ទំហំពាណិជ្ជកម្មក្នុងតំបន់សេដ្ឋកិច្ចពិសេសនៅកម្ពុជាមានតម្លៃ ២,៨ ពាន់លានដុល្លារនៅឆ្នាំ២០១៦

ជាតិ

សេដ្ឋកិច្ច

ទំហំពាណិជ្ជកម្មក្នុងតំបន់សេដ្ឋកិច្ចពិសេសនៅកម្ពុជាមានតម្លៃ ២,៨ ពាន់លានដុល្លារនៅឆ្នាំ២០១៦

13, May 2017 , 8:59 am

រូបភាព

តំបន់សេដ្ឋកិច្ចពិសេស

ដោយ:

ភ្នំពេញ៖ ទំហំទឹកប្រាក់ជួញដូរពាណិជ្ជកម្មរបស់តំបន់សេដ្ឋកិច្ចពិសេសនៅកម្ពុជាមានចំនួន ២,៨៣ ពាន់លានដុល្លារ កើនឡើង ១,២ភាគរយ បើធៀបនឹងឆ្នាំ២០១៥ ។ នេះបើតាមរបាយការណ៍ដែលលើកឡើងដោយ លោក វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ នៅក្នុងពិធីសម្ពោធតំបន់សេដ្ឋកិច្ចពិសេស ឃែរី វើលប្រ៊ីដ នៅថ្ងៃទី៩ខែឧសភា។

បើតាម លោក វង្សី វិស្សុត ចាប់តាំងពីការបង្កើតឲ្យតំបន់សេដ្ឋកិច្ចពិសេសនៅឆ្នាំ២០០៥ រហូតមកដល់បច្ចុប្បន្ននេះ កម្ពុជាមានតំបន់សេដ្ឋកិច្ចពិសេសសនៅទូទាំងប្រទេសចំនួន ៤៥ កន្លែង។ ក្នុងចំណោមនេះ តំបន់សេដ្ឋកិច្ចពិសេសចំនួន ១២ កំពុងមានដំណើរការយ៉ាងសកម្ម ដែលមានក្រុមហ៊ុនជាង ២៦០ វិនិយោគក្នុងតំបន់សេដ្ឋពិសេសទាំងនេះ និងបានផ្ដល់ការងារជាង ៨,៦ម៉ឺននាក់ ។ ចំនួននេះមិនទាន់បូកបញ្ចូលការងារថ្មីពី ២ម៉ឺន ទៅ២,៥ម៉ឺននាក់ទៀត ដែលតំបន់សេដ្ឋកិច្ចពិសេសឃែរី វើលប្រ៊ីដ នឹងបង្កើតជូនពលរដ្ឋ។

លោក វង្សី វិស្សុត បន្ថែមថា ទំហំពាណិជ្ជកម្មក្នុងតំបន់សេដ្ឋកិច្ចពិសេសជារួមបានឈានដល់ចំនួន ២,៨៣ពាន់លានដុល្លារនេះ ដោយក្នុងនោះការនាំចូលមានចំនួន ១,៤១ ពាន់លានដុល្លារ និងការនាំចេញមានតម្លៃ ១,៤២ ពាន់លានដុល្លារ។ លោកបន្តយ៉ាងដូច្នេះទៀតថា៖«ខ្ញុំមានសុទិដ្ឋិនិយមថា ទំហំពាណិជ្ជកម្មនេះ នឹងបន្តកើនឡើងជាបន្តបន្ទាប់ នៅឆ្នាំខាងមុខៗទៀត»។

យោងតាមរបាយការណ៍របស់ក្រសួងពាណិជ្ជកម្ម ទំហំពាណិជ្ជកម្មសរុបរបស់កម្ពុជាមានតម្លៃ ២១,៩៣ ពាន់លានដុល្លារ នៅឆ្នាំ២០១៦ កើនឡើង ៤,១៨ភាគរយ បើធៀបនឹងឆ្នាំ២០១៥ ។ ក្នុងនោះ ការនាំចេញមានទំហំប្រាក់ ៩,៨៦ ពាន់លានដុល្លារ ខណៈការនាំចូលមានចំនួនជាង ១២ ពាន់លានដុល្លារ៕