កីឡាជាតិ
ជាតិ
ការនាំចូលកីឡាករបរទេសពីររូបរបស់ប៉ូលិសធ្វើឲ្យណាហ្គាវើលខ្លាចរអា តែយ៉ាងណានៅតែរំពឹងឈ្នះ
× លោក មាស ចាន់ណា គ្រូបង្វឹកក្រុមណាហ្គាវើលហាក់មានការខ្លាចរអា ចំពោះសមត្ថភាពរបស់ក្រុមអគ្គស្នងការនគរបាលជាតិ(ប៉ូលិស)បន្ទាប់ពីក្រុមនេះបាននាំចូលកីឡាករបរទេសថ្មី២រូបបន្ថែម។ តែយ៉ាងណា គ្រូបង្វឹករូបនេះនៅតែរំពឹងឈ្នះជាលើកទី២ក្នុងជំនួបជើងទី២នៃពានរង្វាន់ក្របខណ្ឌមិត្តហ្វូនខេមបូឌានលីកនៅពហុកីឡដ្ឋានជាតិនាល្ងានថ្ងៃទី២៤ ខែឧសភា នេះ។
ទោះបីក្រុមណាហ្គាវើលធ្លាប់យកឈ្នះប៉ូលិស ២-១ កាលពីជើងទី១ក៏ដោយ ប៉ុន្តែការមិនស្គាល់ពីសមត្ថភាព និងការលេងនៅតំបន់ណារបស់កីឡាករបរទេសថ្មី២រូបរបស់ប៉ូលិស បានធ្វើឲ្យគ្រូបង្វឹកក្រុមណាហ្គាវើលលោក មាស់ ចាន់ណា មានក្តីបារម្ភសម្រាប់ការប៉ះប៉ូលិសមុនគេបង្អស់ក្នុងថ្ងៃបើកឆាកជើងទី២ពានរង្វាន់លីកកំពូលកម្ពុជា។
ជំនួបក្រុមណាហ្គាវើលយកឈ្នះក្រុមប៉ូលិស ២-១ ក្នុងជើងទី១កាលពីពេលកន្លងទៅ
តែយ៉ាងណា គ្រូបង្វឹករូបនេះនៅតែមានមហិច្ឆតា និងក្តីរំពឹងយកឈ្នះក្រុមប៉ូលិស សម្រាប់ការជួបគ្នាជាលើកទី២ក្នុងជំនួបជើងទី២នៃពានរង្វាន់ក្របខណ្ឌមិត្តហ្វូនខេមបូឌានលីកឆ្នាំ២០១៧ នាវេលាម៉ោង៦ល្ងាចនេះនៅពហុកីឡដ្ឋានជាតិ។ «ក្នុងនាមជាគ្រូបង្វឹកតែងតែមានក្តីរំពឹងជានិច្ច។ ប៉ុន្តែសម្រាប់ជំនួបល្ងាចនេះ ខ្ញុំគិតថា មិនមែនងាយស្រួលក្នុងការយកឈ្នះនោះទេ ព្រោះក្រុមនេះទើបនាំចូលកីឡាករបរទេសថ្មីពីររូប ដោយយើងមិនដឹងថាពួកគេលេងក្នុងតំណែងអ្វី ដូច្នេះវាមានការលំបាកសម្រាប់ការជួបមុនគេ របស់ណាហ្គាវើល»។ នេះជាការលើកឡើងរបស់លោក មាស ចាន់ណា។
តាមរយៈបទពិសោធន៍ការជួបផ្ទាល់ និងមើលការប្រកួតផ្សេងៗរបស់ក្រុមប៉ូលិស គ្រូបង្វឹកក្រុមណាហ្គាវើលរូបនេះកត់សម្គាល់ឃើញថា មិនចំពោះតែក្រុមណាហ្គាវើលប៉ុណ្ណោះទេ ដែលមានការលំបាកក្នុងការយកឈ្នះប៉ូលិស សូម្បីតែក្រុមដទៃផ្សេងទៀតក៏មានការលំបាកដូចគ្នា។ ដូច្នេះការជួបគ្នានាល្ងាចនេះ លោក គិតថា ជាជំនួបមួយដ៏តានតឹងបំផុតសម្រាប់ក្រុមទាំងពីរ។
ក្រុមណាហ្គាវើលបាននាំចូលកីឡាករថ្មីមួយរូបផងដែរសម្រាប់ជើងទី២នេះ គឺកីឡាករ គួច ដានី តែគ្រូបង្វឹកក្រុមណាហ្គាវើលបានអះអាងថា គឺគ្រាន់តែយកមកបង្គ្រប់លក្ខខណ្ឌក្នុងពានរង្វាន់សម្តេច ហ៊ុន សែន តែប៉ុណ្ណោះ៕
Tag:
Cambodian League 2017
មាស ចាន់ណា
ណាហ្គាវើល
ប៉ូលិស
© រក្សាសិទ្ធិដោយ thmeythmey.com