កីឡាជាតិ
ជាតិ
លោក អេ ភូថង ឡើងសង្វៀនប្រកួតដើម្បីយកតម្លៃខ្លួនជួយដល់មន្ទីរពេទ្យគន្ធបុបា្ផនៅដើមខែមិថុនា លោក អេ ភូថង បានចូលរួមវគ្គបណ្តាះបណ្តាលស្តីពីការដឹកនាំនឹងគ្រប់គ្រងរបស់គ្រូបង្វឹកដល់កីឡាករ កាលពីពេលថ្មីៗកន្លងមកនេះ
× ក្រោយបាត់មុខនៅលើសង្វៀនប្រកួតអស់រយៈពេលជិត១០ឆ្នាំអតីតកីឡាករជើងខ្លាំងរបស់កម្ពុជា អេ ភូថង នឹងឡើងសង្វៀនប្រកួតម្តងទៀតនាដើមខែមិថុនា ខាងមុខនេះ នៅលើសង្វៀន ភីអិនអិន។ សម្រាប់ការឡើងសង្វៀនលើកនេះគ្រូប្រដាល់វ័យ៤៣ឆ្នាំរូបនេះ ត្រូវជួបប្រកួត៣ទឹកជាមួយគ្រូបង្វឹកប្រដាល់ថៃ [ដែលមិនទាន់បង្ហើបឈ្មោះ] លើប្រភេទទម្ងន់១០០គីឡូក្រាម។ លោក អេ ភូថង នឹងយកថវិកាដែលបានមកពីការឡើងសង្វៀនរបស់ខ្លួនទៅបរិច្ចាគជូនមន្ទីរពេទ្យគន្ធបុប្ផា ដើម្បីជួយដល់កុមារកំពុងសម្រាកព្យាបាលនៅទីនោះ។
នាថ្ងៃទី៤ ខែមិថុនា ខាងមុខនេះ អតីតកីឡាករជើងខ្លាំងរបស់កម្ពុជាជង្គង់ហោះកែងឆេះ អេ ភូថង នឹងឡើងសង្វៀនប្រកួតរបស់ ភីអិនអិន ដើម្បីយកថវិកាដែលបានមកពីការឡើងសង្វៀនធ្វើជាមូលនិធិសប្បុរសធម៌ជួយដល់មន្ទីរពេទ្យគន្ធបុប្ផា។ សម្រាប់ការឡើងសង្វៀនលើកនេះ អេ ភូថង ត្រូវជួបប្រកួតបីទឹកលើប្រភេទទម្ងន់១០០គីឡូក្រាម តែមិនទាន់ដឹងជួបជាមួយកីឡាកររូបណានោះទេ គ្រាន់តែដឹងថា ជាជនជាតិថៃ។ នេះបើយោងតាមលោក អេ ភូថង។
គ្រូបង្វឹកវ័យ៤៣ឆ្នាំរូបនេះបានរៀបរាប់ថា តាំងពីលោកចូលប្រឡូកក្នុងវិស័យកីឡាប្រដាល់ គឺមិនធ្លាប់ធ្វើអ្វីមួយដើម្បីចូលរួមចំណែកក្នុងអំពើមនុស្សធម៌នោះទេ ពោលគឺនេះជាលើកទីមួយសម្រាប់អតីតកីឡាករជើងខ្លាំងរូបនេះ។ តែយ៉ាងណា លោកបានអះអាងថា លោកចង់ធ្វើសកម្មភាពបែបនេះជាច្រើនលើករួចមកហើយ តែពុំមានស្ថាប័នណាមួយអនុញ្ញាតឲ្យរៀបចំ។
«ទោះបីឥឡូវខ្ញុំធាត់ដុះក្បាល់ពោះ តែខ្ញុំចង់ធ្វើអ្វីមួយជួយដល់សង្គម ដូច្នេះដោយសារមិនដឺងថា មានវិធីសាស្ត្រអ្វីជួយដល់ក្មេងៗមានតែរៀបចំកម្មវិធីឲ្យខ្ញុំបានឡើងប្រកួត ហើយថវិកាឧបត្ថម្ភរបស់យើង យើងប្រគល់ជូនមន្ទីរពេទ្យគន្ធបុប្ផាទៅ ដើម្បីជួយដល់ក្មេងៗនៅតាមខេត្ត។ មិនថាកូនគេ ឬកូនខ្ញុំនោះទេនៅពេលជួបបញ្ហាខ្វះខាត ត្រូវតែស្វែងរកកន្លែងណាដែលព្យាបាលមិនអស់លុយ ដូច្នេះខ្ញុំគិតថា ដើម្បីជួយដល់ក្មេងៗទាំងនោះមានតែខ្ញុំធ្វើតាមរយៈមន្ទីរគន្ធបុបា្ផនោះទេ»។ នេះជាសម្តី លោក អេ ភូថង។
ទោះបីការប្រកួតនេះធ្វើឡើងក្រោមរូបភាពមនុស្សធម៌ តែអតីតកីឡាករដែលមានដើមកំណើតមកពីខេត្តកោះកុងរូបនេះអះអាងថា លោកនឹងប្រកួតឲ្យអស់ពីសមត្ថភាពមិនធ្វើឲ្យទស្សនិកជនខកចិត្តនោះទេ។ លោកបានបន្ថែមថា ទោះបីមានអាយុច្រើន ហើយរាងធាត់ជាងមុខខ្លាំងក៏ដោយ ប៉ុន្តែបច្ចេកទេស និងកម្លាំងមិនថមថយនោះទេ។
គួរបញ្ជាក់ថា លោក អេ ភូថង បានចូលប្រឡូកក្នុងវិស័យកីឡាប្រដាល់គុនខ្មែរតាំងពីអាយុ៨ឆ្នាំ ហើយបានឡើងសង្វៀនប្រកួតនៅអាយុ១២ឆ្នាំ គិតត្រឹមឆ្នាំ២០០៨ ដែលលោកឈប់ឡើងសង្វៀន កីឡាកររូបនេះធ្លាប់ឡើងសង្វៀនប្រកួតបានចំនួនជាង៥០០ដង។ បច្ចុប្បន្នលោកជាមន្ត្រីចៅក្រម អាជ្ញាកណ្តាល និងជាគ្រូបង្វឹកកីឡាករជម្រើសជាតិរបស់សហព័ន្ធកីឡាប្រដាល់គុនខ្មែរ ហើយក៏ជាស្ថាបនិកក្លិបប្រដាល់ អេ ភូថង កីឡាផងដែរ។
អតីតកីឡាករជើងខ្លាំងរបស់កម្ពុជារូបនេះ បានសំណូមពរដល់ទស្សនិកជន ក៏ដូចជាសប្បុរសជនជូនរួមទស្សនាការប្រកួតនេះឲ្យបានច្រើនកុះករ ជាពិសេសចូលរួមចំណែកបរិច្ចាគថវិកា ដើម្បីចូលចំណែកជួយដល់កុមារក្រីក្រនៅតាមជនបទតាមរយៈមន្ទីរពេទ្យគន្ធបុប្ផា។ លោកបានបញ្ជាក់ថា អ្នកទស្សនាមិនត្រឹមតែបានទស្សនាការប្រកួតដ៏ជក់ចិត្តប៉ុណ្ណោះទេ ថែមទាំងបានចូលរួមចំណែកក្នុងអំពើមនុស្សធម៌ទៀតផង៕
© រក្សាសិទ្ធិដោយ thmeythmey.com