កូរ៉េខាងជើង ដង្ហោយរកការគាំទ្រពីរដ្ឋអាស៊ានដើម្បីបញ្ចៀសសង្គ្រាមជាមួយអាមេរិក

អន្តរជាតិ

នយោបាយអន្តរជាតិ

កូរ៉េខាងជើង ដង្ហោយរកការគាំទ្រពីរដ្ឋអាស៊ានដើម្បីបញ្ចៀសសង្គ្រាមជាមួយអាមេរិក

28, Apr 2017 , 11:28 am

រូបភាព

ដោយ: តន ចាន់រិទ្ធារ៉ា

កូរ៉េខាងជើង បានដង្ហោយរកការគាំទ្រពីរដ្ឋសមាជិកប្រជាជាតិអាស៊ីអាគ្នេយ៍ ឬអាស៊ាន (ASEAN) ក្នុងជម្លោះជាមួយអាមេរិក ដែលកំពុងស្ថិតលើផ្លូវដ៏គ្រោះថ្នាក់។ ដោយទម្លាក់កំហុសលើអាមេរិក កូរ៉េខាងជើង ចាត់ទុកការប្រឈមមុខគ្នានៅពេលនេះ កំពុងធ្វើឲ្យស្ថានការណ៍ឧបទ្វីបកូរ៉េឈានទៅរកសង្គ្រាមនុយក្លេអ៊ែរដ៏មហន្តរាយ និងបានស្នើឲ្យរដ្ឋសមាជិកអាស៊ានទាំង ១០ប្រទេស ជួយបញ្ចៀសគ្រោះកាចនេះផង។

អាចចាត់ទុកជារឿងមិនធម្មតាឬកម្រមួយ ដែលរដ្ឋមន្ត្រីការបរទេសកូរ៉េខាងជើង Ri Yong-ho បានសរសេរសំបុត្រមួយទៅកាន់អគ្គលេខាធិការអាស៊ាន ដោយបានរ៉ាយរ៉ាប់ពីទង្វើមិនសមគួររបស់អាមេរិក ដែលកំពុងធ្វើឲ្យស្ថានការណ៍ឧបទ្វីបកូរ៉េតានតឹងខ្លាំង។ តាមរយៈសំបុត្រដែលផ្សាយដោយទីភ្នាក់ងារព័ត៌មាន AFP ប្រមុខការទូតកូរ៉េខាងជើង ក៏បានព្រមានពីគ្រោះថ្នាក់ការផ្ទុះឡើងសង្គ្រាមនុយក្លេអ៊ែរ ហើយដើមចមនៃសង្គ្រាមនេះ គឺសមយុទ្ធរួមគ្នារវាងអាមេរិក និងកូរ៉េខាងត្បូងតែម្ដង។

ក្នុងសំបុត្រដ៏កម្រនេះ ប្រមុខការទូតកូរ៉េខាងជើង ក៏ទទូចឲ្យអគ្គលេខាធិការអាស៊ាន ជួយផ្សព្វផ្សាយព័ត៌មាននៃស្ថានការណ៍គ្រោះថ្នាក់នៅឧបទ្វីបកូរ៉េ និងលើកជាសំណើសមស្របសម្រាប់ដោះស្រាយបញ្ហានេះដែរ។ ឆ្លៀតពេលនោះ កូរ៉េខាងជើង ក៏មិនភ្លេចរិះគន់សមយុទ្ធប្រចាំឆ្នាំរួមគ្នារវាងអាមេរិក និងកូរ៉េខាងត្បូង ដែលជាមូលហេតុដ៏សំខាន់នាំឲ្យកូរ៉េខាងជើងប្រឹងប្រែងអភិវឌ្ឍកម្មវិធីនុយក្លេអ៊ែរ ទុកការពារខ្លួននោះ។

បើតាមសំបុត្រដដែល រដ្ឋមន្ត្រីការបរទេសកូរ៉េខាងជើង រំពឹងថា៖ «អាស៊ាន ដែលមានតួនាទីសំខាន់ក្នុងការរក្សាសន្តិភាព និងស្ថិរភាពតំបន់ នឹងអធិប្បាយលើសមយុទ្ធរួមគ្នារវាងអាមេរិក និងកូរ៉េខាងត្បូងក្នុងជំនួបប្រចាំឆ្នាំរបស់ខ្លួន ដោយឈរលើជំហរយុត្តិធម៌ ក៏ដូចជាបន្តការពារសន្តិភាព និងសុវត្ថិភាពឧបទ្វីបកូរ៉េផងដែរ»។

បើទោះមានឈ្មោះជារដ្ឋក្រីក្រ ហើយមិនសូវមានអ្នករាប់រកក្ដី កូរ៉េខាងជើង ក៏នៅមានមិត្តភក្ដិច្រើននៅអាស៊ានដែរ។ កម្ពុជា ឡាវ មីយ៉ាន់ម៉ា និងវៀតណាម អាចនិយាយបានជាមិត្តល្អរបស់កូរ៉េខាងជើង ហើយបើនិយាយពីអាស៊ានទៀត កូរ៉េខាងជើង ក៏ជាដៃគូសន្ទនារបស់អង្គការតំបន់មួយនេះដែរ។ យ៉ាងណាក្ដី នាពេលកន្លងមក អាស៊ាន ក៏បានរិះគន់ខ្លាំងៗលើកូរ៉េខាងជើង ដែលចិញ្ចឹមចិត្តបន្តមហិច្ឆតាអភិវឌ្ឍនុយក្លេអ៊ែរដែរ។

ស្ទើររាល់ពេលដែលកូរ៉េខាងជើងសាកល្បងនុយក្លេអ៊ែរ ឬបាញ់មីស៊ីល រដ្ឋសមាជិកអាស៊ានទាំង ១០ប្រទេស តែងចេញសេចក្ដីថ្លែងការណ៍រួម ថ្កោលទោសដៃគូសន្ទនារបស់ខ្លួន។ អាស៊ាន ក៏ស្នើឲ្យកូរ៉េខាងជើង គោរពតាមសេចក្ដីសម្រេចទាំងឡាយរបស់ក្រុមប្រឹក្សាសន្តិសុខអង្គការសហប្រជាជាតិ ដែលសំដៅបញ្ចប់កម្មវិធីនុយក្លេអ៊ែររបស់កូរ៉េខាងជើង។ បន្ថែមពីនេះ អាស៊ាន ក៏អំពាវនាវឲ្យភាគីពាក់ព័ន្ធ រក្សាការអត់ធ្មត់ខ្ពស់ដើម្បីស្ថិរភាពនៅឧបទ្វីបកូរ៉េ៕