ពីនេះ ពីនោះ
×![]()
ដោយ: សារព័ត៌មានថ្មីៗ
«អគ្គ» អាចត្រូវបានចាត់ទុកជាគុណនាម ដែលឈរនៅពីមុខពាក្យដទៃ។ ពាក្យ ដែលមាន «អគ្គ» នៅខាងដើម តែងមានអត្ថន័យបែបប្រសើរថ្លៃថ្លា ឬ ឧត្តុង្គឧត្តម។
បើតាមវចនានុក្រម សម្តេច ជួន ណាត «អគ្គ» អាចប្រែបានច្រើនយ៉ាងដូចជា ខ្ពស់, ខ្ពង់ខ្ពស់, ខ្ពស់បំផុត, លើស, លើសលុប, ឧត្តម, ប្រសើរ, ប្រសើរបំផុត, ផុតថ្នាក់, ផុតលេខ, ឯក, យ៉ាងឯក, ជាឯក, ធំ, ធំចម្បង, ធំបណ្តាច់, មុន, មុនបំផុត, មានតម្លៃ ។ល។
នៅក្នុងវចនានុក្រម សម្តេច ជួន ណាត ពាក្យ ដែលមាន «អគ្គ» នៅខាងដើម មានដូចជា អគ្គទេសាភិបាល (ឋានន្តរមន្ត្រីជាន់ខ្ពស់ ដែលរដ្ឋាភិបាលនៃប្រទេសមហាអំណាចមួយ ចាត់តាំងឲ្យទៅត្រួតត្រាស្រុកចំណុះ ដូចយ៉ាងមន្ត្រីបារាំង ដែលត្រួតត្រាឥណ្ឌូចិនក្នុងសម័យមុនឯករាជ្យ), អគ្គនាយក (នាយកធំ, ចាងហ្វាងធំ), អគ្គបណ្ឌិត (បណ្ឌិតខ្ពស់, អ្នកប្រាជ្ញថ្នាក់ខ្ពស់), អគ្គបុគ្គល (បុគ្គលថ្នាក់ខ្ពស់), អគ្គបុរស (បុរសឧត្តម), អគ្គមន្ត្រី (មន្ត្រីផុតលេខ), អគ្គមហេសី (មហេសីធំចម្បង), អគ្គរាជទូត (រាជទូតធំ, រាជទូតចម្បង), អគ្គលេខាធិការ (លេខាធិការធំ), អគ្គសាវ័ក (សាវ័កធំ, សាវ័កជាន់ខ្ពស់), អគ្គសេនាបតី (សេនាបតីធំបណ្តាច់), អគ្គាធិការ (អធិការធំ), អគ្គានុរក្ស (អនុរក្សធំ, អ្នកត្រួតមើលការខុសត្រូវទូទៅ) ។ល។
Tag:
ពន្យល់ពាក្យ
អគ្គ
© រក្សាសិទ្ធិដោយ thmeythmey.com
