គណបក្សសញ្ជាតិកម្ពុជា ចង់បណ្តុះនូវគ្រាប់ពូជព្រះនិព្វាន

ជាតិ

នយោបាយជាតិ

គណបក្សសញ្ជាតិកម្ពុជា ចង់បណ្តុះនូវគ្រាប់ពូជព្រះនិព្វាន

24, May 2017 , 9:19 am

រូបភាព

ដោយ: ថ្មីៗ

គណបក្សសញ្ជាតិកម្ពុជា មិនមែនជាគណបក្សថ្មីនោះឡើយ ដោយបក្សនេះ ក៏បានចូលរួមផងដែរនាការបោះឆ្នោតជ្រើសរើសតំណាងរាស្ត្រអណត្តិទី៥កន្លងមក។ បក្សដែលបង្កើតឡើងដោយបុរសកាន់សីលម្នាក់ គឺព្រះគ្រូមហាថេរៈ លោកតាហង្ស ភ្នំត្បែងមានជ័យ មានសញ្ញាព្រះអាទិត្យពណ៌មាស និងព្រះចន្ទពណ៌ប្រាក់ ជួបគ្នា ដោយមានបាវចនា សញ្ជាតិ សាសនា និងអធិបតេយ្យ។

សម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់នាពេលខាងមុខ គណបក្សសញ្ជាតិកម្ពុជា ដែលមានលោក សេង សុខេង ជាប្រធាន មិនមានការប្រកាសគោលនយោបាយថ្មីនោះឡើយ។ គណបក្សគ្រាន់តែលើកយកគោលការណ៍របស់ខ្លួនដើម្បីទាក់ទាញអ្នកបោះឆ្នោតតែប៉ុណ្ណោះ។

គណបក្សសញ្ជាតិកម្ពុជា បានកំណត់នូវគោលការណ៍ យ៉ាងដូច្នេះ៖ «ដើម្បីទទួលបានសេចក្តីសុខទាំងផ្លូវកាយ ផ្លូវចិត្ត និងផ្លូវសង្គម ព្រមទាំងទទួលបាននូវការអភិវឌ្ឍ ប្រកបដោយចិរភាព ទាំងពេលបច្ចុប្បន្ន និងទៅអនាគត គណបក្សសញ្ជាតិកម្ពុជា ត្រូវប្រកាន់ភ្ជាប់នូវគោលការណ៍គ្រឹះ គឺសាមគ្គីធម៌ ធ្វើបុណ្យ រក្សាសីល និងបណ្តុះនូវគ្រាប់ពូជព្រះនិព្វាន»។

គណបក្សសញ្ជាតិកម្ពុជា ដាក់បេក្ខភាពនៅ៥២ឃុំ-សង្កាត់ក្នុងខេត្តកំពង់ចាម កំពង់ឆ្នាំង កំពង់ធំ កណ្តាល ក្រចេះ ព្រៃវែង ស្វាយរៀង និងត្បូងឃ្មុំ។ គណបក្សនេះ មានបេក្ខជនសរុប៧៩៦នាក់ ក្នុងនោះស្ត្រី៤២០នាក់៕