លោក ប៉ា សុជាតិវង្ស ចង់ដកយានដ្ឋានជួសជុលរថយន្ត និងឃ្លាំងស្តុកទំនិញ ចេញទៅជាយក្រុង

ជាតិ

សេដ្ឋកិច្ច

លោក ប៉ា សុជាតិវង្ស ចង់ដកយានដ្ឋានជួសជុលរថយន្ត និងឃ្លាំងស្តុកទំនិញ ចេញទៅជាយក្រុង

06, May 2017 , 4:21 pm

រូបភាព

ដោយ:

ភ្នំពេញ៖ អភិបាលរាជធានីភ្នំពេញ បានបង្ហាញឆន្ទៈចង់ដកយានដ្ឋានជួសជុលរថយន្ត និងឃ្លាំងស្តុកទំនិញចេញទៅជ្រាយក្រុង ដើម្បីជួយកាត់បន្ថយការកកស្ទះចរាចរណ៍ និងផលប៉ះពាល់ផ្សេងៗ។ នេះបើតាម លោក ម៉េត មាសភក្ដី អ្នកនាំពាក្យសាលារាជធានីភ្នំពេញ ដែលបានស្រង់ខ្លឹមសារដែល លោក ប៉ា សុជាតិវង្ស បានលើកឡើងនាឱកាសលោកចុះត្រួតពិនិត្យការដ្ឋានសាងសង់រង្វង់មូលកួរស្រូវ ឬស្ត្រីទូលក្អមក្នុងខណ្ឌដង្កោ រាជធានីភ្នំពេញ នៅថ្ងៃទី៦ខែឧសភា ប្រាប់ដល់សារព័ត៌មានថ្មីៗ។

បើតាម លោក ម៉េត មាសភក្ដី អ្នកនាំពាក្យសាលារាជធានីភ្នំពេញ លោក ប៉ា សុជាតិវង្ស បានបញ្ចេញគំនិតតម្រង់ទិសមួយ ដោយចង់ឲ្យយានដ្ឋានជួសជុលរថយន្ត និងឃ្លាំងស្តុកទំនិញ ដែលនៅក្នុងក្រុងភ្នំពេញ ត្រូវប្ដូរចេញទៅជ្រាយក្រុង។ លោក មាសភក្ដី បានថ្លែងយ៉ាងដូច្នេះថា៖«ការលើកឡើងរបស់លោក ប៉ា សុជាតិវង្ស គ្រាន់តែជាគោលបំណងនៃការតម្រង់ទិសសម្រាប់ថ្ងៃក្រោយ គឺមិនមែនជាបទបញ្ជាដែលត្រូវតែអនុវត្តភ្លាមៗនោះទេ»។

លោក ម៉េត មាសភក្ដី បន្តថា លោក ប៉ា សុជាតិវង្ស ចង់ដកឃ្លាំងស្តុកទំនិញទៅជាយក្រុង ព្រោះការសង់ឃ្លាំងទាំងនោះត្រូវការដីធំ និងបានធ្វើឲ្យរថយន្តដឹកទំនិញធំៗត្រូវបើកចូលក្នុងក្រុង ដែលជាកត្តាមួយផ្នែកធ្វើឲ្យកកស្ទះចរាចរណ៍។

ចំពោះយានដ្ឋានជួសជុលរថយន្ត ត្រូវបាន លោក ម៉េត មាសភក្ដី ពន្យល់ថា សកម្មភាពជួសជុលរថយន្តរបស់យានដ្ឋានមួយចំនួននៅក្នុងក្រុងបានរំខានជាសំឡេង និងមានបញ្ចេញជាតិពុល បង្កការរំខានដល់អ្នកនៅជិតខាងយានដ្ឋាន ដែលអភិបាលរាជធានីចង់ជំរុញឲ្យដកចេញទៅជាយក្រុង។ លោកបន្ថែមថា យានដ្ឋានមួយចំនួន ដោយសារតែកន្លែងតូចបានធ្វើឲ្យរថយន្តដែលត្រូវយកមកជួសជុលត្រូវចតនៅផ្លូវសាធារណៈ ដែលជាផ្នែកមួយនៃបញ្ហាកកស្ទះចរាចរណ៍។

អ្នកនាំពាក្យសាលារាជធានីភ្នំពេញរូបនេះបញ្ជាក់ថា ការលើកឡើងរបស់ លោក ប៉ា សុជាតិវង្ស គឺជាការតម្រង់ទិស ដែលអាចនាំទៅដល់ការអនុវត្តដូចការលើកឡើងនេះជាបន្តបន្ទាប់។ «ក្រុមហ៊ុនណាដែលគាត់មានលទ្ធភាពធ្វើភ្លាម គាត់ចាប់ផ្ដើមអនុវត្តទៅ ព្រោះថ្ងៃក្រោយទៅយើងតម្រង់ទិសទៅបែបនេះហើយ»។ លោក មាសភក្ដី ថ្លែងដូច្នេះ មុននឹងលោកបន្តថា៖«ដំបូងយើងលើកទឹកចិត្ត ស្នើ ហើយថ្ងៃក្រោយមកយើងអនុវត្តបានច្រើន នៅសល់តិចតួច (យានដ្ឋាន និងឃ្លាំងដែលមិនបានប្ដូរចេញ) ជំហានរបស់យើងគឺចាត់វិធានការ ដើម្បីឲ្យគាត់អនុវត្តតាម»។

ទោះយ៉ាងណាសាលាក្រុងមិនទាន់មានផែនការជាក់លាក់ជុំវិញបញ្ហានេះនៅឡើយ។ នេះបើតាម លោក ម៉េត មាសភក្ដី ៕