ជាតិ
វៀតណាម ត្រៀមលើកយកប្រធានបទចំនួន៥ ពិភាក្សាជាមួយសម្ដេច ហ៊ុន សែន រូបសម្ដេចនាយករដ្ឋមន្រ្តី ហ៊ុន សែន និងនាយករដ្ឋមន្រ្តីវៀតណាម ង្វៀន សួនហ៊្វុក សម្ពោធស្ពានជ្រៃធំ-ឡុងប៊ិញ នៅថ្ងៃទី២៤ មេសា ២០១៧
× ភ្នំពេញ៖ នាយករដ្ឋមន្ត្រីវៀតណាម លោក ង្វៀន សួនហ្វ៊ុក បានមកបំពេញទស្សនកិច្ចជាផ្លូវការលើកដំបូងនៅកម្ពុជា ចាប់ពីថ្ងៃទី២៤ ដល់ថ្ងៃទី២៦ មេសា តាមការអញ្ជើញរបស់សម្ដេចនាយករដ្ឋមន្ត្រី ហ៊ុន សែន។ ក្នុងដំណើរទស្សនកិច្ចរយៈពេល៣ថ្ងៃនេះ លោក ង្វៀន សួនហ្វ៊ុក ត្រៀមលើកយកប្រធានបទចំនួន៥ មកពិភាក្សាជាមួយសម្ដេច ហ៊ុន សែន។
ក្នុងបទសម្ភាសតាមរយៈសារអេឡិចត្រូនិចរវាងប្រធានសមាគមប្រតិភូមិត្តភាពវៀតណាម-កម្ពុជា លោក វូ ម៉ៅ និងអ្នកសារព័ត៌មានហ្វីលីពីន កញ្ញា Ninya Calleja ដែលសារព័ត៌មានថ្មីៗទទួលបាននោះ ឲ្យដឹងថា ដំណើរទស្សនកិច្ចនាយករដ្ឋមន្ត្រីវៀតណាមមកកម្ពុជានេះ គឺដើម្បីចូលរួមរំឮកចំណងការទូតគម្រប់ខួប៥០ឆ្នាំ នៃទំនាក់ទំនងរវាងកម្ពុជា-វៀតណាម។
ក្រៅពីប្រធានបទទំនាក់ទំនងការទូតរវាងប្រទេសទាំងពីរនេះ នាយករដ្ឋមន្ត្រីវៀតណាមក៏ត្រៀមលើកយកប្រធានចំនួន៥ទៀត មកពិភាក្សាជាមួយនាយករដ្ឋមន្ត្រីកម្ពុជាផងដែរ។ បើតាមលោក វូ ម៉ៅ ដែលបានផ្ដល់កិច្ចសម្ភាសដល់សារព័ត៌មានហ្វីលីពីននោះ ប្រធានបទទាំងនោះរួមមាន៖ ប្រធានបទទី១ ទាក់ទងនឹងវិស័យសេដ្ឋកិច្ច ដោយក្នុងនោះមានការលើកកម្ពស់អ្នកវិនិយោគ និងការពង្រឹងទំនាក់ទំនងពាណិជ្ជកម្មប្រទេសទាំងពីរ។
ប្រធានបទទី២ ទាក់ទងនឹងការបង្កើនការផ្លាស់ប្ដូរមន្ត្រីគណប្រតិភូរវាងកម្ពុជា-វៀតណាម៖
-ពង្រឹងការផ្លាស់ប្ដូររដ្ឋមន្ត្រី ,មន្ត្រីតាមស្ថាប័ន,ថ្នាក់មូលដ្ឋាន និងអង្គភាពនានា។ ពង្រឹងការផ្លាស់ប្ដូរវប្បធម៌ ,កិច្ចសហប្រតិបត្តិការវិជ្ជាជីវៈពេទ្យ និងទំនាក់ទំនងការទូតរវាងប្រជាជន និងប្រជាជន។ ពង្រឹងការការពារបន្ទាត់ព្រំដែនឲ្យមានសន្តិភាព និងកិច្ចសហប្រតិបត្តិការជាមិត្តភាពជាដើម។
ប្រធានបទទី៣ កិច្ចសហប្រតិបត្តិការសន្តិសុខ និងការការពារ៖
-ការពង្រឹងកិច្ចសម្របសម្រួលឲ្យមានភាពស្និតស្នាលរវាងភាគីទាំងពីរ ក្នុងការផ្លាស់ប្ដូរព័ត៌មាន និងការដោះស្រាយបញ្ហាព្រំដែន។
- ការពង្រឹងនិងគាំពាររួមគ្នានៃការតម្រួតល្បាតលើដែនសមុទ្រ ។ជាពិសេសកិច្ចសហប្រតិបត្តិការស្វែងរកធាតុរបស់ក្រុមយុទ្ធជនវៀតណាម ដែលស្ថិតនៅក្នុងបញ្ជីឈ្មោះអ្នកដែលបានស្លាប់នៅក្នុងអំឡុងពេលសង្គ្រាមនៅក្នុងប្រទេសកម្ពុជា។
ប្រធានបទទី៤ ការរៀបចំខណ្ឌសីមាព្រំដែនកម្ពុជា-វៀតណាម ដែលភាគីទាំងពីរបានកំណត់ខណ្ឌសីមា និងការបោះបង្គោលព្រំដែនដីជាច្រើនឆ្នាំមកហើយ ដើម្បីកសាងខ្សែបន្ទាត់សន្តិភាព,ស្ថេរភាព,កិច្ចសហប្រតិបត្តិការ និងការអភិវឌ្ឍប្រកបដោយនិរន្តភាពរវាងប្រទេសទាំងពីរ។
ចំណែកប្រធានបទទី៥ ទាក់ទងនឹងពង្រឹងវិស័យទេសចរណ៍ ដែលភាគីវៀតណាមបានកត់សម្គាល់ឃើញថា ភ្ញៀវទេសចរវៀតណាមបានចូលមកកម្សាន្តនៅប្រទេសកម្ពុជាជាតិ១លាននាក់ កាលពីឆ្នាំ២០១៦ ដែលមានចំនួនច្រើនជាងភ្ញៀវទេសចរកម្ពុជា ចូលកម្សាន្តនៅវៀតណាម ចំនួន២១២០០០នាក់។
ចំពោះប្រធានបទទាំងនេះ ភាគីវៀតណាមសង្ឃឹមថា នាយករដ្ឋមន្ត្រីប្រទេសទាំងពីរ នឹងអាចសម្រេចបានកិច្ចព្រមព្រៀងទាក់ទងនឹងការលើកម្ពស់គម្រោងវិនិយោគរវាងកម្ពុជា-វៀតណាម។ វិស័យពាណិជ្ជកម្ម,ទេសចរណ៍ និងការដោះស្រាយបញ្ចប់បញ្ហាព្រំដែនជាដើម។ នេះបើតាមការលើកឡើងរបស់លោក វូ ម៉ៅ នៅក្នុងកិច្ចសម្ភាសជាមួយអ្នកសារព័ត៌មានហ្វីលីពីន៕
© រក្សាសិទ្ធិដោយ thmeythmey.com