ជាតិ
សេដ្ឋកិច្ច
រដ្ឋាភិបាលផ្តើមអនុវត្តគម្រោង ផ្តល់ទុន២០ភាគរយសម្រាប់អាជីវកម្មកសិកម្មច្នៃប្រឌិត
× ភ្នំពេញ៖ រដ្ឋាភិបាលដាក់ឲ្យអនុវត្ត«គម្រោងជំរុញទីផ្សារកសិកម្មខ្នាតតូច» ដែលមានតម្លៃសរុប ៦១ លានដុល្លារ សម្រាប់រយៈពេល ៦ឆ្នាំ ដើម្បីបង្កើនចំណូលប្រជាកសិករ តាមរយៈការលើកកម្ពស់ផលិតកម្ម លើផលិតផល ៥ប្រភេទ ដោយផ្សាភ្ជាប់ទៅទីផ្សារ។ ពិធីប្រកាសអនុវត្តគម្រោងនេះ ធ្វើឡើងនៅថ្ងៃទី២៣ខែឧសភា នាក្រសួងពាណិជ្ជកម្ម។
គម្រោងជំរុញទីផ្សារកសិកម្មខ្នាតតូចនេះមានតម្លៃសរុប ៦១លានដុល្លារ ដោយក្នុងនោះប្រាក់ជាង ៣៦លានដុល្លារជាកម្ចីពីអង្គការមូលនិធិអន្តរជាតិដើម្បីអភិវឌ្ឍន៍កសិកម្ម (IFAD), ជាង ៨លានដុល្លារជាថវិកាបដិភាគរបស់រដ្ឋាភិបាល និងផ្នែកឯកជន ១៦លានដុល្លារទៀត ដែលវិនិយោគចូលក្នុងគម្រោងនេះ។
គម្រោងនេះស្ថិតក្រោមការអនុវត្តរបស់ក្រសួងពាណិជ្ជកម្ម ដែលនឹងគ្របដណ្ដប់លើខេត្តចំនួន ១៥ ដោយបែងចែកជា ៣ ភូមិភាគ ឬ មជ្ឈមណ្ឌលផលិតកម្ម។ គម្រោងនេះអនុវត្តលើផលិតផលសក្ដានុពល ៥ប្រភេទ រួមមាន ស្រូវក្រអូប បន្លែ ដំឡូងមី មាន់ស្រែ និងសសៃសូត្រ។ គម្រោងនេះនឹងពិចារណាលើផលិតផលផ្សេងៗទៀត នៅជំហានបន្ទាប់។
គម្រោងនេះនឹងជួយទាំងក្រុមកសិករ និងវិស័យឯកជនជាសហគ្រាស ដែលមានគំនិតផ្ដួតផ្ដើមវិនិយោគបែបច្នៃប្រឌិតលើផលិតផលណាមួយក្នុងចំណោមផលិតផលទាំង ៥ប្រភេទខាងលើ ដោយគម្រោងនេះនឹងផ្ដល់ឥណទានឥតសំណង ២០ភាគរយនៃទុនសរុបនៃការវិនិយោគនីមួយៗ។ នេះជាឥណទានឥតសំណង សម្រាប់អាជីវកម្មច្នៃប្រឌិតខ្សែសង្វាក់តម្លៃ។
លោក ប៉ែន សុជាតិ អគ្គនាយកនៃអគ្គនាយកដ្ឋានពាណិជ្ជកម្មក្នុងស្រុកនៃក្រសួងពាណិជ្ជកម្ម និងជាប្រធានគម្រោងនេះ បានឲ្យឧទាហរណ៍សម្រាប់អ្នកចង់រកជំនួយនៃគម្រោងនេះថា អ្នកចិញ្ចឹមមាន់ចង់បង្កើតសិប្បកម្មវេចខ្ចប់មាន់សម្រាប់ផ្គត់ផ្គង់លើទីផ្សារអាចស្នើសុំជំនួយពីគម្រោងនេះបាន ដើម្បីវិនិយោគលើសម្ភារពាក់ព័ន្ធនានា ដូចជា ខ្ទះស្រុះមាន់ រោងបោចមាន់ ទូក្លាសេជាដើម ដែលធានាបានថាមាន់ដែលលក់ចេញមានគុណភាព និងអនាម័យត្រឹមត្រូវ។ លោកថា ផលិតផលមាន់ក្នុងទម្រង់ជីវកម្មបែបនេះ នឹងទទួលការគាំទ្រពីទីផ្សារ។ លោកបញ្ជាក់ថា អ្នកដាក់ពាក្យស្នើសុំជំនួយពីគម្រោងនេះ ត្រូវមានផែនការច្បាស់លាស់។
«បើសិនផែនការអាជីវកម្មត្រូវតាមការរំពឹងទុក ផលិតផលដែលយើងធ្វើជាផលិតផលមាន សក្ដានុពល នោះគម្រោងផ្ដល់ឥណទាន ២០ភាគរយ ដោយឥតយកមកវិញ សម្រាប់អ្នកមានភាពច្នៃប្រឌិត និងហ៊ានប្រថុយមុនគេ និងជាអ្នកជំរុញឲ្យមានការរៀបចំរបៀបអាជីវកម្មបែបហ្នឹងបន្តៗគ្នា (ម៉ូដែលអាជីវកម្ម)»។ នេះជាការបន្ថែមរបស់លោក ប៉ែន សុជាតិ ។
ឧទាហរណ៍ផ្សេងទៀត ដែលមន្ត្រីអនុវត្តន៍គម្រោងបានលើកឡើងដើម្បីអាចស្នើសុំជំនួយ គឺការបង្កើតសហគ្រាសប្រមូលទិញកសិផលពីកសិករ ដែលត្រូវវិនិយោគលើឃ្លាំងស្តុក និងមធ្យោបាយដឹកជញ្ជូនជាដើម។
លោក ម៉េង សក្ដិភូសិត មន្ត្រីអនុវត្តន៍គម្រោងមួយនេះ បានឲ្យដឹងថា ការផ្ដល់ជំនួយ ២០ភាគរយនេះ នឹងជំរុញឲ្យកសិករ និងពាណិជ្ជករហ៊ានបោះទុនវិនិយោគ លើផែនការអាជីវកម្មរបស់ខ្លួន ព្រមទាំងជំរុញឲ្យគ្រឹះស្ថានហិរញ្ញវត្ថុ ហ៊ានផ្ដល់កម្ចីដល់ផែនការអាជីវកម្មនោះ។ លោកបន្តថា៖«ការងារខ្លះ គ្រឹះស្ថានហិរញ្ញវត្ថុមិនហ៊ានឲ្យខ្ចីទេ ព្រោះវិស័យកសិកម្មមានហានិភ័យធំ។ អ៊ីចឹងរបៀបទាក់ទាញប្រាក់បាន គឺយើងទៅប្រាប់គ្រឹះស្ថានថាអ្នកឯងសម្រេចឲ្យទៅ ព្រោះយើងជួយធានាហានិភ័យ ២០ភាគរយ»។
គម្រោងនេះ បានសហការជាមួយគ្រឹះស្ថានចំនួនបី រួមមាន គ្រឹះស្ថានប្រាសាក់ គ្រឹះស្ថាន អម្រិត និងគ្រឹះស្ថាន LOLC ដើម្បីឲ្យគ្រឹះស្ថានទាំងនេះ រៀបចំកញ្ចប់សេវាកម្មឥណទានសមស្របនឹងគម្រោងនេះ។
រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ រំពឹងថាក្រោយពីគម្រោងជំរុញទីផ្សារកសិកម្មខ្នាតតូច (AIMS) នេះបញ្ចប់ ប្រជាជន ៧៥០០០គ្រួសារ នឹងបង្កើនប្រាក់ចំណូលរបស់ខ្លួន។ មានន័យថាចំណូលសរុបពីវិស័យកសិកម្ម នឹងឡើងដល់ ៣០ភាគរយ នៃប្រភពចំណូលនានា គឺកើនពី ១៦ភាគរយ (ការសិក្សានៅឆ្នាំ២០១៤)៕
Tag:
ទីផ្សារ
កសិកម្ម
អាជីវកម្ម
© រក្សាសិទ្ធិដោយ thmeythmey.com