ជាតិ
អ្នកនយោបាយបារាំងម្នាក់ ចំអកលោក ម៉ាក្រុង ថា មានឥរិយាបថដូច «ខ្មែរ» លោក Eric Woerth និយាយចំអកលោក ម៉ាក្រុងថា មានចរិតមិនល្អដូចខ្មែរ។ រូបថត Europe 1
× ក្នុងកម្មវិធីពិភាក្សាមួយដែលរៀបចំដោយទូទស្សន៍ Europe 1 កាលពីថ្ងៃទី១០ ខែឧសភា លោក Eric Woerth អ្នកនយោបាយបារាំងមកពីគណបក្សសាធារណរដ្ឋ បាននិយាយប្រៀបធៀបលោកប្រធានាធិបតីជាប់ឆ្នោតថ្មី លោក អេម៉ានុយអែល ម៉ាក្រុង ថាមានឥរិយាបថដូចជា «ខ្មែរ» ។ នេះជាការប្រៀបធៀបបែបអវិជ្ជមាន។
«លោក អេម៉ានុយអែល ម៉ាក្រុង មិនមានចិត្តល្អឡើយ គាត់ជាមនុស្សពិបាកខ្លាំងណាស់ […] ខ្ញុំសង្កេតឃើញ គាត់មានឥរិយាបថមិនសមរម្យ ឥរិយាបថជាខ្មែរ»។ នេះជាការលើកឡើងរបស់លោក Eric Woerth ដែលជាអតីតរដ្ឋមន្ត្រីទទួលថវិកា និងបន្ទាប់មកផ្នែកការងារក្រោមរដ្ឋាភិបាលលោក François Fillon។
លោក Eric Woerth អាយុ៦១ឆ្នាំ ដែលបច្ចុប្បន្នជាអភិបាលក្រុង Chantilly ផងដែរនោះ បានកត់សម្គាល់កាយវិការរបស់លោក អេម៉ានុយអែល ម៉ាក្រុង នៅពេលនិយាយទៅកាន់លោក Manuel Valls ដែលជានាយករដ្ឋមន្ត្រី។ «ខ្ញុំកម្ចេចអ្នក ខ្ញុំបំផ្លាញអ្នក […] ដូច្នេះឈប់និយាយអ្វីដែលល្អ និងអស្ចារ្យ»។ នេះជាសម្តីរបស់លោក Eric Woerth ក្នុងន័យសម្តៅទៅកាន់លោក ម៉ាក្រុង។
ទោះបីជាលោក Eric Woerth និយាយពាក្យថា «ខ្មែរ» ក៏ដោយ ប៉ុន្តែ Europe 1 តាមរយៈគេហទំព័ររបស់ខ្លួន បានកាត់យល់ថា អ្នកនយោបាយរូបនោះ ចង់សំដៅលើ «ខ្មែរក្រហម»។ សម្តីរបស់លោក Eric Woerth បានបង្កការខឹងសម្បារយ៉ាងខ្លាំងពីសំណាក់សហគមន៍ខ្មែរ-បារាំង រួមទាំងជនជាតិបារាំងផ្ទាល់។ អ្នកខ្លះបានរិះគន់ធ្ងន់ធ្ងរ លោក Woerth មិនទាន់ស្គាល់ខ្មែរច្បាស់នោះឡើយ ហើយការលើកឡើងបែបនេះ ជាការមើលងាយជាតិខ្មែរទាំងមូល៕
Éric Woerth : Macron a "un comportement de... par Europe1fr
Tag:
អេម៉ានុយអែល ម៉ាក្រុង
Eric Woerth
© រក្សាសិទ្ធិដោយ thmeythmey.com