ម្ចាស់មេដាយមាសអូឡាំពិក ពិភពលោក និងអឺរ៉ុប Laura Flessel ក្លាយជារដ្ឋមន្ត្រីកីឡាបារាំង

កីឡាអន្តរជាតិ

អន្តរជាតិ

នយោបាយអន្តរជាតិ

ម្ចាស់មេដាយមាសអូឡាំពិក ពិភពលោក និងអឺរ៉ុប Laura Flessel ក្លាយជារដ្ឋមន្ត្រីកីឡាបារាំង

18, May 2017 , 5:58 pm

រូបភាព

ដោយ: ថ្មីៗ

លោកស្រី Laura Flessel ត្រូវបានតែងតាំងជារដ្ឋមន្ត្រីក្រសួងកីឡាក្នុងរដ្ឋាភិបាលរបស់លោកនាយករដ្ឋមន្ត្រី Edouard Philippe ក្រោមការដឹកនាំរបស់ប្រធានាធិបតីជាប់ឆ្នោតថ្មី លោក អេម៉ានុយអែល ម៉ាក្រុង។ លោកស្រី Flessel ជាអតីតកីឡាការិនីចាក់សាប (គុនដាវ) ដ៏កំពូលម្នាក់របស់បារាំង ដែលធ្លាប់មេដាយមាសអូឡាំពិក មេដាយមាសពិភពលោក និងមេដាយមាសអឺរ៉ុប។

ក្នុងវ័យ៤៥ឆ្នាំ លោកស្រី Laura Flessel ដែលមានស្រុកកំណើតនៅតំបន់ Guadeloupe បានធ្វើសកម្មភាពកីឡាយ៉ាងសកម្មដើម្បីបំផុសបំផុលអ្នកបោះឆ្នោតឲ្យគាំទ្រលោក អេម៉ានុយអែល ម៉ាក្រុង បើទោះបីជាគាត់មិនមែនជាសមាជិកបក្សនយោបាយណាមួយក៏ដោយ។

ជោគជ័យដ៏ធំធេងរបស់លោកស្រី Laura Flessel ក្នុងអាជីពជាកីឡាការិនីចាក់សាបកំពូលរបស់បារាំង លោកស្រីធ្លាប់ដណ្តើមបានមេដាយអូឡាំពិកចំនួន៥ចន្លោះពីឆ្នាំ១៩៩៦ដល់ឆ្នាំ២០០៤ (មាស២ ប្រាក់១ និងសំរិទ្ធ)។ សម្រាប់ការប្រកួតជើងឯកពិភពលោកពីឆ្នាំ១៩៩៥ដល់ឆ្នាំ២០០៨ លោកស្រីឈ្នះមេដាយមាស៦ ប្រាក់៣ និងសំរិទ្ធ៤ ។

នៅក្របខណ្ឌអឺរ៉ុប លោកស្រីបានឈ្នះមេដាយមាស១នៅឆ្នាំ២០០៧ និងមេដាយសំរិទ្ធ៥បន្ថែមទៀតនាការប្រកួតនៅឆ្នាំជាបន្តបន្ទាប់។ ចំពោះការប្រកួតថ្នាក់ជាតិ រដ្ឋមន្ត្រីកីឡាថ្មីរូបនេះ ឈ្នះជើងឯក៦លើកផ្នែកឯកត្តជន និង៩លើកលើវិញ្ញាសាជាក្រុម។

ឈ្មោះរបស់លោកស្រី Laura Flessel ក៏ត្រូវបានយកទៅដាក់ឲ្យទីតាំងកីឡាមួយនៅ Guadeloupe និងកីឡដ្ឋាននៅ Bussy Saint-Georges, Asnières-Sur-Seine, Chanteloup-les-Vignes ជាដើម។

លោកស្រីស្ថិតក្នុងចំណោមរដ្ឋមន្ត្រីថ្មី១៨រូប និងរដ្ឋលេខាធិការ៤រូបរបស់រដ្ឋាភិបាលបារាំងដែលទទួលបានការតែងតាំងកាលពីថ្ងៃទី១៧ ខែឧសភា។ លោកស្រី Flessel ជំនួសតំណែងរបស់លោក Patrick Kanner៕