ជាតិ
ពលរដ្ឋពីខេត្តនានា ដែលចាញ់បោកក្រុមហ៊ុន EBC និងអង្គការពីរទៀត សុំអន្តរាគមន៍ពីស្ថាប័នចំនួនបី
× ភ្នំពេញ៖ ពលរដ្ឋរាប់រយនាក់ ដែលតំណាងឲ្យពលរដ្ឋជាង ៥ពាន់គ្រួសារ មកពីរាជធានីភ្នំពេញ និងបណ្ដាខេត្តនានា បានដាក់ញ្ញតិសុំអន្តរាគមន៍ពីស្ថាប័នតុលាការ រដ្ឋសភា និងក្រសួងយុត្តិធម៌ នៅថ្ងៃទី៨ខែឧសភានេះ ដើម្បីទទួលបានដំណោះស្រាយលើរឿងដែលពួកគាត់ចោទថា ក្រុមហ៊ុន Empire Big Capital Limited (EBC) ឃុបឃិតជាមួយអង្គការពីរទៀត បានឆបោកប្រាក់រាប់លានដុល្លារ។
បន្ទាប់ពីដាក់ពាក្យបណ្ដឹងទៅសាលាដំបូងរាជធានីភ្នំពេញ ពលរដ្ឋរាប់រយនាក់បានដាក់ញ្ញត្តិទៅរដ្ឋសភា និងក្រសួងយុត្តិធម៌ ដើម្បីឲ្យស្ថាប័នទាំងនេះជួយអន្តរាគមន៍ និងដោះស្រាយតាមផ្លូវច្បាប់ លើករណីដែលពលរដ្ឋទាំងនោះចោទថា ក្រុមហ៊ុន EBC ដែលមានមូលដ្ឋាននៅហុងកុង និងអង្គការមូលនិធិអភិវឌ្ឍន៍អាស៊ីអាគ្នេយ៍ (AIF) និងសមាគមអ្នកប្រឹក្សាយោបលវិនិយោគ (ICA) បានឃុបឃិតឆបោកប្រាក់ដើមទុនសរុប ៤៦លានដុល្លាររបស់ពលរដ្ឋជាង ៥ពាន់គ្រួសារ។
បើតាមពលរដ្ឋដែលចូលរួមដាក់ញ្ញត្តិលើករណីខាងលើនេះបានឲ្យដឹង ពួកគាត់បានចាញ់បោកក្រុមហ៊ុន EBC ដែលបានប្រមូលប្រាក់ដើមទុនរបស់ពួកគាត់ចាប់តាំងពីឆ្នាំ២០១៣មក ដោយសន្យាថានឹងផ្ដល់ផលចំណេញជាភាគលាភ ១០ភាគរយក្នុងមួយខែ ហើយរយៈពេល ១៨ខែ ក្រុមហ៊ុននឹងឲ្យប្រាក់ដើមត្រឡប់ទៅពលរដ្ឋជាអ្នកវិនិយោគវិញ។ ហើយប្រតិបត្តិការរបស់ក្រុមហ៊ុននេះមានការសហការជាអង្គការទាំងពីខាងលើ ដែលផ្សពផ្សាយកៀងគរប្រជាពលរដ្ឋឲ្យដាក់ទុនលើការវិនិយោគនេះ។
លោក ជ័យ វឿន មកពីខេត្តកំពង់ស្ពឺដែលចូលរួមដាក់ញ្ញត្តិនេះដែរ បានឲ្យដឹងថា ការដែលពលរដ្ឋហានដាក់ទុនជាមួយក្រុមហ៊ុន EBC ដោយសារតែពលរដ្ឋជឿលើអង្គការ AIF និងសមាគម ICA ។ «ពលរដ្ឋអត់មានអ្នកណាស្គាល់ក្រុមហ៊ុន EBC នៅហុងកុងនោះទេ គឺ AIF និង ICA ជាអ្នកឈរកណ្ដាល។ អង្គការនេះពីរនេះប្រមូលប្រាក់ពីពលរដ្ឋ ហើយរុញចូលគម្រោងរបស់ក្រុមហ៊ុន EBC »។ នេះជាការបញ្ជាក់របស់ លោក វឿន ដែលលោកអះអាងថា ក្រុមហ៊ុននេះបានឆបោកប្រាក់ពលរដ្ឋរាប់ម៉ឺនគ្រួសារឯណោះ គឺមិនមែនតែអ្នកដែលមានឈ្មោះប្ដឹងជាង ៥ពាន់គ្រួសារដែលទាមទារឲ្យក្រុមហ៊ុនសងប្រាក់ដើមទុននៅថ្ងៃនេះប៉ុណ្ណោះទេ។
លោក ជ័យ វឿន អះអាងថាលោកបានចាញ់បោកក្នុងគម្រោងវិនិយោគនេះសរុបជាង ៣ម៉ឺនដុល្លារ។ លោកប្រាប់ថា លោកដាក់ប្រាក់ក្នុងគម្រោងនេះក្នុងដំណាក់កាលដំបូងនៅចុងឆ្នាំ២០១៤ លោកបានភាគលាភជាធម្មតា លុះដាក់ប្រាក់ក្នុងដំណាក់កាលបន្ទាប់នៅឆ្នាំ២០១៥ លោកមិនទទួលបានភាគលាភនោះទេ ហើយប្រាក់ដើមក៏ក្រុមហ៊ុនមិនសងត្រឡបរហូតមកដល់បច្ចុប្បន្ន។
ការដែលក្រុមហ៊ុនបានផ្ដល់ភាគលាភក្នុងគ្រាដំបូងៗជូនដល់អ្នកវិនិយោគ បានទាក់ទាញឲ្យអ្នកផ្សេងៗទៀតច្រើនឡើងៗចូលរួមក្នុងគម្រោងវិនិយោគនេះ។ អ្នកស្រី គង់ ណា មកពីខេត្តកំពង់ធំ បានមានប្រសាសន៍ថា ដោយសារតែអ្នកស្រីឃើញអ្នកក្នុងស្រុកភូមិរបស់អ្នកស្រីគេដាក់ប្រាក់ក្នុងគម្រោងនេះទទួលបានភាគលាភ ទើបអ្នកស្រីសម្រេចចិត្តដាក់ប្រាក់តាមគេដែរ។ អ្នកស្រីលើកឡើងយ៉ាងដូច្នេះថា៖«ខ្ញុំស្រាប់ស្រាលតាមគេ អ្នកនៅស្រុក ឃើញគេដាក់បាន ខ្ញុំដាក់តាមគេដែរ»។
អ្នកនាំពាក្យរដ្ឋសភា លោក ឡេង ប៉េងឡុង បានថ្លែងប្រាប់សារព័ត៌មានថ្មីៗថា រដ្ឋសភានឹងដោះស្រាយញ្ញត្តិរបស់ពលរដ្ឋតាមនីតិវិធី ដោយលោកបញ្ជាក់ថា៖«សភានឹងសរសេរលិខិតទៅក្រសួងពាក់ព័ន្ធដើម្បីឲ្យដោះស្រាយ»។
សារព័ត៌មានថ្មីៗមិនអាចទាក់ទងសុំការឆ្លើយតបពីអ្នកនាំពាក្យក្រសួងយុត្តិធម៌ រួមទាំងក្រសួងមហាផ្ទៃជុំវិញបញ្ហានេះបានទេនៅថ្ងៃនេះ។
បើតាម លោក ជ័យ វឿន ក្រុមហ៊ុនឈប់ផ្ដល់ភាគលាភចាប់ពីខែកក្កដា ឆ្នាំ២០១៥ ដល់អ្នកវិនិយោគ។ លោកបន្ថែមថា ក្រុមហ៊ុន តាមរយៈអង្គការទាំងពីរខាងលើបានសន្យាម្ដងហើយម្ដងទៀតថានឹងបង្វិលប្រាក់ត្រឡប់ជូនអ្នកវិនិយោគវិញ។ ទន្ទឹមនឹងរង់ចាំការសន្យានេះ អ្នកមួយចំនួនបានចងជាក្រុមហើយធ្លាប់ប្ដឹងទៅស្ថាប័នរបស់រដ្ឋាភិបាល ប៉ុន្តែគ្មានដំណោះស្រាយ។ នេះបើតាម លោក ជ័យ វឿន ។
កាលពីខែកក្កដាឆ្នាំ២០១៦ ក្រសួងមហផ្ទៃ និងគណៈកម្មការមូលបត្រកម្ពុជា បានចេញសេចក្ដីប្រកាសព័ត៌មានរួមគ្នាមួយដែលបញ្ជាក់ថា ប្រតិបត្តិការប្រមូលប្រាក់ទុនពីពលរដ្ឋរបស់ក្រុមហ៊ុន EBC តាមរយៈអង្គការ AIF និង ICA នេះ មិនស្របច្បាប់នោះទេ ដោយសារក្រុមហ៊ុននេះមិនមានគម្រោងវិនិយោគជាក់ស្ដែងអាចកំណត់បាននោះទេ។ ស្ថាប័នទាំងនេះថានឹងចាត់វិធានការតាមផ្លូវច្បាប់ចំពោះគម្រោងវិនិយោគមានលក្ខណៈបោកប្រាស់នេះ និងបានណែនាំឲ្យពលរដ្ឋប្ដឹងទៅតុលាការ៕
© រក្សាសិទ្ធិដោយ thmeythmey.com