Edinson Cavani ខ្សែប្រយុទ្ធក្រុម Paris Saint-Germain ឈ្នះពានកីឡាករល្អដាច់គេប្រចាំឆ្នាំ២០១៧ នៃលីកកំពូលបារាំង (French players' player of the year) ខណៈខ្សែប្រយុទ្ធវ័យក្មេង Kylian Mbappe មកពីក្រុម AS Monaco ឈ្នះពានកីឡាករក្រោមអាយុ២១ឆ្នាំល្អដាច់គេ (Best Young Player in French football) ។
ខ្សែប្រយុទ្ធអន្តរជាតិអ៊ុយរូហ្គាយ វ័យ៣០ឆ្នាំរូបនេះត្រូវបានបោះឆ្នោតគាំទ្រជាកីឡាករបាល់ទាត់ឆ្នើមដាច់គេប្រចាំឆ្នាំ២០១៧នៃលីកក្នុងប្រទេសបារាំង។ Cavani រកគ្រាប់បាល់បញ្ចូលទីបាន៣៥គ្រាប់សម្រាប់ការប្រកួតនៅក្នុងលីករដូវកាលនេះ បន្ទាប់ពីការចាកចេញរបស់ដៃគូចាស់ Zlatan Ibrahimovic នៅដើមរដូវកាលកន្លងទៅ។ ការចាកចេញរបស់ Zlatanទៅចូលរួមជាមួយ Manchester United ធ្វើឲ្យ Cavani ត្រូវបានផ្លាស់ទៅតំបន់ប្រយុទ្ធគោលរបស់ PSG ដែលធ្វើឲ្យរូបគេអាចរកគ្រាប់បាល់បានច្រើនបែបនេះ។
ក្រោយរកបាន៥០គ្រាប់ពីគ្រប់ការប្រកួត និងសល់១ប្រកួតទៀតក្នុងលីកកំពូលបារាំង អតីតសមាជិកក្រុម Napoli នេះក៏អាចមានឱកាសច្រើនដើម្បីបំបែកំណត់ត្រាចាស់របស់ Zlatan ដែលរកគ្រាប់បាល់សរុបបាន៥០គ្រាប់កាលពីរដូវកាលមុនផងដែរ។
រីឯខ្សែប្រយុទ្ធវ័យក្មេងសញ្ជាតិបារាំងរបស់ក្រុម Manaco កីឡាករ Kylian Mbappe ដែលទទួលបានជ័យលាភីកីឡាករវ័យក្មេងក្រោមអាយុ២១ឆ្នាំល្អបំផុតប្រចាំឆ្នាំ២០១៧ បានបង្ហាញទំរង់លេងយ៉ាងល្អឥតខ្ចោះក្នុងរដូវកាលនេះ។ ត្រឹមវ័យ១៨ឆ្នាំ Mbappe អាចរកគ្រាប់បាល់បាន២៤គ្រាប់ និងបញ្ជូនបាល់ឲ្យមិត្តរួមក្រុម (Assist) ៨គ្រាប់ ព្រមទាំងជួយក្រុមដែលមានភាគរយច្រើនដើម្បីលើកពានលីកកំពូលបារាំង France - Ligue 1 រដូវកាលនេះ អាចឈានដល់វគ្គពាក់កណ្តាលផ្តាច់ព្រ័ត្រ UEFA Champion League ថែមទៀតផង។