នាង Georgina Rodriguez មិត្តស្រីរបស់កំពូលតារាបាល់ទាត់ Cristiano Ronaldo ត្រូវបានហាមមិនឲ្យធ្វើពិធីជប់លៀងនៅក្នុងគេហដ្ឋានរបស់ Ronaldo ទៀតឡើយ ពីព្រោះប្រធានក្រុមបាល់ទាត់ជម្រើសជាតិព័រទុយហ្គាល់រូបនេះយល់ថាមិត្តស្រីខ្លួនជាមនុស្សនាំឲ្យមានសំណាងអាក្រក់ក្រោយចាញ់ FC Barcelona ៣-២ នាជំនួប El Clasico កន្លងមក។
មុនជំនួប El Clasico មិត្តស្រី Ronaldo នាង Rodriguez បានមានគំរោងរៀបចំពិធីជប់លៀងជាមុនដើម្បីត្រៀមអបអរជ័យជម្នះ ដោយរំពឹងថាក្រុមស្តេចសរ នឹងឈ្នះក្រុមអ្នកមានបុណ្យនៅទឹកដី Bernabeu។ ប៉ុន្តែជាសំណាងអាក្រក់របស់ Real បានចាញ់ Barca ខណៈ Lionel Messi រកបានដល់ទៅ២គ្រាប់ផងនោះ បានធ្វើឲ្យមិត្តប្រុសរបស់នាង CR7 លុបចោលពិធីជប់លៀងនោះចោលវិញ ហើយមិនត្រឹមតែប៉ុណ្ណោះថែមទាំងហាមនាងមិនឲ្យធ្វើពិធីផ្សេងៗនៅក្នុងផ្ទះតទៅទៀតឡើយ។
មូលហេតុដែលខ្សែប្រយុទ្ធមុតស្រួចវ័យ៣១ឆ្នាំ ហាមមិត្តស្រីសញ្ជាតិអេស្ប៉ាញមិនឲ្យប្រារព្ធពិធីជប់លៀងនៅផ្ទះរបស់ខ្លួបទៀតនោះ ដោយសារគិតថានាង Rodriguez ជាមនុស្សដែលធ្វើឲ្យគ្នានសំណាងដល់ខ្លួន និងក្រុមទាំងមូល។ នេះបើតាមការលើកឡើងរបស់ការសែតព័រទុយហ្គាល់ Correio da Manha។
បច្ចុប្បន្ន ក្រុម Real និង Barca មាន៧៥ពិន្ទុដូចគ្នានៃការប្រកួតក្នុងក្របខណ្ឌកំពូលអេស្ប៉ាញ LaLiga ប៉ុន្តែស្តេចសនៅសល់មួយប្រកួតក្នុងដៃទៀត។ សម្រាប់បរាជ័យក្នុងការប្រកួតដ៏ធំ El Clasico កាលពីថ្ងៃអាទិត្យកន្លងទៅនេះ បានធ្វើឲ្យ Barcelona មានសង្ឃឹមឡើងវិញដើម្បីប្រជែងពានកំពូលនេះផងដែរ ខណៈការប្រកួតនៅសល់រហូតដល់ទៅ៥ប្រកួតទៀតឯណោះទើបចប់ក្នុងរដូវកាលនេះ៕