អន្តរជាតិ
ករណីបំផ្ទុះគ្រាប់បែកអត្តឃាតនៅរដ្ឋធានីហ្សារកាតាសម្លាប់មនុស្ស ៥នាក់ រូបភាព DW
× តុល្យការចុងក្រោយចំនួនអ្នកស្លាប់ក្នុងករណីបំផ្ទុះគ្រាប់បែកពីរគ្រាប់នៅភាគខាងកើតក្រុងហ្សាការតា មានរហូតដល់ ប្រាំនាក់ក្នុងនោះមានប៉ូលិសបីនាក់ និងជនសង្ស័យជាអ្នកបំផ្ទុះគ្រាប់ពីរនាក់ផ្សេងទៀតដែរ។ គេមិនទាន់អាចដឹងច្បាស់នៅឡើយទេថា ក្រុមណាមួយនៅពីក្រោយករណីវាយប្រហារដោយគ្រាប់បែកអត្តឃាតនេះ។
គ្រាប់បែកពីរគ្រាប់ត្រូវបានគេបំផ្ទុះនៅយប់ថ្ងៃពុធទី ២៤ ឧសភា នៅស្ថានីយ៍រថយន្តមួយនៅភាគខាងកើតក្រុងហ្សាការតា។ ចុងក្រោយ ករណីវាយប្រហារភេរវកម្មនេះបានសម្លាប់មនុស្សចំនួនប្រាំ នាក់ និងធ្វើឲ្យមនុស្ស ១០នាក់ផ្សេងទៀតរងរបួសផងដែរ។
យោងតាមសារព័ត៌មាន Channel News Asia ក្នុងចំណោមនុស្សស្លាប់ប្រាំនាក់នោះមាន បីនាក់ជាប៉ូលិស និងពីរនាក់ផ្សេងទៀតជាជនសង្ស័យដែលជាអ្នកបំផ្ទុះគ្រាប់បែកអត្តឃាតនេះ។ ចំណែកមនុស្សដែលរងរបួសទាំង ១០នាក់ត្រូវបានគេបញ្ជូនទៅជួយសង្គ្រោះនៅមន្ទីរពេទ្យរួចរាល់បន្ទាប់ពីមានឧបទ្ទវហេតុកើតឡើង។
មកដល់ពេលនេះគេមិនទាន់អាចដឹងច្បាស់នៅឡើយទេថា អ្នកណាជាអ្នកនៅពីក្រោយករណីវាយប្រហារភេរវកម្មនេះ ថ្វីបើមានការសន្និដ្ឋានជាមុនថា ក្រុមភេរវជនដែស្ហ រដ្ឋឥស្លាមជាអ្នកនៅពីក្រោយ។
អ្នកនាំពាក្យនគរបាលជាតិឥណ្ឌូណេស៊ី Setyo Wasisto បានប្រាប់អ្នកសារព័ត៌មានថា ការវាយប្រហារនេះជាការបំផ្ទុះគ្រាប់បែកអត្តឃាត ហើយប៉ូលិសប្រាំនាក់ផ្សេងទៀតស្ថិតក្នុងចំណោមអ្នករងរបួសផងដែរ។ អ្នកនាំពាក្យរូបនេះក៏បានចូលរួមរម្លែកទុក្ខចំពោះក្រុមគ្រួសារប៉ូលិសដែលស្លាប់បាត់បង់ជីវិតក្នុងករណីវាយប្រហារនេះ ប៉ុន្តែលោកនៅមិនទាន់អាចបញ្ជាក់បាននៅឡើយពាក់ព័ន្ធក្រុមនៅពីក្រោយការវាយប្រហារនេះ។
តាមពិតទៅករណីបំផ្ទុះគ្រាប់បែកនៅកណ្តាលរដ្ឋធានីហ្សាការតានេះ កើតឡើងមួយថ្ងៃក្រោយពេលដែលក្រុមភេរវជន Maute ជាក្រុមប្រកាសភក្តីភាពចំពោះក្រុមភេរវជនដែស្ហ (Desh) ឬក្រុមភេរវជនរដ្ឋឥស្លាមនៅក្រុង Marawi នៅកោះមិនដាណាវប្រទេសហ្វីលីពីន បើកការប្រយុទ្ធគ្នាជាមួយកងកម្លាំងរដ្ឋាភិបាល។ យ៉ាងប៉ូលិសម្នាក់និងទាហានពីរនាក់បានស្លាប់ក្នុងការប៉ះទង្គិចគ្នានេះ។
ឥណ្ឌូណេស៊ីប្រឈមមុខការអុកឡុកពីសំណាក់ក្រុមប្រដាប់អាវុធឥស្លាមជ្រុលនិយមអស់រយៈពេលជាច្រើនឆ្នាំមកហើយ។ ប៉ុន្តែបច្ចុប្បន្ននេះឥណ្ឌូណេស៊ីរឹតតែបារម្ភខ្លាំងពីចលនាភេរវកម្មនិងការកើនឡើងនៃចលនាជ្រុលនិយមដែលជាប់ពាក់ព័ន្ធក្រុមភេរវជនរដ្ឋឥស្លាមឬក្រុមដែស្ហ។ ហើយអ្វីដែលគួរឲ្យកត់សម្គាល់នោះ ការវាយប្រហារភេរវកម្មម្នាក់ៗបែបនេះកើតឡើងញឹកញាប់បំផុតនៅឥណ្ឌូណេស៊ី ចាប់ពីឆ្នាំ ២០១៦មក។
ខែមករាឆ្នាំ ២០១៦ ក្រុមប្រដាប់អាវុធបួននាក់ដែលប្រកាសភក្តីភាពចំពោះក្រុមភេរវជនដែស្ហបានអុកឡុកទីក្រុងហ្សាការតាដោយប្រើប្រាស់កាំភ្លើងនិងគ្រាប់បែកដើម្បីធ្វើសកម្មភាព។ ការវាយប្រហារនេះបានធ្វើឲ្យមនុស្ស ប្រាំបីនាក់ស្លាប់រួមទាំងក្រុមភេរវជនទាំងបួននាក់ផងដែរ៕
Tag:
ហ្សាការតា
វាយប្រហារភេរវកម្ម
Setyo Wasisto
© រក្សាសិទ្ធិដោយ thmeythmey.com