លោក រ័ត្ន សុខន ជំរុញឲ្យកីឡាករត្រូវចេះសាមគ្គីគ្នា កុំមើលងាយគ្នា និងកុំមានអំនួត

កីឡាជាតិ

ជាតិ

លោក រ័ត្ន សុខន ជំរុញឲ្យកីឡាករត្រូវចេះសាមគ្គីគ្នា កុំមើលងាយគ្នា និងកុំមានអំនួត

18, May 2017 , 8:19 am

រូបភាព

ដោយ:

ទីបំផុតសហព័ន្ធកីឡាវ៉ូវីណាមកម្ពុជា បានបញ្ចប់ភាពអសកម្មរបស់ខ្លួន បន្ទាប់ពីសហព័ន្ថនេះបានឯកភាពគ្នារៀបចំមហាសន្និបាតបញ្ចប់អាណត្តិទី២ និងដាក់ទិសដៅអាណត្តិទី៣កាលពីព្រឹកថ្ងៃទី១៧ ខែឧសភា នៅទីស្នាក់ការគណៈកម្មាធិការជាតិអូឡាំពិកកម្ពុជា(NOCC)។ លោក រ័ត្ន សុខន ត្រូវបានសមាជិកឯកភាពបោះឆ្នោតតាមរយៈការលើកដៃឲ្យបន្តដឹកនាំជាប្រធានសម្រាប់អាណតិ្តថ្មី។ ក្រោយកោតសរសើរពីភាពជោគជ័យក្នុងអាណត្តិចាស់ លោកប្រធានថ្មីរូបនេះ ជំរុញឲ្យសមាជិកទាំងអស់ត្រូវចេះឯកភាពគ្នា ជាពិសេសកីឡាករត្រូវចេះសាមគ្គីគ្នា ស្រលាញ់គ្នា និងកុំមានការរើសអើងនៅក្នុងក្រុម។

ក្រោយសមាជិកប្រតិបត្តិបោះឆ្នោតតាមរយៈការលើកដៃឲ្យបន្តដឹកនាំជាប្រធានសហព័ន្ធកីឡាវ៉ូវីណាមកម្ពុជាក្នុងអាណត្តិថ្មី(២០១៧-២០២១) លោក រ័ត្ន សុខន មិនបានទាមទារអ្វីច្រើននោះឡើយ គឺគ្រាន់តែជំរុញឲ្យសមាជិកប្រតិបត្តិអាណត្តិថ្មីចេះឯកភាពគ្នា ជាពិសេសកីឡាករត្រូវចេះសាមគ្គីគ្នា និងចេះស្រលាញ់គ្នាដូចបងនិងប្អូន។ លោក បានហាមផ្តាច់កុំឲ្យមានការប្រមាទមើលងាយគ្នានៅក្នុងក្រុម ព្រោះលោកគិតថា ភាពល្បីល្បារបស់កីឡាមួយគឺវាស្រ័យលើកីឡាករ សហព័ន្ធ និងថ្នាក់ដឹកនាំកីឡា។

អនុប្រធានសហព័ន្ធកីឡាវ៉ូវីណាមពិភពលោករូបនេះទទួលស្គាល់ថា លទ្ធផលកន្លងមកវ៉ូវីណាមធ្វើបានល្អហើយ ប៉ុន្តែមិនទាន់ដល់កម្រិតដែលលោក និងក្រសួងអប់រំ យុវជន និងកីឡា ក៏ដូចជាគណៈកម្មាធិការជាតិអូឡាំពិកកម្ពុជាចង់បាន។ លោកបានអះអាងថា ប្រសិនបើ៦ឆ្នាំទៅមុខកីឡាវ៉ូវីណាមនៅតែមានបញ្ហា មិនមានការរីកចម្រើនលោកនឹងដកថយពីកីឡាមួយនេះ។

លោកបានបញ្ជាក់ថា៖«ដណ្តើមមេដាយមាសបានដោយសារកីឡាករ កីឡាករល្អដោយសារគ្រូ រីឯគ្រូល្អដោយសារការដឹកនាំរបស់សហព័ន្ធ ហើយសហព័ន្ធដំណើរការល្អដោយសារគោលនយោបាយរបស់ក្រសួង និង NOCC។ អ៊ីចឹងកីឡាករត្រូវសហការគ្នា ស្រលាញ់រាប់អានគ្នាដូចគ្រួសារតែមួយ ហើយអ្នកចាស់កុំមើលងាយអ្នកថ្មី អ្នកពូកែកុំមើលងាយអ្នកអន់ រីឯអ្នកដណ្តើមបានមេដាយច្រើនមានលុយច្រើនកុំអំនួតលើខ្លួនឯង»។

ក្រោយរងការព្យួរសមាជិកភាពពីថ្នាក់ដឹកនាំ NOCC ដោយសារមិនមានការឯកភាពផ្ទៃក្នុងអស់មួយរយៈរួចមក នៅព្រឹកថ្ងៃទី១៧ ខែឧសភា នេះ សហព័ន្ធកីឡាវ៉ូវីណាមកម្ពុជាបានឯកភាពរៀបចំមហាសន្និបាតបញ្ចប់អាណត្តិទីចាស់ ដើម្បីបញ្ចប់ភាពអសកម្ម និងដាក់ទិសដៅអភិវឌ្ឍន៍កីឡាវ៉ូវីណាមសម្រាប់អាណត្តិថ្មី។

សម្រាប់អាណត្តិថ្មីនេះដែរ សហព័ន្ធកីឡាវ៉ូវីណាមកម្ពុជាបានដាក់ចេញនូវគោលអនុវត្តន៍របស់ខ្លួនមួយចំនួនដូចជា ជំរុញ និងលើកទឹកចិត្តស្ត្រី ក៏ដូចជាយុវជនឲ្យចូលរួមហ្វឹកហាត់កីឡាវ៉ូវីណាមឲ្យកាន់តែច្រើន។ ពង្រឹង និងពង្រីកក្លិបនៅតាមបណ្តាខេត្តឲ្យបានច្រើន ជាពិសេសបង្កើនការប្រជុំ និងយកចិត្តទុកដាក់ឲ្យច្រើនជាងមុខជាមួយក្លិប-សមាគមដែលជាសមាជិក និងបើកវគ្គបណ្តុះបណ្តាលគ្របង្វឹក ចៅក្រម អាជ្ញាកណ្តាលកម្រិតជាតិ និងអន្តរជាតិឲ្យបានច្រើន។ លើសពីនេះ រៀបចំបណ្តុះបណ្តាលថ្នាលឲ្យបានច្រើន ដើម្បីត្រៀមស៊ីហ្គេមនាឆ្នាំ២០២៣ ដែលកម្ពុជាធ្វើជាម្ចាស់ផ្ទះ។

ក្រោយឆ្លងកាត់ការបោះឆ្នោតដោយការលើកដៃនៅទីស្នាក់ការ NOCC សមាជិកប្រតិបត្តិអាណត្តិថ្មីរបស់សហព័ន្ធកីឡាវ៉ូវីណាមកម្ពុជារួមមាន៖ លោក រ័ត្ន សុខន ប្រធាន, លោក វ៉ាត់ ចំរើន ប្រធានកិត្តិយស, លោក អ៊ូ រតនា អនុប្រធានទី១, លោក រស់ មុនិន្ទ អនុប្រធានទី២, លោក ហុក ឈាងគីម អនុប្រធានទី៣, លោក កែវ ហុកលី អគ្គលេខាធិការ, លោក ទេព ជីវសុខុម និងលោក ជុត សាម៉ុន អគ្គលេខាធិការរង, អ្នកស្រី ប៉ាល់ ឆរស្មី អគ្គហិរញ្ញិក និងលោក ស៊ុម វណ្ណា ជាអគ្គហិរញ្ញិករង។ ក្រៅពីនេះក៏មានសមាជិកចំនួន៤រូបទៀតផងដែរ រួមមាន លោក សល់ មករា, លោក លី ពិជ័យ, លោក ឯក សុធារ័ត្ន និងលោក ម៉េង សុខលេង៕