អន្តរជាតិ
Mike Pence សន្យាថា នាវាដឹកយន្តហោះចម្បាំងអាមេរិកនឹងទៅដល់ជិតឧបទ្វីបកូរ៉េ មុនដាច់ខែ
× អនុប្រធានាធិបតីអាមេរិកលោក Mike Pence បានប្រកាសថា នាវាដឹកយន្តហោះចម្បាំង Carl Vinson នឹងទៅដល់សមុទ្រជប៉ុនក្នុងរយៈពេលប៉ុន្មានថ្ងៃទៀត ស្របពេលដែលបរិយាកាសតំបន់តានតឹង។ការបញ្ជាក់បែបនេះកើតឡើង ក្រោយមានការផ្សព្វផ្សាយថា ក្រុមនាវាចម្បាំងដែលរដ្ឋាបាលត្រាំ បញ្ជូនមកកំញើញកូរ៉េខាងជើងនេះ ទៅធ្វើសមយុទ្ធរួមគ្នាជាមួយកងទ័ពអូស្ត្រាលី មិនមែនមកឧបទ្វីបកូរ៉េឡើយ។
ដើម្បីឲ្យមានការស្ងប់ចិត្តពាក់ព័ន្ធការលូកដៃដោះស្រាយបញ្ហាកូរ៉េខាងជើង តំណាងក្រុងវ៉ាស៊ីនតោនដែលកំពុងបំពេញទស្សនកិច្ចនៅអូស្ត្រាលី បានប្រកាសយ៉ាងច្បាស់ថា នាវាដឹកយន្តហោះដ៏ធំ Carl Vinson ដែលនាំផ្លូវកងនាវាចម្បាំងអាមេរិកនឹងទៅដល់សមុទ្រជប៉ុនមុនដាច់ខែមេសា។
លោក Mike Pence បានបញ្ជាក់ពេលលោកស្ថិតនៅទីក្រុងស៊ីដនីថា នាវាដឹកយន្តហោះ Carl Vinson នឹងទៅដល់ប៉ុន្មានថ្ងៃខាងមុខនេះ។ ចំណែកប្រធានាធិបតី ដូណាល់ ត្រាំ វិញបានសរសេរបង្ហោះតាមគណនី twitter ផ្លូវការរបស់ខ្លួនថា រដ្ឋបាលលោកកំពុងបញ្ជូនកងនាវាចម្បាំងដ៏ ខ្លាំងទៅកូរ៉េ ខណៈដែលរដ្ឋមន្ត្រីការពារជាតិអាមេរិកលោក James Mattis ក៏បានលើកឡើងស្រដៀងគ្នាដែរថា នាវាដឹកយន្តហោះចម្បាំងដ៏ធំនោះកំពុងបន្តដំណើរមកឧបទ្វីបកូរ៉េហើយ។
តាមពិតទៅ ក្រុមនាវាចម្បាំងអាមេរិកនេះត្រូវមកដល់ដែនសមុទ្រនៅក្បែរឧបទ្វីបកូរ៉េតាំងពីសប្តាហ៍មុនមកម្ល៉េះ ស្របពេលដែលស្ថានភាពតានតឹងកើនឡើងខ្លាំងនៅទីនោះព្រោះកូរ៉េខាងជើងត្រៀមបាញ់អាវុធនុយក្លេអ៊ែរជាលើកទី ប្រាំមួយនោះ។ កងទ័ពជើងទឹកអាមេរិកកន្លងមកបានប្រកាសថា ក្រុងវ៉ាស៊ីនតោនបញ្ជូនក្រុមនាវាចម្បាំងដឹកនាំដោយនាវា Carl Vinson ចេញពីសិង្ហបុរីដើម្បីកំញើញកូរ៉េខាងជើង។ ប៉ុន្តែដល់ថ្ងៃអង្គារសប្តាហ៍នេះ ស្ថាប័ននេះបានទទួលស្គាល់ថា នាវាទាំងនោះតាមពិតទៅមិនមែនធ្វើដំណើរទៅរកកូរ៉េខាងជើងទេ តែធ្វើដំណើរទៅចូលរួមសមយុទ្ធយោធាជាមួយកងទ័ពអូស្ត្រាលី។
ពាក់ព័ន្ធការពង្រាយនាវាចម្បាំងនេះដែរ កូរ៉េខាងជើងបានប្រតិកម្មតបខ្លាំងៗដែរដោយសង្កត់ធ្ងន់ថា ការបញ្ជូននាវាចម្បាំងមកគំរាមខ្លួននោះមិនធ្វើឲ្យខ្លួនបាក់ស្បាតឬចុះញ៉មឡើយ។ ទីភ្នាក់ងារព័ត៌មានកូរ៉េខាងជើង KCNA បានស្រង់សម្តីអ្នកនាំពាក្យក្រសួងការបរទេសកូរ៉េខាងជើងថា៖« អាមេរិកកំពុងបញ្ជូននាវាចម្បាំងដើរដោយថាមពលនុយក្លេអ៊ែរមកកាន់ឧបទ្វីបកូរ៉េបន្តបន្ទាប់គ្នា។ ការគំរាមកំហែងនេះមិនអាចធ្វឲ្យកូរ៉េខាងជើងភ័យខ្លាចឡើយ»។
ទោះជាមានការប្រឈមមុខដាក់គ្នា ហើយភាពតានតឹងកើនឡើងខ្លាំងក៏ដោយ មន្ត្រីជាន់ខ្ពស់លំដាប់ទីពីររបស់ក្រុងវ៉ាស៊ីនតោនលោក Mike Pence នេះនៅតែជឿជាក់ថា ដំណោះស្រាយដោយសន្តិវិធីនៅតែអាចកើតមានដើម្បីដោះស្រាយបញ្ហាកូរ៉េខាងជើង។ ប៉ុន្តែលោកបានបន្តអំពាវនាវឲ្យក្រុងប៉េកាំងលូកដៃដោះស្រាយឲ្យកាន់តែជ្រៅ និងប្រើអំណាចសេដ្ឋកិច្ចដាក់សម្ពាធលើកូរ៉េខាងជើងផងដែរ។ ម្យ៉ាងទៀតអនុប្រធានាធិបតីរូបនេះក៏ព្រមានកូរ៉េខាងជើងជាថ្មីទៀតែដែរថា អាមេរិកពិចារណារាល់យន្តការទាំងអស់រួមទាំងប្រើប្រាស់កម្លាំងផង បើសិនកូរ៉េខាងជើងនៅតែព្រហើនទៀត៕
Tag:
អាមេរិក
Mike Pence
កូរ៉េខាងជើង
Carl Vinson
© រក្សាសិទ្ធិដោយ thmeythmey.com