វេទិកាស្រូវអង្ករ ពិព័រណ៍កសិចំណីអាហារ និងកសិបសុសត្វ ត្រូវរៀបចំក្នុងពេលតែមួយឆ្នាំនេះ

ជាតិ

សេដ្ឋកិច្ច

វេទិកាស្រូវអង្ករ ពិព័រណ៍កសិចំណីអាហារ និងកសិបសុសត្វ ត្រូវរៀបចំក្នុងពេលតែមួយឆ្នាំនេះ

09, May 2017 , 7:33 pm

រូបភាព

ដោយ:

ភ្នំពេញ៖ ព្រឹត្តិការណ៍ចំនួន៤ នឹងត្រូវរៀបចំឡើងក្នុងពេលតែមួយ ដែលរួមមាន វេទិការស្រូវអង្ករកម្ពុជាលើកទី៦, ពិព័រណ៍កសិចំណីអាហារ, ពិព័រណ៍កសិបសុសត្វ និងការប្រកួតមុខម្ហូប។ ព្រឹត្តិការណ៍នេះ នឹងប្រព្រឹត្តទៅនៅថ្ងៃទី១០ ដល់ថ្ងៃទី១២ខែវិច្ឆិកាឆ្នា២០១៧ ។ នេះបើតាមព័ត៌មានដែលផ្សព្វផ្សាយនៅលើទំព័រហ្វេសប៊ុករបស់សហព័ន្ធស្រូវអង្ករកម្ពុជា (CRF) នៅថ្ងៃទី៩ខែឧសភា។

ព្រឹត្តិការណ៍កសិកម្មដ៏ធំមួយនេះ ត្រូវបានរៀបចំឡើងដោយក្រុមហ៊ុន AMB សហការជាមួយសហព័ន្ធស្រូវអង្ករកម្ពុជា និងសហព័ន្ធចុងភៅកម្ពុជា។ វេទិការស្រូវអង្ករកម្ពុជាលើកទី៦ នឹងប្រមូលផ្ដុំអ្នកធ្វើគោលនយោបាយ អ្នកនាំចេញ និងអ្នកផលិតកែច្នៃអង្ករ រួមទាំងអ្នកពាក់ព័ន្ធផ្សេងទៀត ដើម្បីបានជាឱកាសចែករំលែកព័ត៌មាន បទពិសោធន៍ជុំវិញវិស័យស្រូវអង្ករ។

រីឯពិព័រណ៍កសិចំណីអាហារ និងពិព័រណ៍កសិបសុសត្វ ដែលឈានចូលដល់ឆ្នាំទី៣នៃការរៀបចំព្រឹត្តិការណ៍នេះ នឹងបង្ហាញពីព័ត៌មានតម្រូវការទីផ្សារផលិតកសិផលខ្មែរ និងបរិមាណសាច់សត្វផ្គត់ផ្គង់នៅក្នុងស្រុក និងនាំចូល។

បន្ថែមពីនេះ សមាគមភោជនីយដ្ឋានកម្ពុជា និងសមាគមសណ្ឋាគារកម្ពុជា បានត្រៀមខ្លួនចូលរួមព្រឹត្តិការណ៍ខាងលើនេះ។ នេះបើតាម លោក លូ ម៉េង សហប្រធានក្រុមការងាររដ្ឋាភិបាល និងផ្នែកឯកជនស្ដីពីទេសចរណ៍ ដែលបានឲ្យដឹងនៅក្នុងសេចក្ដីជូនដឹងខាងលើនេះ៕