នៅសម័យសង្គមរាស្ត្រនិយម ថ្នាក់ដឹកនាំកាសែតឯកជនតម្រូវឲ្យធ្វើសច្ចាប្រណិធាន

ជាតិ

នៅសម័យសង្គមរាស្ត្រនិយម ថ្នាក់ដឹកនាំកាសែតឯកជនតម្រូវឲ្យធ្វើសច្ចាប្រណិធាន

03, May 2021 , 10:08 am

រូបភាព

ដោយ: រួបរួម

ដើម្បីបង្ហាញភក្តីភាពចំពោះជាតិ សាសនា និងរាជបល្ល័ង្គ ថ្នាក់ដឹកនាំសារព័ត៌មានឯកជនដែលសរសេរជាភាសាខ្មែរ កាលពីសម័យសង្គមរាស្ត្រនិយម តម្រូវឲ្យធ្វើសច្ចាប្រណិធាន នៅព្រះវិហារព្រះកែវមរកត ក្នុងព្រះបរមរាជវាំង នៅចំពោះព្រះបរមរូប ព្រះករុណាព្រះសុវណ្ណកោដ្ឋ ព្រះបាទ នរោត្តមទី១។ នេះបើតាមឯកសារដែលផ្សាយដោយទីភ្នាក់ងារព័ត៌មាន AKP និងចុះផ្សាយបន្តដោយសារព័ត៌មានជាភាសាបារាំង Cambodge, Quotidien national កាលពីថ្ងៃទី៨ ខែមករា ឆ្នាំ១៩៦៨ ។

នាពិធីដែលរៀបចំកាលពីថ្ងៃទី៦ ខែមករា ឆ្នាំ១៩៦៨ ថ្នាក់ដឹកនាំកាសែតឯកជនជាភាសាខ្មែរ រួមមាន កាសែតសុជីវធម៌ កាសែតសុវណ្ណភូមិ កាសែតសូរិយា កាសែតប្រយោជន៍ខ្មែរ កាសែតកោះសន្តិភាព កាសែតខ្មែរសាមគ្គី និងទស្សនាវដ្តីកម្រងផ្កា បានធ្វើសច្ចាប្រណិធាន ក្រោមការដឹកនាំរបស់សម្តេច ចៅសែន កុសល ឈុំ ប្រធានរដ្ឋសភា ហើយលោក ស្មាន ឈឿម មន្ត្រី ពិធីការនៃព្រះបរមរាជវាំង ជាអ្នកដឹកនាំការធ្វើសច្ចាប្រណិធាន។

ថ្នាក់ដឹកនាំកាសែតដែលបានស្បថកាលពីឆ្នាំ១៩៦៨ រួមមានមកពី កាសែតសុជីវធម៌ កាសែតសុវណ្ណភូមិ កាសែតសូរិយា កាសែតប្រយោជន៍ខ្មែរ កាសែតកោះសន្តិភាព កាសែតខ្មែរសាមគ្គី និងទស្សនាវដ្តីកម្រងផ្កា។

នៅមុខ ព្រះបរមរូប ព្រះបាទសុវណ្ណកោដ្ឋ ថ្នាក់ដឹកនាំសារព័ត៌មានឯកជនដែលសរសេរជាភាសាខ្មែរ បានសច្ចាយ៉ាងម៉ឺងម៉ាត់ ក្នុងការបំពេញភក្តីភាពចំពោះជាតិ សាសនា និងរាជបល្ល័ង្គ ដោយប្រកាន់គោលការណ៍ឯករាជ្យ អព្យាក្រឹត្យ និងសង្គមពុទ្ធសាសនា។

ខ្លឹមសារសំខាន់ផ្សេងទៀតរួមមាន ការប្តេជ្ញាមិនឃុបឃិតជាមួយជនក្បត់ ការមិនលក់ខ្លួនឲ្យបរទេស និងតាំងចិត្តធ្វើគ្រប់បែបយ៉ាងដើម្បីប្រយោជន៍ជាតិ ក្រោមព្រះរាជកិច្ចដឹកនាំរបស់ សម្តេចព្រះប្រមុខរដ្ឋ ព្រះបាទ នរោត្តម សីហនុ។ ពិធីសច្ចាប្រណិធាននៅពេលនោះ បានប្រព្រឹត្តទៅរយៈពេល២ម៉ោង។

តាមឯកសារ លោក ជា សាន ចាងហ្វាងការផ្សាយកាសែត Cambodge បានបញ្ជាក់ថា កាសែតឯកជនដែលសរសេរជាភាសាជាតិ បានរស់ឡើងវិញ ដូច្នេះវាជាឱកាសមាសរបស់ថ្នាក់ដឹកនាំកាសែតទាំងនោះ ក្នុងការបង្ហាញភក្តីភាពចំពោះជាតិ សាសនា និងព្រះរាជបល្ល័ង្គ ជាពិសេសក្រោមព្រះរាជកិច្ចដឹកនាំរបស់សម្តេចព្រះប្រមុខរដ្ឋ ព្រះបាទ នរោត្តម សីហនុ៕