អន្តរជាតិ
នាវាដឹកយន្តហោះ Carl Vinson កម្តៅសាច់ដុំជាមួយនាវាចម្បាំងជប៉ុន មុនទៅក្បែរឧបទ្វីបកូរ៉េ នាវាដឹកយន្តហោះ USS Carl Vinson កំពុងធ្វើដំណើរលើផ្ទៃមហាសមុទ្រ (រូបភាពពី U.S. Navy )
× នាវាចម្បាំងមួយកងរបស់អាមេរិក ដែលដឹកនាំដោយនាវាដឹកយន្តហោះ USS Carl Vinson បានទៅដល់សមុទ្រហ្វីលីពីនហើយ ក្នុងដំណើរទៅក្បែរឧបទ្វីបកូរ៉េ ដែលក្រុងវ៉ាស៊ីនតោនប្រកាសថា ធ្វើឡើងដើម្បីកំញើញកូរ៉េខាងជើង។ នៅឯសមុទ្រហ្វីលីពីន នាវាមួយក្រុមនេះ ធ្វើសមយុទ្ធជាមួយនាវាចម្បាំងកងទ័ពជើងទឹកស្វ័យការពារជប៉ុនសិន មុនបន្តដំណើរសម្ញែងឥទ្ធិពលរបស់ខ្លួន។ នាវាមួយកងនេះ នឹងទៅដល់សមុទ្រជប៉ុននៅដំណាច់ខែមេសានេះ។
នាវាប្រយុទ្ធមួយកងរបស់កងទ័ពជើងទឹកអាមេរិក Carl Vinson ដែលទើបទៅដល់ដែនសមុទ្រហ្វីលីពីន បានចាប់ផ្ដើមធ្វើលំហាត់ទ្វេភាគីមួយជាមួយនាវាជប៉ុននៅថ្ងៃទី២៣ ខែមេសា។ មុនមកដល់សមុទ្រហ្វីលីពីន នាវាមួយកងនេះ ក៏ទើបបញ្ចប់ការធ្វើសមយុទ្ធរួមគ្នាជាមួយកងទ័ពជើងទឹកអូស្ត្រាលី ក្រោយពីទទួលបញ្ជាឲ្យចាកចេញពីសិង្ហបុរី រួចធ្វើដំណើរឆ្ពោះទៅឧបទ្វីបកូរ៉េ។
តាមពិតទៅ ក្រុមនាវាចម្បាំងអាមេរិកនេះ ត្រូវមកដល់ដែនសមុទ្រនៅក្បែរឧបទ្វីបកូរ៉េតាំងពីសប្តាហ៍មុនមកម្ល៉េះ ស្របពេលដែលស្ថានភាពតានតឹងកើនឡើងខ្លាំងនៅទីនោះ។ ប៉ុន្តែនាវាមួយក្រុមនេះ មិនបានធ្វើដំណើរទៅកាន់ឧបទ្វីបកូរ៉េភ្លាមៗតាមការប្រកាសរបស់ទីបញ្ជាការទ័ពជើងទឹកអាមេរិកប្រចាំតំបន់ប៉ាស៊ីហ្វិកឡើយ ហើយបែរជាទៅចូលរួមសមយុទ្ធយោធាជាមួយកងទ័ពអូស្ត្រាលីសិន រួចទើបធ្វើដំណើសំដៅឧបទ្វីបកូរ៉េ។
ទាក់ទងនឹងនាវាចម្បាំងនេះដែរ កូរ៉េខាងជើងបានប្រតិកម្មតបខ្លាំងៗដែរដោយសង្កត់ធ្ងន់ថា ការបញ្ជូននាវាចម្បាំងមកគំរាមខ្លួននោះមិនធ្វើឲ្យខ្លួនបាក់ស្បាត ឬចុះញ៉មឡើយ។ ទីភ្នាក់ងារព័ត៌មានកូរ៉េខាងជើង KCNA បានស្រង់សម្តីអ្នកនាំពាក្យក្រសួងការបរទេសកូរ៉េខាងជើងថា ការគំរាមកំហែងនេះមិនអាចធ្វើឲ្យកូរ៉េខាងជើងភ័យខ្លាចឡើយ។ មិនតែប៉ុណ្ណោះ កូរ៉េខាងជើង ក៏គំរាមបាញ់ពន្លិចនាវាដឹកយន្តហោះអាមេរិកថែមទៀត។
បើតាមការប្រកាសរបស់ទីបញ្ជាការកងទ័ពអាមេរិកប្រចាំតំបន់ប៉ាស៊ីហ្វិក នាវាដឹកយន្តហោះ Carl Vinson ដែលអមដំណើរដោយនាវាល្បាតបំពាក់មីស៊ីល USS Lake Champlain និងនាវាពិឃាត USS Michael Murphy DDG នឹងធ្វើលំហាត់ជាមួយនាវាជប៉ុន២គ្រឿងទៀត។ សេចក្ដីប្រកាសនេះបន្តថា សមយុទ្ធរួមគ្នា ធ្វើឡើងដើម្បីពង្រឹងការឆ្លើយតបនៅដែនសមយុទ្ររួមគ្នា និងសមត្ថភាពការពារ ក៏ដូចជាការត្រៀមខ្លួនប្រយុទ្ធផងដែរ។
អនុប្រធានាធិបតីអាមេរិក Mike Pence បានបញ្ជាក់ពេលលោកស្ថិតនៅទីក្រុងស៊ីដនីថា នាវាដឹកយន្តហោះ Carl Vinson នឹងទៅដល់សមុទ្រជប៉ុនប៉ុន្មានថ្ងៃខាងមុខនេះ ដែលជាគោលដៅចុងក្រោយរបស់ខ្លួន។ ដូចដែលបានដឹង វត្តមាននាវាមួយក្រុមនេះ មានគោលដៅសម្ញែងឥទ្ធិពលកងទ័ពអាមេរិកដាក់កូរ៉េខាងជើង ព្រោះរដ្ឋបាលក្រុងវ៉ាស៊ីនតោនធ្លាប់ព្រមានប្រើប្រាស់កម្លាំងដើម្បីបញ្ចប់មហិច្ឆតានុយក្លេអ៊ែរកូរ៉េខាងជើង៕
Tag:
អាមេរិក
ជប៉ុន
ឧបទ្វីបកូរ៉េ
© រក្សាសិទ្ធិដោយ thmeythmey.com