កីឡាអន្តរជាតិ
អន្តរជាតិ
ច្បាប់ថ្មី FA៖ ធ្វើពុតជាដួលលើទីលាន ត្រូវរងពិន័យ២ប្រកួត
× កីឡាកររូបណាដែលធ្វើពុតជាដួលក្នុងទីលានអំឡុងពេលប្រកួត នឹងត្រូវរងពិន័យពីសហព័ន្ធកីឡាបាល់ទាត់អង់គ្លេស FA ចំនួន២ប្រកួត។ ច្បាប់ថ្មីនេះនឹងចាប់ផ្តើមអនុវត្តន៍ក្នុងក្របខណ្ឌលីកអង់គ្លេសនារដូវកាលក្រោយ។
បើតាមការចុះផ្សាយរបស់ The Guardian កាលពីថ្ងៃទី១៨ ខែឧសភា សហព័ន្ធកីឡាបាល់ទាត់អង់គ្លេសបានចែងច្បាប់ថ្មីមួយនារដូវកាលក្រោយ ២០១៧-២០១៨ ដោយដាក់ពិន័យលើកីឡាកររួបណាដែលធ្វើពុតជាដួលដើម្បីបោកភ្នែកអាជ្ញាកណ្តាលនាពេលប្រកួត។
FA នឹងចាត់មនុស្សបីនាក់ រួមមាន អតីតគ្រូបង្វឹកម្នាក់ អតីតអជ្ញាកណ្តាលម្នាក់ និងអតីតកីឡាករម្នាក់ដើម្បីសហការគ្នាពិនិត្យរាល់សម្មភាពរបស់កីឡាករនៅលើទីលានឡើងវិញតាមរយៈវីដេអូ ដើម្បីស្វែងរកការធ្វើពុតណាមួយដែលមានចេតនាបោកប្រាស់ភ្នែកអាជ្ញាកណ្តាល។ ប្រសិនបើអ្នកទាំង៣ពិតជារកឃើញកំហុស និងឯកភាពគ្នាជាឯកច្ឆន្ទថាមានការធ្វើពុតមែននោះ កីឡាកររូបនោះនឹងត្រូវរងពិន័យចំនួន២ប្រកួត។
ច្បាប់ថ្មីខាងលើនេះគឺប្រើសម្រាប់ពិន័យតែកីឡាកររូបណាដែលធ្វើពុតជាដួលដើម្បីឲ្យអាជ្ញាកណ្តាលពិន័យទៅលើគូប្រជែង ឲ្យទទួលបានកាតក្រហម ឬកាតលឿងទី២ និងបាល់ពិន័យ១១ម៉ែត្រប៉ុណ្ណោះ។
សូមបញ្ជាក់ថាច្បាប់ពិន័យពីការធ្វើពុតនេះត្រូវបានអនុវត្តន៍ក្នុងលីករបស់ប្រទេសស្កុតឡែនដោយជោគជ័យនាពេលកន្លងមក ហើយនឹងត្រូវយកមកប្រើប្រាស់សាកល្បងនាការប្រកួតវគ្គផ្តាច់ព្រ័ត្រ FA Cup រវាងក្រុមតោខៀវ Chelsea និងកាំភ្លើងធំ Arsenal នាកីឡដ្ឋាន Wembley ខាងមុខនេះ៕
© រក្សាសិទ្ធិដោយ thmeythmey.com