កំពែងថ្មបាយក្រៀមនៃប្រាសាទបន្ទាយក្តីកំពុងជួសជុល

ជាតិ

កំពែងថ្មបាយក្រៀមនៃប្រាសាទបន្ទាយក្តីកំពុងជួសជុល

14, May 2017 , 10:59 am

រូបភាព

ដោយ: អុីសា រ៉ហានី (Isa Rohany)

សៀមរាប៖ ប្រាសាទបន្ទាយក្តី ជាប្រាសាទមួយស្ថិតក្នុងបរិវេណវង់តូចនៃរមណីយដ្ឋានអង្គរ។ ដូចទៅនឹងប្រាសាទផ្សេងៗទៀតដែរ បន្ទាយក្តីរងការបាក់បែកជាច្រើនកន្លែង ក្នុងនោះមានទាំងតួប្រាសាទ និងកំពែងផង។ល។ ដោយសារកំពែងនៃផ្នែកខ្លះ បានដួលរលំ និងបង្កជាហានិភ័យ បច្ចុប្បន្នវាបាននិងកំពុងជួសជុលឡើងវិញ ក្នុងបំណងលើកតម្លៃនៃសោភណ្ឌភាពឡើងវិញ។

កំពែងប្រាសាទបន្ទាយក្តី ដែលមានទីតាំងស្ថិតនៅទិសពាយព្យ (ជាប់កំពែងប្រាសាទតាព្រហ្ម) បាននិងកំពុងជួសជុលឡើងវិញដោយអ្នកជំនាញនៃអាជ្ញាធរជាតិអប្សរា។ តាមអ្នកជំនាញ កំពែងនេះមានការពុកផុយខ្លាំង ទ្រៀត និងបានដួលរលំ ដែលទាមទារឲ្យមានការសង្គ្រោះជាបន្ទាន់។

លោក ម៉ៅ សុខនី អ្នកជំនាញអភិរក្សប្រាសាទក្នុងឧទ្យានអង្គរបានឲ្យដឹងថា កំពែង ឬជញ្ជាំងប្រាសាទបន្ទាយក្តី ដែលកំពុងជួសជុលមានប្រវែង៥,៥ម៉ែត្រ ហើយអ្នកជំនាញបានរើ និងធ្វើកំណាយបាតក្រោមឡើងវិញ ដើម្បីពង្រឹងគ្រឹះ ព្រោះថាគ្រឹះខ្សោយមិនអាចទ្រជញ្ជាំងថ្មបាន។ លោកបញ្ជាក់ថា ដើម្បីធានាថាជញ្ជាំងមានភាពរឹងមាំ គឺត្រូវរៀបបាតឲ្យជិតល្អ និងប្រើបច្ចេកទេសត្រឹមត្រូវទៅតាមបុរាណវិទ្យា។

ក្នុងដំណើរការជួសជុលនេះដែរ អ្នកជំនាញបានប្រើប្រាស់ថ្មចាស់ ដោយបានកាត់ ជ្រៀក ធ្វើយ៉ាងណាយកមកប្រើប្រាស់ឲ្យអស់លទ្ធភាព មុននឹងយកថ្មថ្មីមកជំនួស។ តាមគម្រោងជួសជុលនេះ នឹងបញ្ចប់នៅពាក់កណ្តាលឆ្នាំ២០១៧នេះ។

ហេតុផលដែលបណ្តាលឲ្យកំពែងប្រាសាទបន្ទាយក្តីនៅជ្រុងភាគពាយព្យរងការខូចខាតប្រមាណជាង៥ម៉ែត្រនោះ ដោយសារកត្តាមួយចំនួន ដោយក្នុងនោះរួមមានកត្តាអាកាសធាតុ ដោយថ្មបាយក្រៀមមានការពុកផុយខ្លាំង បញ្ហាសត្វល្អិតចោះថ្ម បញ្ហាទឹកគឺមានទឹកហូរចាក់ចូលទៅក្នុងបរិវេណប្រាសាទពេលមានភ្លៀងធ្លាក់ម្តងៗ។ នេះបើតាមការបញ្ជាក់របស់លោក ម៉ៅ សុខនី។

គួរបញ្ជាក់ថា កំពែងប្រាសាទបន្ទាយក្តីមានកម្ពស់ ៣,៧០ម៉ែត្រ សង់ពីថ្មបាយក្រៀម។ ស្ថានភាពបច្ចុប្បន្ននៃកំពែងនេះមានការខូចខាតច្រើន ហើយការជួសជុលក៏មិនទាន់មានដុំកំភួនដែរ។ កន្លែងដែលអ្នកជំនាញកំពុងធ្វើការជួសជុលនេះ គឺជាការជួសជុលដំណាក់កាលទី២ បន្ទាប់ពីបារាំង ដែលការជួសជុលនោះឃើញមានប្រើប្រាស់ស៊ីម៉ងត៍ច្រើន៕