ជាតិ
បទយកការណ៍ / បទសម្ភាសន៍
បក្សជនជាតិដើម ប្រជែងក្នុងការបោះឆ្នោត ព្រោះចង់ផ្សព្វផ្សាយសំឡេងជនជាតិដើមភាគតិច
× លោក ប្លាង ស៊ីន ជនជាតិដើមព្នងបានចងក្រងអ្នកគាំទ្របង្កើត គណបក្សជនជាតិដើម ប្រជាធិបតេយ្យកម្ពុជា ដែលត្រូវបានក្រសួងមហាផ្ទៃផ្តល់សុពលភាពកាលពីដើមឆ្នាំ ២០១៧ កន្លងទៅ។ បក្សនេះបានដាក់បេក្ខជនឈរឈ្មោះចំនួន ១៦ ឃុំ នៅខេត្តមណ្ឌលគិរី និងខេត្តក្រចេះ។ ក្នុងបទសម្ភាសន៍ជាមួយលោក ជា ធីរិទ្ធ និពន្ធនាយករងសារព័ត៌មានថ្មីៗ លោក ប្លាង ស៊ីន និយាយថា លោកបង្កើតបក្សនេះឡើង ដើម្បីឲ្យសំឡេងរបស់បក្សជនជាតិដើមភាគតិច កាន់ត្រូវបានមជ្ឈដ្ឋានទូទៅចាប់អារម្មណ៍។
សូមអានបទសម្ភាសខាងក្រោម៖
លោក ជា ធីរិទ្ធ៖ គណបក្សលោក បានដាក់បេក្ខជនឈរឈ្មោះនៅក្នុងការបោះឆ្នោតចំនួន ១៦ ឃុំ តើបក្សជនជាតិដើម ប្រជាធិបតេយ្យកម្ពុជា បានឈរឈ្មោះនៅខេត្តណាខ្លះ?
លោក ប្លាង ស៊ីន៖ ក្នុងចំណោម ១៦ ឃុំ ដែលយើងបានដាក់បេក្ខជនឈរឈ្មោះនោះ មាននៅខេត្តមណ្ឌលគិរីចំនួន ១៤ ឃុំ និងក្រចេះចំនួន ២ ឃុំ។ យើងដាក់នៅខេត្តទាំងពីរនេះ ព្រោះយើងមានបណ្តាញជនជាតិដើមច្រើននៅតំបន់នោះ។
លោក ជា ធីរិទ្ធ៖ គណបក្សលោកបានដាក់បេក្ខជនចំនួន ១៦ ឃុំ ។ តើគណបក្សលោក បានកំណត់នូវលក្ខណៈសម្បត្តិអ្វីខ្លះ ដើម្បីសម្រេចជ្រើសរើសបេក្ខជនទាំងនោះ ឲ្យឈរឈ្មោះ?
លោក ប្លាង ស៊ីន៖ សម្រាប់បេក្ខជន ដែលឈរឈ្មោះនៅតាមឃុំ យើងផ្តោតទៅលើអ្នកណា ដែលមានគំនិតស្រឡាញ់វប្បធម៌ ស្រឡាញ់ជាតិ ស្រឡាញ់ជនជាតិខ្លួនឯង អាចជួយជនជាតិខ្លួនឯង និងមានគំនិតយុត្តិធម៌ ស្មោះត្រង់នឹងប្រជាប្រពលរដ្ឋ។
លោក ជា ធីរិទ្ធ៖ តើបេក្ខជនទាំងអស់នោះ សុទ្ធតែជនជាតិដើមភាគតិច? ហើយបក្សលោកមានតែបងប្អូនជនជាតិដើមគាំទ្រឬយ៉ាងណា?
លោក ប្លាង ស៊ីន៖ តាមពិតយើងបង្កើតនេះ មិនមែនសម្រាប់តែជនជាតិដើមភាគតិចទេ យើងផ្តោតទៅលើប្រជាពលរដ្ឋខ្មែរទូទៅ។ អ្នកគាំទ្រយើងមិនមែនមានតែបងប្អូនជនជាតិដើមនោះទេ។
លោក ជា ធីរិទ្ធ៖ តើគណបក្សលោក មានគោលនយោបាយពិសេសអ្វីខ្លះ ដើម្បីទាក់ទាញប្រជាពលរដ្ឋ?
លោក ប្លាង ស៊ីន៖ យើងមានគោលនយោបាយសំខាន់ៗចំនួន ៨ ចំណុច ទី ១ អភិវឌ្ឍន៍តាមគោលបំណងរបស់ប្រជាពលរដ្ឋចង់បាន។ ទី ២ យើងផ្តល់សេវាសាធារណៈឲ្យទាន់ពេលវេលា និងមិនយកកម្រៃពីប្រជាពលរដ្ឋ ។ ទី ៣ អភិវឌ្ឍន៍ឃុំសង្កាត់ ដែលនៅជាប់ព្រំដែន ដោយមានកិច្ចសហប្រតិបត្តិការល្អជាមួយប្រទេសជាប់ព្រំដែន។ ទី ៤ ការពារធនធានធម្មជាតិ។ ទី ៥ ថែរក្សាអត្តសញ្ញាណជនជាតិដើមឲ្យបានគង់វង់។ ទី ៦ បញ្ឈប់ការរើសអើងនយោបាយ ទី ៧ ដោះស្រាយដីធ្លីដោយយុត្តិធម៌ និងទី ៨ ទប់ស្កាត់ការប្រើប្រាស់គ្រឿងញៀន។
លោក ជា ធីរិទ្ធ៖ ខ្ញុំសូមអធ្យាស្រ័យផង និយាយឲ្យត្រង់ទៅ គណបក្សលោកដូចជាមិនសូវមានគេស្គាល់ ហើយគណបក្សនេះ មិនសូវធ្វើសកម្មភាពអ្វីសោះ។ តើលោកបង្កើតបក្សនេះ ក្នុងគោលដៅអ្វីសំខាន់?
លោក ប្លាង ស៊ីន៖ តាមពិតទៅ យើងធ្វើនេះ មិនសង្ឃឹមអ្វីខ្ពស់នោះទេ និយាយដោយត្រង់ យើងធ្វើគ្រាន់តែឲ្យមានសំឡេង កុំឲ្យគេបំភ្លេចសំឡេងរបស់បងប្អូនជនជាតិដើមរបស់យើង។ កន្លងមកសំឡេងរបស់ពួកយើង គេមិនសូវស្តាប់តែ គេមិនសូវដោះស្រាយ។ ដូច្នេះយើងចង់ឲ្យសំឡេងរបស់បងប្អូនជនជាតិដើម ត្រូវគេឲ្យតម្លៃដូចប្រជាពលរដ្ឋខ្មែរដទៃទៀតដែរ៕
Tag:
ប្លាង ស៊ីន
បោះឆ្នោតឃុំ-សង្កាត់
© រក្សាសិទ្ធិដោយ thmeythmey.com