីថ្ងៃទី២០ ខែមេសាម្សិលមិញនេះ។
មេធាវីរូបនេះ ជឿជាក់ថា សាលាឧទ្ធរណ៍នឹងសម្រាលទោសកូនក្តីលោកតាម មាត្រា ៩៣ និង៩៥ នៃក្រមព្រហ្មទណ្ឌ ដោយផ្អែកតាមហេតុផលខាងលើ។ តាមមាត្រា៩៥ នៃក្រមព្រហ្មទណ្ឌ ដែលចែងពីទោសដាក់ពន្ធនាគារអស់មួយជីវិត និងស្ថានសម្រាលទោស បានបញ្ជាក់ថា កាលណាបទល្មើសត្រូវបានផ្តន្ទាទោសដាក់ពន្ធនាគារអស់មួយជីវិត ចៅក្រមដែលផ្តល់ស្ថានសម្រាលទោសអាចប្រកាសទោសដាក់ពន្ធនាគារក្នុងចន្លោះរវាង ១៥ (ដប់ប្រាំ) ឆ្នាំនិង ៣០ (សាមសិប)ឆ្នាំ។
ចៅក្រមសាលាដំបូងរាជធានីភ្នំពេញ បានប្រកាសសាលក្រម កាលពីថ្ងៃទី២៣ ខែមីនា ឆ្នាំ២០១៧ សម្រេចឲ្យលោក ជួប សម្លាប់ ជាប់ពន្ធនាគារអស់មួយជីវិត ក្រោមបទចោទ «ឃាតកម្មគិតទុកជាមុន និងកាន់កាប់អាវុធខុសច្បាប់» តាមមាត្រា២០០និងមាត្រា៤៩០នៃក្រមព្រហ្មទណ្ឌ។ នៅក្នុងសវនាការកាលនោះ លោកមេធាវី យុង ផានិត ធ្លាប់ស្នើឲ្យចៅក្រមសម្រាលទោស ដល់លោក ជួប សម្លាប់ដែរ។ តែចៅក្រម មិនបានធ្វើតាមសំណើនេះទេ។
លោក កែម ឡី អ្នកសិក្សាស្រាវជ្រាវការអភិវឌ្ឍសង្គម និងជាអ្នកវិភាគនយោបាយ ត្រូវបានបាញ់សម្លាប់ ក្នុងស្តាម៉ាតមួយកន្លែង ស្ថិតនៅម្តុំស្តុបបូកគោ កាលពីថ្ងៃទី១០ ខែកក្កដា ឆ្នាំ២០១៦។ ក្រោយឃាតកម្មនេះ កើតឡើង សមត្ថកិច្ច បានចាប់លោក ជួប សម្លាប់ នៅក្នុងថ្ងៃនោះតែម្តង។ ក្រៅពីលោក ជួប សម្លាប់ សមត្ថកិច្ច និងតុលាការ នៅមិនទាន់រកឃើញអ្នកជាប់ពាក់ព័ន្ធផ្សេង នោះទេ៕
Tag:
ជួប សម្លាប់
កែម ឡី
© រក្សាសិទ្ធិដោយ thmeythmey.com