អ្នកស្រឡាញ់ភេទដូចគ្នានៅកម្ពុជា មានជាង៦ពាន់គូ

ជាតិ

សង្គមជាតិ

អ្នកស្រឡាញ់ភេទដូចគ្នានៅកម្ពុជា មានជាង៦ពាន់គូ

17, May 2017 , 8:49 pm

រូបភាព

ដោយ:

ភ្នំពេញ៖ អង្គការអនាគតកម្ពុជាអាស៊ាន ដែលធ្វើការងារលើកស្ទួយសិទ្ធិអ្នកស្រឡាញ់ភេទដូចគ្នា បានបង្ហាញរបាយការណ៍ថា នៅកម្ពុជាបច្ចុប្បន្ន មានអ្នកស្រឡាញ់ភេទដូចគ្នា រយៈពេល១០ឆ្នាំចុងក្រោយនេះ កើនឡើងជាង៦ពាន់គូ ហើយពួកគេភាគច្រើនរងការរើសអើងយ៉ាងខ្លាំងពីសំណាក់សាច់ញាតិ និងអ្នកនៅជុំវិញខ្លួន។

លោក ស្រ៊ុន ស្រ៊ន ប្រធានអង្គការអនាគតយុវជនកម្ពុជាអាស៊ាន បានពន្យល់ថា បច្ចុប្បន្ន អ្នកស្រឡាញ់ភេទដូចគ្នា ត្រូវបានឪពុកម្តាយបំបែកបំបាក់ ដោយបង្ខំឲ្យរៀបការជាមួយមនុស្សដែលពួកគេមិនស្រឡាញ់។ ការបង្ខំនេះ គឺជាសម្ពាធយ៉ាងខ្លាំងចំពោះអ្នកស្រឡាញ់ភេទដូចគ្នា។

ថ្លែងក្នុងកិច្ចពិភាក្សាស្វែងរកការគាំទ្រសប្តាហ៍មោទនភាព និងទិវាអន្តរជាតិប្រឆាំងការរើសអើងអ្នកស្រឡាញ់ភេទដូចគ្នានៅកម្ពុជានៅព្រឹកនេះ លោក ស្រ៊ុន ស្រ៊ន បញ្ជាក់យ៉ាងដូច្នេះថា៖«អ្នកស្រឡាញ់ភេទដូចគ្នា ច្រើនមានការរើសអើងពីឪពុកម្តាយ ដូចជា នៅខេត្តក្រចេះ កំពង់ធំ ស្ទឹងត្រែង គឺឪពុកម្តាយបានចាប់ចងឃុំកូន៣ថ្ងៃ នាំកូនទៅស្រោចទឹក និងបញ្ជូនកូនទៅព្យាបាលនៅវៀតណាមជាដើម ដោយឪពុកម្តាយយល់ថា កូននោះ គឺជាមនុស្សឆ្កួត»។

របាយការណ៍របស់មជ្ឈមណ្ឌលសិទ្ធិមនុស្សកម្ពុជា(CCHR)ស្តីពី៖«ការរើសអើងលើអ្នកប្តូរភេទជាស្ត្រីនៅតាមទីប្រជុំជននៅកម្ពុជា» ដែលចេញផ្សាយកាលខែកញ្ញា ឆ្នាំ២០១៦ បានរកឃើញថា អ្នកផ្តល់សម្ភាសដែលជាអ្នកប្តូរភេទជាស្ត្រីចំនួន ៩២% ធ្លាប់ទទួលរងការបំពានតាមរយៈពាក្យសម្តី ៤៣% បំពានលើរូបរាងកាយ និង៣១% រងការបំពានផ្លូវភេទ នៅពេលដើរនៅតាមផ្លូវ។

របាយការណ៍ ដដែល រកឃើញថា ៤២,៨៦% នៃអ្នកប្តូរភេទជាស្ត្រី រងការរំលោភបំពានលើរូបរាងកាយនៅទីសាធារណៈ ខណៈជាង៧០% បានអះអាងថា អ្នកប្តូរភេទមួយចំនួន ត្រូវបាននគរបាលចាប់ខ្លួន ដោយសារតែអត្តសញ្ញាណយែនឌ័ររបស់គាត់។ របាយការណ៍ដដែលនេះ ក៏រកឃើញថា អ្នករកស៊ីផ្លូវភេទ ៥៧,១៤% ដែលជាអ្នកប្តូរភេទ បាននិយាយថា ពួកគេត្រូវបានគេបដិសេធផ្នែកការងារ បើធៀបនឹងអ្នកប្តូរភេទដែរ តែមិនរកស៊ីផ្លូវភេទ មានត្រឹមត្រូវ ២០,៧៣%។

ទន្ទឹមគ្នានេះដែរ របាយការណ៍របស់មជ្ឈមណ្ឌលសិទ្ធិមនុស្សកម្ពុជា កាលពីខែធ្នូ ឆ្នាំ២០១៥ បានរកឃើញថា ៦២,៧១% នៃអ្នកស្រឡាញ់ភេទដូចគ្នា បានរងការសម្លុតប្រមាថអំឡុងពេលនៅក្នុងសាលារៀន។ ការសម្លុតនេះ គឺត្រូវបានប្រព្រឹត្តដោយសិស្ស និងគ្រូបង្រៀន។ របាយការណ៍ដដែល បានសរសេរថា អ្នកស្រឡាញ់ភេទដូចគ្នាដែលបានបង់ការសិក្សាដោយសារការសម្លុត មាន ១២,៨២%។ ពួកគេ បានលើកឡើងថា ការបោះបង់ការសិក្សានេះ គឺដោយសារនិន្នាការភេទ និងអត្តសញ្ញាណយែនឌ័ររបស់ខ្លួន។

ការស្ទង់មតិរបស់មជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ (NCHADS) និង USAID កាលពីឆ្នាំ២០១៦ រកឃើញថា អត្រាការឆ្លងមេរោគអេដស៍មានកម្រិតខ្ពស់ក្នុងចំណោមអ្នកប្តូរភេទជាស្ត្រី(៥,៩%) និងបុរសស្រឡាញ់បុរស(២,៣%) បើធៀបនឹងចំនួនប្រជាជនទូទៅ(០,៦%)។

របាយការណ៍ថ្មីមួយផ្សេងទៀត របស់សមាគមឥន្ទធនូកម្ពុជា ដែលបានចេញផ្សាយក្នុងឆ្នាំ២០១៦ រកឃើញថា ៣៣% នៃអ្នកស្រឡាញ់ភេទដូចគ្នា បានលើកឡើងថា ការមិនបានរាប់បញ្ចូលនៅក្នុងសាលារៀន គឺជាបញ្ហាសំខាន់មួយ។ របាយការណ៍ សរសេរបន្តថា ៨២% នៃអ្នកស្រឡាញ់ភេទដូចគ្នា ទទួលរងការរើសអើងនិន្នាការភេទ និងអត្តសញ្ញាណយែនឌ័រ ពីក្រុមគ្រួសារ សហគមន៍ និងប្រជាជនទូទៅ។ លើសពីនេះ អ្នកស្រឡាញ់ភេទដូចគ្នា២៩% មិនដែលចេញមកក្រៅទេ ដោយសារតែភាពភ័យខ្លាចនៃការរើសអើង ការវិនិច្ឆ័យ ការសម្លុត និងការយាយីផ្សេងៗ។

ការស្ទង់មតិស្តីពីការធ្វើសមាហរណកម្មតាមបែបជីវសាស្ត្រ និងឥរិយាបថក្នុងចំណោមអ្នកប្តូរភេទជាស្ត្រីនៅកម្ពុជាឆ្នាំ២០១៦ បានរកឃើញថា អ្នកប្តូរភេទជាស្ត្រីរងការរើសអើងកម្រិតខ្ពស់ ក្នុងនោះ ៣៩% រងការរំលោភបំពានខាងផ្លូវភេទ ២៤% រកការរើសអើងផ្នែកការងារ ២៤% ត្រូវបានគេបដិសេធ ឬបណ្តេញចេញពីលំនៅស្ថាន និង២៤%ទៀត រងការបំពានលើរូបរាងកាយ៕