អាកាសធាតុក្តៅខ្លាំង នាយកដ្ឋានប្រយុទ្ធប្រឆាំងនឹងជំងឺឆ្លង បង្ហាញរបៀបថែទាំសុខភាព

ជាតិ

ព័ត៍មានសុខភាព

អាកាសធាតុក្តៅខ្លាំង នាយកដ្ឋានប្រយុទ្ធប្រឆាំងនឹងជំងឺឆ្លង បង្ហាញរបៀបថែទាំសុខភាព

22, Apr 2017 , 2:39 pm

រូបភាព

ដោយ:

ភ្នំពេញ៖ នាយកដ្ឋានប្រយុទ្ធប្រឆាំងនឹងជំងឺឆ្លង(CDC) បានប្រាប់ពលរដ្ឋឲ្យប្រុងប្រយ័ត្នចំពោះបញ្ហាសុខភាព ជាពិសេសត្រូវតាមដានជំងឺទាំងឡាយ ដែលកើតឡើងដោយសារអាកាសធាតុក្តៅខ្លាំង។ លើសពីនេះ CDC ក៏បានបង្ហាញសារអប់រំមួយចំនួនផងដែរ ដើម្បីបញ្ចៀសជំងឺទាំងពួង។

នាយកដ្ឋានប្រយុទ្ធប្រឆាំង នឹងជំងឺឆ្លង ប្រកាសឲ្យពលរដ្ឋការពារខ្លួនពេលមានអាកាសធាតុក្តៅខ្លាំង ដើម្បីចៀសវាងជំងឺទាំងឡាយ ដែលអាចកើតមានឡើង។ នេះបើតាមសេចក្តីជូនដំណឹង របស់នាយកដ្ឋានប្រយុទ្ធប្រឆាំងនឹងជំងឺឆ្លង ចេញផ្សាយនៅលើទំព័រហ្វេសប៊ុករបស់ខ្លួន នៅថ្ងៃទី២០ ខែមេសាកន្លងមក។

ក្រៅពីនេះ CDC បានណែនាំពលរដ្ឋនូវវិធីសាស្ត្រមួយចំនួន ដើម្បីគេចផុតពីជំងឺ បណ្តាលមកពីអាកាសធាតុក្តៅខ្លាំងនេះផងដែរ។ វិធីទាំងនោះ រួមមាន៖

១. រក្សាខ្លួនឲ្យត្រជាក់ដើម្បីចៀសវាងជំងឺ ដូចជា៖ ជ្រកក្រោមម្លប់ឲ្យបានច្រើន កុំជ្រើសរើសកង្ហារជាអាទិភាព ទី១ ជៀសវាងនៅក្រោមថ្ងៃផ្ទាល់ ស្លៀកពាក់សំលៀកបំពាក់ ស្តើង ស្រាល និងមានពណ៌ភ្លឺ (ស លឿង បៃតងខ្ចី) ងូតទឹកត្រជាក់ ឬទឹកធម្មតាឲ្យបានញឹកញាប់ តាមដានក្រុមមនុស្សងាយរងគ្រោះ២ដងក្នុងមួយថ្ងៃ (មនុស្សវ័យ៥ឆ្នាំចុះក្រោម និងវ័យ៦៥ឆ្នាំឡើងទៅ ស្ត្រីមានផ្ទៃពោះ ជនមានជំងឺរ៉ាំរ៉ៃ)។

២. ត្រូវមានជាតិទឹកជានិច្ច ព្រោះ ពេលក្តៅខ្លាំង អ្នកនឹងបែកញើសច្រើន ធ្វើខ្លួនប្រាណខ្សោះជាតិទឹក។ ដូច្នេះ ត្រូវផឹកទឹកឲ្យលើសពេលធម្មតា ដោយមិនចាំបាច់ដល់ពេលស្រេកទឹកនោះទេ។ លើសពីនេះ ត្រូវជៀសវាងពិសាស្រា និងទឹកដែលមានកំហាប់ស្ករខ្ពស់។ ជួយរម្លឹកអ្នកដទៃផ្សេងទៀត ឲ្យឧស្សាហ៍ផឹកទឹក ។ ទឹកត្រូវតែដាំពុះជានិច្ច ដើម្បីការពារជំងឺរាកមួល ឬអាសន្នរោគ។

៣. តាមដានព័ត៌មានដែលមានប្រភពច្បាស់លាស់ ទាក់ទងនឹងអាកាសធាតុ និងសុខភាព ដើម្បីត្រៀមខ្លួន សម្រាប់ការការពារ និងថែទាំងសុខភាពរបស់ខ្លួន។

រោគសញ្ញាជំងឺ ដែលបណ្តាលមកពីអាកាសធាតុក្តៅខ្លាំង មានដូចជា៖ រមូលក្រពើ វិវត្តន៍ទៅជាជំងឺអស់កម្លាំងល្ហិតល្ហៃ និងការដួលសន្លប់ គឺសុទ្ធសឹងជារោគសញ្ញាជំងឺ ដែលបណ្តាលមកពីអាកាសធាតុក្តៅខ្លាំង។ ១. ជំងឺល្ហិតល្ហៃអស់កម្លាំង កើតពីអាកាសធាតុក្ដៅខ្លាំង៖ បែកញើសខ្លាំង ខ្សោយកម្លាំង ខ្លួនត្រជាក់ ស្លេក ស្បែកស្អិត ចីបចរដើរញាប់ ចង្អោរ ឬក្អួត ដួល។

វិធីសាស្ត្រដែលត្រូវធ្វើ៖ ប្តូរទៅកន្លែងត្រជាក់ ដាក់ខ្លួនដេក និងដោះសំលៀកបំពាក់ ជូតកន្សែងត្រជាក់លើខ្លួនប្រាណជុំវិញ ក្រេបទឹកសន្សឹមៗ បើក្អួតបន្តរហូត ត្រូវបញ្ជូនទៅមន្ទីរពេទ្យជាបន្ទាន់។

២.ជំងឺដួលសន្លប់ដោយសារកម្តៅខ្លាំង៖ សីតុណ្ហភាពក្នុងខ្លួនលើសពី ៣៩.៥ អង្សាសេ ស្បែកក្រហម ឬស្ងួត ចីបចរដើរញាប់ អាចបាត់បង់ស្មារតី។

វិធីដែលត្រូវធ្វើ៖ ប្តូរអ្នកជំងឺទៅកន្លែងត្រជាក់ បញ្ចុះកម្តៅក្នុងខ្លួន តាមរយៈកន្សែងជូតខ្លួន ឬងូតទឹក មិនត្រូវផ្តល់ទឹក និងបញ្ជូនទៅមន្ទីរពេទ្យជាបន្ទាន់ជាដើម។

លើសពីនេះ នាយកដ្ឋានប្រយុទ្ធប្រឆាំង នឹងជំងឺឆ្លង បានប្រកាសលេខទូរស័ព្ទលេខ ១១៥ ដើម្បីឲ្យពលរដ្ឋទាក់ទងជុំវិញព័ត៌មានបន្ថែមផងដែរ៕