ទណ្ឌិត៣៥នាក់នឹងត្រូវបន្ធូរបន្ថយទោស នៅថ្ងៃបុណ្យវិសាខបូជា

ជាតិ

សង្គមជាតិ

ទណ្ឌិត៣៥នាក់នឹងត្រូវបន្ធូរបន្ថយទោស នៅថ្ងៃបុណ្យវិសាខបូជា

04, May 2017 , 7:39 pm

រូបភាព

លោក គឹម សន្តិភាព អ្នកនាំពាក្យក្រសួងយុត្តិធម៌

ដោយ:

ភ្នំពេញ៖ ក្រសួងយុត្តិធម៌ ពិនិត្យឃើញថា ទណ្ឌិត៣៥នាក់នឹងត្រូវបន្ធូរបន្ថយទោស ហើយមិនមានទណ្ឌិតណាម្នាក់ ដែលមានលទ្ធភាពគ្រប់គ្រាន់ ដើម្បីទទួលបានការលើកលែងទោសឡើយ នៅក្នុងពិធីបុណ្យវិសាខបូជា ដែលនឹងប្រព្រឹត្តទៅនៅថ្ងៃទី១០ ខែឧសភា ឆ្នាំ២០១៧។ នេះបើតាម លោក គឹម សន្តិភាព អ្នកនាំពាក្យក្រសួងយុត្តិធម៌។

លោក គឹម សន្តិភាព បញ្ជាក់ថា នៅក្នុងពិធីបុណ្យវិសាខបូជា នាឆ្នាំនេះ ទណ្ឌិតចំនួន ៣៥នាក់ នឹងត្រូវស្នើឲ្យបន្ធូរបន្ថយទោស ប៉ុន្តែ ពុំមានទណ្ឌិតណាម្នាក់ នឹងត្រូវស្នើឲ្យលើកលែងទោសនោះទេ។ លោក គឹម សន្តិភាព អះអាងដូច្នេះ ក្រោយពីបញ្ចប់កិច្ចប្រជុំនៅក្នុង «គណៈកម្មការជាតិពិនិត្យបញ្ជីទណ្ឌិតស្នើសុំលើកលែងនិងបន្ធូរបន្ថយទោស» នៅក្រសួងយុត្តិធម៌ កាលពីថ្ងៃទី៣ ខែឧសភា ឆ្នាំ២០១៧។

បើតាមលោក គឹម សន្តិភាព ដដែល ពន្ធនាគារចំនួន១៥ និងមណ្ឌលអប់រំកែប្រែចំនួន៤ បានបញ្ជូនឈ្មោះទណ្ឌិតចំនួន២៧៤នាក់ ទៅកាន់ក្រសួងយុត្តិធម៌ ដើម្បីសុំឲ្យពិនិត្យពីលទ្ធភាព ក្នុងការលើកលែងនិងការបន្ធូរបន្ថយទោស។ ជាលទ្ធផល ក្នុងចំណោមទណ្ឌិតទាំង២៧៤នាក់នោះ មានទណ្ឌិតតែ ៣៥នាក់ប៉ុណ្ណោះ ដែលនឹងទទួលបានការបន្ធូរបន្ថយទោស។

ពាក់ព័ន្ធនឹងបញ្ហានេះ លោក ជិន ម៉ាលីន ដែលជាអ្នកនាំពាក្យក្រសួងយុត្តិធម៌ដែរនោះ បាននិយាយថា ក្រោយពិនិត្យចប់សព្វគ្រប់ហើយ សំណើសុំឲ្យបន្ធូរបន្ថយទោស ដល់ទណ្ឌិតខាងលើ នឹងត្រូវថ្វាយទៅព្រះមហាក្សត្រ ដើម្បីឲ្យព្រះអង្គឡាយព្រះហស្ថ។

សូមបញ្ជាក់ថា ប្រទេសកម្ពុជា តែងលើកលែងនិងបន្ធូរបន្ថយទោស ដល់ទណ្ឌិត នៅក្នុងពិធីបុណ្យធំៗចំនួនបី គឺពិធីបុណ្យចូលឆ្នាំថ្មីប្រពៃណីខ្មែរ ពិធីបុណ្យអុំទូក និងពិធីបុណ្យវិសាខបូជា៕