ជាតិ
សេដ្ឋកិច្ច
ក្រុមហ៊ុនជប៉ុនចង់វិនិយោគនៅឧទ្យានជាតិគិរីរម្យ ដើម្បីទាក់ទាញទេសចរវ័យចំណាស់ពីប្រទេសខ្លួន ជប៉ុន (រូបពីក្រសួងពាណិជ្ជកម្ម)
× ភ្នំពេញ៖ ក្រុមហ៊ុនជប៉ុន Vkirirum Resort បានចាប់អារម្មណ៍អភិវឌ្ឍតំបន់អេកូទេសចរណ៍នៅឧទ្យានជាតិគិរីរម្យ ដើម្បីទាក់ទាញភ្ញៀវទេសចរ ពិសេសភ្ញៀវទេសចរជនជាតិជប៉ុន ដែលចូលនិវត្តន៍ឲ្យមកកម្សាន្តក្នុងរយៈពេលវែងនៅរមណីដ្ឋាននេះ។ នេះបើតាមព័ត៌មានដែលផ្សពផ្សាយលើទំព័រហ្វេសប៊ុកក្រសួងពាណិជ្ជកម្ម។
លោក TAKESHI IZUKU ប្រធានក្រុមហ៊ុន Vkirirum Resort បានជួបរដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្ដិ នៅថ្ងៃទី៩ខែឧសភា ដើម្បីពិភាក្សាលើសំណើសុំអភិវឌ្ឍន៍រមណីយដ្ឋានអេកូទេសចរណ៍នៅឧទ្យានជាតិគិរិរម្យ។ ជាការឆ្លើយតប លោក ប៉ាន សូរស័ក្ដិ បានស្វាគមន៍លើគម្រោងរបស់ក្រុមហ៊ុនជប៉ុនមួយនេះ។ លោកឲ្យដឹងថា ឧទ្យានជាតិគិរីរម្យនេះ ត្រូវបានសព្វព្រះរាជហឫទ័យដឹកនាំអភិវឌ្ឍន៍ដោយព្រះបរមរតនៈកោដ្ឋសម្ដេចព្រះនរោត្តមសីហនុ ដោយសហការជាមួយរដ្ឋាភិបាលជប៉ុន តាំងពីចន្លោះទសវត្សរ៍៦០ ទៅទសវត្សរ៍ ៧០ មកម្លេះ។
រដ្ឋមន្ត្រីក្រសួងពាណិជ្ជកម្មរូបនេះ បានស្នើឲ្យក្រុមហ៊ុននេះរៀបចំផែនការមេស្ដីពីការថែរក្សាបរិស្ថាន និងការអភិរក្សសត្វព្រៃឲ្យស្របតាមបទស្ថានស្ដង់ដារ ដើម្បីស្នើសុំការគាំទ្របន្ថែមពីស្ថាប័នពាក់ព័ន្ធ ពិសេសប្រមុខរដ្ឋាភិបាលកម្ពុជា។
យោងតាមរបាយការណ៍របស់ក្រសួងទេសចរណ៍ កម្ពុជាបានស្រូបទាញភ្ញៀវទេសចរជប៉ុនចំនួនជាង ១៩ម៉ឺននាក់ ដែលឈរនៅលេខរៀងទី៧ ក្នុងចំណោមទេសចរអន្តរជាតិមកកម្ពុជាជាង ៥លាននាក់ នៅក្នុងឆ្នាំ២០១៦ ។ ហើយកាលពីពេលថ្មីៗនេះ អនុរដ្ឋមន្ត្រីការបរទេសជប៉ុន បានជួបរដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ លោក ប្រាក់ សុខុន ដើម្បីជម្រាបពីគម្រោងបើកស្ថានកុងស៊ុលនៅខេត្តសៀមរាប ដើម្បីឆ្លើយតបនឹងកំណើនទេសចរជប៉ុនមកកម្ពុជា៕
© រក្សាសិទ្ធិដោយ thmeythmey.com