ពីនេះ ពីនោះ
ព័ត៍មានសុខភាព
នៅសុខៗ សម្ពាធឈាមស្រាប់តែឡើងខ្ពស់ភ្លាមៗតែម្តង តើមកពីអីទៅ?
× ជំងឺលើសសម្ពាធឈាម ត្រូវបានគេស្គាល់ថា ជាឃាតករឈាមត្រជាក់ ដោយសារតែវាមិនមានបង្ហាញអាការៈអ្វីទាំងអស់នៅពេលដំបូង ប៉ុន្តែពេលខ្លះក៏វាមិនមានមូលហេតុរបស់វាដែរ ដែលជាហេតុនាំឲ្យមានការពិបាកក្នុងការកំណត់រោគវិនិច្ឆ័យ។ ហេតុដូច្នេះហើយ ទើបធ្វើឲ្យជំងឺលើសសម្ពាធឈាមច្រើនតែត្រូវបានគេរកឃើញជាញឹកញាប់នៅពេលអ្នកជំងឺមកពិនិត្យជាប្រចាំ។ យ៉ាងណាមិញ មានករណីច្រើនណាស់ដែលធ្វើឲ្យអ្នកជំងឺស្រាប់លើសសម្ពាធឈាមខ្ពស់ភ្លាមៗតែម្តងដូចជា៖
ឈប់ប្រើថ្នាំបញ្ចុះសម្ពាធឈាម
មែនហើយ មូលហេតុចំបងបំផុតនៃការលើសសម្ពាធឈាមភ្លាមៗគឺការឈប់ប្រើថ្នាំបញ្ចុះសម្ពាធឈាមដែលចេញដោយគ្រូពេទ្យ។ ដូច្នេះ ចូរប្រាកដជានិច្ចថា អ្នកបានប្រើប្រាស់ថ្នាំទៅតាមកម្រិតត្រឹមត្រូវដែលណែនាំពីគ្រូពេទ្យរួចហើយដើម្បីចៀសវាងការលើសសម្ពាធឈាមភ្លាមៗនៅពេលក្រោយទៀត។
មិនតមអាហារ
មូលហេតុចំបងមួយផ្សេងទៀតនៃការលើសសម្ពាធឈាមខ្ពស់ភ្លាមៗដែរនោះ គឺកង្វះរបបអាហារត្រឹមត្រូវ។ បើសិនជាអ្នកចូលចិត្តញ៉ាំអាហារប្រៃៗ ឬផ្អែមៗ នោះឱកាសលើសសម្ពាធឈាមនឹងខ្ពស់ខ្លាំងណាស់។ នេះដោយសារតែ ជាតិប្រៃច្រើនធ្វើឲ្យសរសៃឈាមអាក់ទែទៅជារឹងជាងមុន និងរួមតូចជាងមុន។ រឿងនេះមិនត្រឹមតែធ្វើឲ្យសម្ពាធឈាមឡើងខ្ពស់ទេ តែក៏កាត់បន្ថយការផ្គត់ផ្គង់ឈាម អុកស៊ីសែន និងជីវជាតិសំខាន់ៗសម្រាប់សរីរាង្គក្នុងរាងកាយដែរ។
ប្រើថ្នាំច្រើនមុខដែលមានប្រតិកម្មជាមួយគ្នា
បើសិនជាអ្នកកំពុងតែប្រើថ្នាំជាច្រើនសម្រាប់ព្យាបាលបញ្ហាសុខភាពច្រើនដូចជា ក្អក និងផ្តាសាយ នោះ ចូរកុំភ្លេចឲ្យគ្រូពេទ្យដឹងផង ព្រោះការដែលប្រើថ្នាំច្រើនពេកអាចបណ្តាលឲ្យមានប្រតិកម្ម ព្រមទាំងអាចបង្កើន ឬបន្ថយប្រសិទ្ធភាពរបស់ថ្នាំបញ្ចុះសម្ពាធឈាមថែមទៀត។
អ្នកកំពុងតែមានជំងឺដែលនាំឲ្យលើសសម្ពាធឈាម
មិនមានមនុស្សច្រើនទេដែលដឹងថា ជំងឺលើសសម្ពាធឈាមភាគច្រើនបណ្តាលមកពីមូលហេតុណាមួយទៀត។ បើសិនជាអ្នកមានជំងឺតម្រងនោម តែមិនប្រើថ្នាំព្យាបាលទេ វាប្រហែលជាបណ្តាលឲ្យលើសសម្ពាធឈាមភ្លាមៗបាន។ បើសិនជាអ្នកមានជំងឺក្រិនសរសៃឈាមអាក់ទែទាំងខាងរបស់តម្រងនោម នោះក៏ធ្វើឲ្យសម្ពាធឈាមឡើងខ្ពស់ភ្លាមៗបានដែរ៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com