ជាតិ
ការឃោសនាប៉ុន្មានថ្ងៃនេះ គ្មានហិង្សា និងមានការអធ្យាស្រ័យគ្នា!
× ភ្នំពេញ៖ ការឃោសនាបោះឆ្នោតថ្នាក់ឃុំ-សង្កាត់ ក្នុងរយៈពេលពីរ-បីថ្ងៃនេះ ដំណើរទៅដោយការយោគយល់និងការអធ្យាស្រ័យឲ្យគ្នា ពីសំណាក់អ្នកគាំទ្រនៃគណបក្សនយោបាយនានា។ គ.ជ.ប និងអ្នកតាមដានស្ថានការណ៍នយោបាយនៅកម្ពុជា សាទរចំពោះអ្នកគាំទ្រនៃគណបក្សនយោបាយទាំងនោះ ដែលបានបង្ហាញភាពចាស់ទុំដាក់គ្នា ក្នុងការឃោសនា។
ថ្ងៃចន្ទនេះ គឺថ្ងៃទីបីហើយ ដែលគណបក្សនយោបាយនានា ចេញធ្វើយុទ្ធនាការនៃការឃោសនាបោះឆ្នោតថ្នាក់ឃុំ-សង្កាត់ នាអាណត្តិទី៤។ ការឃោសនាក្នុងរយៈពេលពី-បីថ្ងៃនេះ ដំណើរទៅដោយមិនមានអំពើហិង្សាឬជម្លោះធំដុំ រវាងគណបក្សនយោបាយនិងគណបក្សនយោបាយ នោះទេ។
ក្នុងរយៈពេលប៉ុន្មានថ្ងៃនេះ គេសង្កេតឃើញ អ្នកគាំទ្រនិងសកម្មជននៃគណបក្សនយោបាយ នៅតាមតំបន់ខ្លះ បានទាស់សម្តីគ្នាតិចតួចប៉ុណ្ណោះ ក្នុងពេលឃោសនា។ យ៉ាងណា គណៈកម្មាធិការជាតិរៀបចំការបោះឆ្នោត (គ.ជ.ប) និងអ្នកតាមដានស្ថានការណ៍នយោបាយនៅកម្ពុជា នៅតែចាត់ទុកការឃោសនានាអាណត្តិនេះ ថាល្អប្រសើរច្រើន ប្រសិនបើប្រៀបធៀបទៅនឹងអាណត្តិមុនៗ។
លោក ហង្ស ពុទ្ធា សមាជិកនិងជាអ្នកនាំពាក្យគ.ជ.ប សង្កេតឃើញថា ការចូលរួមឃោសនារបស់សកម្មជននិងអ្នកគាំទ្រពីគណបក្សនយោបាយនានា មានលក្ខណៈចាស់ទុំជាងមុន។ ម្យ៉ាងទៀត លោក យល់ថា គណបក្សនយោបាយ មានស្មារតីក្នុងការប្រកាន់ភ្ជាប់នូវក្រមសីលធម៌ និងគោរពគោលការណ៍ ដែលគ.ជ.ប បានចែង ទើបមិនបណ្តាលឲ្យមានជម្លោះ ពេលឃោសនា។
លោក ហង្ស ពុទ្ធា សង្កត់ធ្ងន់ថា ក្នុងអាណត្តិនេះ គណបក្សនយោបាយ មានរយៈពេលតែពីរថ្ងៃប៉ុណ្ណោះ ក្នុងការដង្ហែក្បួនឃោសនា ដូច្នេះចង់មិនចង់ គណបក្សនយោបាយទាំងអស់ ត្រូវតែជៀសវាងជម្លោះជាមួយគ្នា ដើម្បីយកពេលទៅឃោសនា។ អ្នកនាំពាក្យគ.ជ.ប រូបនេះ បានប្រាប់សារព័ត៌មានថ្មីៗដូច្នេះថា៖«យន្តការនេះហើយ ដែលសំខាន់ជាងគេ ក្នុងការបញ្ចៀសជម្លោះរវាងគណបក្សនយោបាយនិងគណបក្សនយោបាយ។ ពួកគាត់ មានពេលតិចសម្រាប់ឃោសនា អ៊ីចឹងបើគិតតែឈ្លោះគា្ន គឺនាំឲ្យពួកគាត់ ខាតពេលរៀងៗខ្លួន សម្រាប់ឃោសនា»។
លោក ហង្ស ពុទ្ធា សង្ឃឹមថា អ្នកគាំទ្រនិងសកម្មជនពីគ្រប់គណបក្សនយោបាយ នឹងបន្តឃោសនា ដោយប្រកាន់ភ្ជាប់នូវក្រមសីលធម៌ ហើយជៀសវាងការប្រើអំពើហិង្សា រហូតដល់ការបោះឆ្នោត បានចប់សព្វគ្រប់។
ចំណែក លោក មាស នី អ្នកតាមដានស្ថានការណ៍នយោបាយនៅកម្ពុជា បានប្រាប់សារព័ត៌មានថ្មីៗថា វិធានការ ដែលគ.ជ.ប បានកំណត់ ដើម្បីឲ្យគណបក្សនយោបាយ អនុវត្ត គឺជាចំណុចសំខាន់ ដែលនាំឲ្យការឃោសនានាពេលនេះ ប្រព្រឹត្តទៅដោយរលូន។ លោក បញ្ជាក់ដូច្នេះថា៖«ខ្ញុំឃើញ គ.ជ.ប ផ្សព្វផ្សាយច្រើន ពីគោលការណ៍ថា អ្វីដែលគណបក្សនយោបាយ គួរធ្វើ ហើយអ្វីដែលគណបក្សនយោបាយ មិនគួរធ្វើ។ ហើយគណបក្សនយោបាយ ក៏បានអនុវត្តនូវគោលការណ៍របស់គ.ជ.ប ដែរ។ ត្រង់នេះហើយ ដែលធ្វើឲ្យការឃោសនាប៉ុន្មានថ្ងៃហ្នឹង មិនមានបញ្ហាធ្ងន់ធ្ងរ»។
ហេតុផលមួយទៀត គឺទំនងដោយសារតែការគំរាមកំហែងពីអ្នកនយោបាយកន្លងមក ទើបបានជាប្រជាពលរដ្ឋ ជាពិសេសអ្នកគាំទ្រនៃគណបក្សសង្គ្រោះជាតិ ត្រូវតែបង្ខំចិត្តអត់ធន់ ដោយធ្វើយ៉ាងណា មិនត្រូវឲ្យមានអំពើហិង្សាកើតឡើង។ អ្វីដែលគណបក្សសង្គ្រោះជាតិ និងអ្នកគាំទ្រចង់បានបំផុតនាពេលនេះ គឺការបោះឆ្នោត ដោយសេរីនិងយុត្តិធម៌។ នេះ ជាការលើកឡើងរបស់លោក មាស នី ដដែល។
ក្នុងរយៈពេលប៉ុន្មានថ្ងៃនេះ គេសង្កេតឃើញគណបក្សនយោបាយមួយចំនួន បានចេញឃោសនា ពីកម្មវិធីនយោបាយនិងគោលនយោបាយរបស់ខ្លួន។ គណបក្សនយោបាយទាំងនោះ មានដូចជា គណបក្សប្រជាជនកម្ពុជា គណបក្សសង្គ្រោះជាតិ គណបក្សហ្វ៊ុនស៊ិនប៊ិច គណបក្សសម្ព័ន្ធដើម្បីប្រជាធិបតេយ្យ គណបក្សយុវជនកម្ពុជា គណបក្សខ្មែររួបរួមជាតិ គណបក្សសំបុកឃ្មុំសង្គមប្រជាធិបតេយ្យ និងគណបក្សប្រជាធិបតេយ្យមូលដ្ឋាន ជាដើម។
សូមបញ្ជាក់ថា គ.ជ.ប បានផ្តល់រយៈពេល១៤ថ្ងៃ ដល់គណបក្សនយោបាយ ដើម្បីឃោសនាបោះឆ្នោត។ ក្នុងរយៈពេល១៤ថ្ងៃនេះ គណបក្សនយោបាយ អាចដង្ហែក្បួនឃោសនា តាមដងផ្លូវ ទីសាធារណៈ និងកន្លែងប្រជុំជននានា បានតែ២ថ្ងៃប៉ុណ្ណោះ៕
Tag:
បោះឆ្នោតឃុំ-សង្កាត់
© រក្សាសិទ្ធិដោយ thmeythmey.com