កីឡាអន្តរជាតិ
អន្តរជាតិ
Nadal ឈ្នះជើងឯកវាយកូនបាល់ Barcelona Open ជាលើកទី១០
× Rafael Nadal ឈ្នះជើងឯកវាយកូនបាល់ Barcelona Open ជាលើកទី១០ ក្រោយផ្តួលកីឡាករ Dominic Thiem ក្នុងលទ្ធផល២សិតជាប់គ្នា ៦-៤ និង៦-១ ក្នុងទីលានដីក្រហមកាលពីថ្ងអាទិត្យ។
អតីតកីឡាករលេខ១ពិភពលោកសញ្ជាតិអេស្ប៉ាញ Nadal បានប្រើថេរវេលា ៩០នាទីដើម្បីយកឈ្នះកីឡាករសញ្ជាតិអូទ្រីស Dominic Thiem ក្នុងវគ្គផ្តាច់ព្រ័ត្រពាន Barcelona Open ដែលការប្រកួតនេះធ្វើឡើងក្នុងទីក្រុង Barcelona ប្រទេសអេស្ប៉ាញ ។
កាលពីសប្តាហ៍មុន Nadal ក៏បានឈ្នះពាន Monte Carlo Masters លើកទី១០ ជាកំណត់ត្រារបស់ខ្លួនផងដែរ ហើយម្ចាស់ជើងឯក Grand Slam ១៤សម័យកាលនេះក៏មានបំណងដណ្តើមពាន French Open ជាលើកទី១០ថែមទៀត នាការប្រកួតខាងមុខនេះ។
«នេះជាសប្តាហ៍ទី២ហើយដែលខ្ញុំទទួលបានពាន បន្ទាប់ពីសប្តាហ៍មុនខ្ញុំបានឈ្នះ Monte Carlo Masters មុនឈ្នះនៅទីនេះ ហើយវាជាប្រកួតដ៏ពិសេសសម្រាប់ខ្ញុំខណៈទីលានដីក្រហមជាទីលានជំនាញរបស់ខ្ញុំស្រាប់»។ នេះជាការបញ្ជាក់របស់ Nadal។
កីឡាករសញ្ជាតិអេស្ប៉ាញវ័យ៣០ឆ្នាំ ធ្លាប់ឈ្នះពាននៅទីក្រុង Barcelona នេះចាប់ពីឆ្នាំ ២០០៥ដល់២០០៩ ពី២០១១ដល់២០១៣ និងក្នុងឆ្នាំ២០១៥ មុនឈ្នះជាលើកទី១០ ឆ្នាំ២០១៧នេះ៕
Tag:
វាយកូនបាល់
Rafael Nadal
Barcelona Open
© រក្សាសិទ្ធិដោយ thmeythmey.com