កីឡាអន្តរជាតិ
អន្តរជាតិ
UN គាំទ្រ Muntari ដែលដើរចេញពីទីលាន ដោយសារតែមានការរើសអើងជាតិសាសសន៍
× មន្ត្រីសិទ្ធិមនុស្សជាន់ខ្ពស់របស់អង្គការសហប្រជាជាតិ (UN) បានសាទរចំពោះខ្សែបម្រើ Sulley Muntari ដែលដើរចេញពីទីលានបាល់ទាត់ ដោយសារអាជ្ញាកណ្ដាលបានផ្តល់កាតលឿងដល់រូបគេ ខណៈកីឡាករស្បែកខ្មៅរូបនេះបានរាយការណ៍ប្រាប់អាជ្ញាកណ្ដាល ពីការរើសអើងជាតិសាសន៍ពីសំណាក់ក្រុមអ្នកគាំទ្រគូបដិបក្ខ អំឡុងការប្រកួតលីកអ៊ីតាលី Serie A កាលពីចុងសប្តាហ៍កន្លងទៅ។
អតីតខ្សែបម្រើរបស់ក្រុមជម្រើសជាតិហ្គាណាវ័យ៣២ឆ្នាំរូបនេះ បានសុំឲ្យអាជ្ញាកណ្ដាលលោក Daniele Minelli បញ្ឈប់ការប្រកួតរវាងក្រុម Cagliari និង Pescara នៃការប្រកួតលីកកំពូលអ៊ីតាលី Serie A បន្ទាប់ពីមានការរើសអើងជាតិសាសន៍មកលើខ្លួន។ ប៉ុន្តែការស្នើរបស់អតីតខ្សែបម្រើរបស់ក្រុម Portsmouth និង Inter Milanរូបនេះ ត្រូវបានលោកអាជ្ញាកណ្ដាលសញ្ជាតិអ៊ីតាលីផ្តល់កាតលឿងមកឲ្យខ្លួនទៅវិញ ដែលធ្វើឲ្យ Sulley Muntari សម្រេចចិត្តដើរចេញពីទីលានប្រកួតភ្លាមៗតែម្តង។
ជុំវិញករណីខាងលើនេះ ឧត្តមស្នងការទទួលបន្ទុកសិទ្ធិមនុស្សអង្គការសហប្រជាជាតិ លោក Zeid Ra'ad al-Hussein បានសាទរចំពោះទង្វើរបស់ Muntari ហើយបានហៅកីឡាករស្បែកខ្មៅនេះថា ជាអ្នកបំផុសគំនិតមួយដើម្បីយើងទាំងអស់គ្នានៅទីនេះ កុំឲ្យមានការរើសអើងជាតិសាសន៍បន្តទៀត ហើយយើងនឹងគាំទ្រ និងទទួលយកជំហរមួយនេះជានិច្ច។
ជាមួយគ្នានេះលោក Zeid ក៏បាននិយាយទៅកាន់ FIFAផងដែរថា ត្រូវតែមានការយកចិត្តទុកដាក់ខ្លាំងទៅលើបញ្ហារើសអើងជាតិសាសន៍នៅក្នុងការប្រកួត ហើយស្ថាប័នលោកក៏មានទំនាក់ទំនងជាមួយសហព័ន្ធកីឡាបាល់ទាត់នេះផងដែរនៅពេលមានករណីនេះកើតឡើង៕
Tag:
បាល់ទាត់
រើសអើងជាតិសាសន៍
UN
Sulley Muntari
© រក្សាសិទ្ធិដោយ thmeythmey.com