កីឡាអន្តរជាតិ
អន្តរជាតិ
FIFA សម្រេចឲ្យប្រើប្រាស់វីដេអូជាជំនួយការកាត់ក្តីការប្រកួត World Cup នៅរុស្ស៊ី លោក Gianni Infantino ប្រធានសហព័ន្ធបាល់ទាត់អន្តរជាតិFIFA
× លោក Gianni Infantino ប្រធានសហព័ន្ធបាល់ទាត់អន្តរជាតិ (FIFA) បានប្រកាសដាក់ឲ្យប្រើប្រាស់ជំនួយការអាជ្ញាកណ្ដាលជាវីដេអូ (Video Assistant Referees) ទៅក្នុងការប្រកួតពានរង្វាន់ពិភពលោក World Cup ឆ្នាំ២០១៨ នៅរុស្ស៊ី។
«យើងនឹងប្រើប្រាស់ Video Assistant Referees នៅក្នុងព្រឹត្តិការណ៍ FIFA World Cup នៅឆ្នាំក្រោយ ពីព្រោះយើងបានទទួលផលវិជ្ជមានច្រើនពីការដាក់សាកល្បងជំនួយការជាវីដេអូនេះនាពេលកន្លងមក»។ នេះជាការលើកឡើងរបស់លោក Infantino នាសន្និបាតរបស់សហព័ន្ធកីឡាបាល់ទាត់ប្រចាំតំបន់អាមេរិកឡាទីនក្នុងរដ្ឋធានី Santiago ប្រទេសស៊ីលី កាលពីថ្ងៃទី២៥ ខែមេសាកន្លងទៅ។
ប្រធាន FIFA សញ្ជាតិស្វីសវ័យ៤៧រូបនេះបានបន្តទៀតថា៖«ការដាក់ជំនួយការអាជ្ញាកណ្ដាលជាវីដេអូនេះ គឺវាមានប្រយោជន៍ត្រង់ថាអ្នកទស្សនានៅកីឡដ្ឋានផ្ទាល់ ឬនៅគេហដ្ឋានអាចពិនិត្យមើលម្តងទៀតជាមួយនឹងវីដេអូនេះ ប្រសិនបើអាជ្ញាកណ្ដាលមានកំហុសក្នុងការពិន័យនៅក្នុងទីលាននោះភ្លាមៗតែម្តង»។
ជំនួយការអាជ្ញាកណ្ដាលជាវីដេអូនេះធ្លាប់បានប្រើប្រាស់លើកដំបូងក្នុងការប្រកួតពាន FIFA Club World Cup កាលពីខែធ្នូនៅប្រទេសជប៉ុនផងដែរ ហើយ Video Assistant Referees នឹងត្រូវដាក់ឲ្យត្រួតពិនិត្យឡើងវិញ(Replay) លើករណីសំខាន់ៗ៤កន្លែងដូចជា គ្រាប់បាល់បញ្ចូលទី ការពិន័យកាតក្រហម ការផ្តល់បាល់ពិន័យ១១ម៉ែត្រ និងករណីសំខាន់ៗផ្សេងទៀត ដើម្បីកុំឲ្យមានការភាន់ច្រឡំ៕
Tag:
FIFA World Cup
បាល់ទាត់
© រក្សាសិទ្ធិដោយ thmeythmey.com