លោក ទេព ឡុងរចនា ទទួលស្គាល់ស្វាយរៀងមានសមត្ថភាពខ្លាំងតែប្តេជ្ញាមិនឲ្យធ្វេសប្រហែស

កីឡាជាតិ

ជាតិ

លោក ទេព ឡុងរចនា ទទួលស្គាល់ស្វាយរៀងមានសមត្ថភាពខ្លាំងតែប្តេជ្ញាមិនឲ្យធ្វេសប្រហែស

23, Apr 2017 , 2:25 pm

រូបភាព

ដោយ:

មុនជំនួបមកដល់នាវេលាម៉ោង៦ល្ងាច គ្រូបង្វឹកក្រសួងការពារជាតិ(ទ័ព) លោក ទេព ឡុងរចនា ហាក់មានការព្រួយបារម្ភចំពោះការរីកចម្រើនទាំងផ្នែកយុទ្ធសាស្ត្រ និងតិកនិករបស់គូប្រជែងព្រះខ័នរាជស្វាយរៀង(ស្វាយរៀង)។ តែយ៉ាងណា លោកបានរៀបចំយុទ្ធសាស្ត្ររួចជាស្រេចសម្រាប់ជំនួបល្ងាចនេះ ជាពិសេសនឹងមិនឲ្យមានការធ្វេសប្រហែសកើតឡើងនោះឡើយ។

គ្រូបង្វឹកក្រុមទ័ព លោក ទេព ឡុងរចនា បានកត់សម្គាល់ឃើញថា ក្រុមស្វាយរៀងជាក្រុមមួយដែលមានការផ្លាស់ប្តូរគួរឲ្យកត់សម្គាល់ទាំងយុទ្ធសាស្ត្រ តិកនិក និងទម្រង់លេងពីមួយប្រកួតទៅមួយប្រកួត។ ការផ្លាស់ប្តូរនេះ បានធ្វើឲ្យគ្រូបង្វឹករូបនេះមានព្រួយបារម្ភ និងបង្កើនការប្រុងប្រយ័ត្នកាន់តែខ្លាំងតាមរយៈការរៀបចំយុទ្ធសាស្ត្រ និងទម្រង់លេងថ្មី។ ហើយលោកបានប្តេជ្ញាថា មិនឲ្យមានការធ្វេសប្រហែសនោះឡើយក្នុងជំនួបល្ងាចនេះ។

ជំនួបរវាងក្រុមទ័ពជាមួយព្រះខ័នរាជស្វាយនាវេលាម៉ោង៦ល្ងាចនៅកីឡដ្ឋានស្តាតចាស់ ត្រូវបានគ្រូបង្វឹកក្រុមទ័ព ចាត់ទុកជាជំនួបកំពូលក្នុងពានរង្វាន់ក្របខណ្ឌមិត្តហ្វូនខេមបូឌានលីកប្រចាំឆ្នាំ២០១៧។ ការចាត់ទុកបែបនេះ ដោយសារក្រុមទាំងពីរសុទ្ធសឹងជាក្រុមខ្លាំងមិនស្គាល់ពាក្យថាចាញ់ដូចគ្នាក្នុង៧ប្រកួតកន្លងមកនេះ។ លើលពីនេះ វាជាការប្រកួតដណ្តើមឈរកំពូលតារាងប្រចាំសប្តាហ៍ទី៨នៃពានរង្វាន់នេះ។

តែយ៉ាងណា លោក ទេព ឡុងរចនា បានចាត់ទុកជំនួបពេលល្ងាចនៅកីឡដ្ឋានស្តាតចាស់ជាលើកដំបូង ជាផលចំណេញសម្រាប់ក្រុមរបស់លោក ព្រោះវាជាការប្រកួតក្នុងទឹកដី។ លោកថា ការផ្លាស់ប្តូរពេលវេលាលើកដំបូងមកប្រកួតនៅយប់របស់ស្តាតចាស់ កីឡាកររបស់លោកក៏មានការផ្លាស់ប្តូរដែរ ពោលគឺកីឡាករអាចលេងបាន៩០នាទីមិនងាយហត់ និងអស់កម្លាំង។

គួរបញ្ជាក់ថា ក្រុមឈរលេខរៀងទី២ ទ័ព នឹងបើកទ្វារកីឡដ្ឋានស្តាតចាស់ស្វាគមន៍ក្រុមភ្ញៀវឈរកំពូលតារាង ស្វាយរៀង ក្នុងវគ្គសន្សំពិន្ទុសប្តាហ៍ទី៨នៃពានរង្វាន់ក្របខណ្ឌមិត្តហ្វូនខេមបូឌានលីកឆ្នាំ២០១៧ នាវេលាម៉ោង៦ល្ងាចនេះ។ ក្រៅពីគូដ៏ជក់ចិត្តនេះ នាវេលាម៉ោង៦ល្ងាចក៏មានការជួបគ្នារវាងក្រុមបឹងកេតជាមួយណាហ្គាវើលនៅពហុកីឡដ្ឋានជាតិ, ភ្នំពេញក្រោនស្វាគមន៍ក្រុមអគ្គិសនីកម្ពុជានៅកីឡដ្ឋាន RSN និងក្រុមគីរីវង់សុខសែនជ័យ ស្វាគមន៍ ខេមបូឌានថាយហ្គឺរ នាវេលម៉ោង៣រសៀល៕