អន្តរជាតិ
បញ្ចប់ទស្សនកិច្ចក្រៅប្រទេស លោក ត្រាំ ត្រឡប់ចូលស្រុកជាមួយបញ្ហាកំពុងរង់ចាំ ប្រធានាធិបតី ដូណាល់ ត្រាំ ថ្លែងទៅកាន់ទាហានអាមេរិកនៅអ៊ីតាលី (រូបភាព Reuters)
× ពីអារ៉ាប៊ីសាអូឌីត ទៅអ៊ីស្រាអែល បន្ទាប់មកទៅប៉ាឡេស្ទីន រួចបន្តដំណើរទៅកាន់បុរីវា់ទីកង់ បែលហ្ស៊ិក និងចុងក្រោយអ៊ីតាលី ប្រធានាធិបតី ដូណាល់ ត្រាំ បានបញ្ចប់ទស្សនកិច្ចក្រៅប្រទេសលើកទីមួយដោយក្ដីរីករាយផង និងក្ដីទោមនស្សផង។ លោក ត្រាំ ចាប់ផ្ដើមទស្សនកិច្ចរយៈពេលវែងដោយការសម្រេចបានកិច្ចព្រមព្រៀងតម្លៃរាប់លានដុល្លារនៅមជ្ឈិមបូព៌ា ប៉ុន្តែនៅអឺរ៉ុប គឺសោះកក្រោះខ្លាំង។ នៅពេលនេះ លោក ត្រាំ ត្រឡប់មកស្រុកវិញ ដោយមានបញ្ហាច្រើនកំពុងរង់ចាំលោក។
ប្រធានាធិបតីអាមេរិក ដូណាល់ ត្រាំ បានត្រឡប់ទៅកាន់អាមេរិកវិញហើយ បន្ទាប់ពីបានបញ្ចប់ទស្សនកិច្ចក្រៅប្រទេសរយៈពេល៩ថ្ងៃនៅមជ្ឈិមបូព៌ា និងអឺរ៉ុប។ នៅមជ្ឈិមបូព៌ា លោក ត្រាំ បានបង្ហាញជំហរទន់ភ្លន់ដាក់សម្ព័ន្ធមិត្តរបស់ខ្លួន ដោយមិនបានលើកឡើងអ្វីសោះទាក់ទងបញ្ហាសិទ្ធិមនុស្ស តែលោកទំនងជាពេញចិត្តនឹងបដិសណ្ឋារកិច្ចដ៏អធិកធមដែលមហាក្សត្រអារ៉ាប៊ីសាអូឌីតរៀបចំជាពិសេសសម្រាប់លោក។
នៅអឺរ៉ុបវិញ លោក ត្រាំ បានប្រែផ្លាស់អាកប្បកិរិយារបស់លោក ខុសពីអ្វីដែលបានធ្វើនៅមជ្ឈិមបូព៌ា។ លោក ត្រាំ បានបន្តដាក់សម្ពាធឲ្យសម្ព័ន្ធមិត្តជាសមាជិកសម្ព័ន្ធយោធាណាតូ បង្កើនការចំណាយឲ្យបានពីរភាគរយនៃផលិតផលក្នុងសរុបតាមការសន្យារបស់ពួកគេ។ បន្ទាប់មកក្នុងកិច្ចប្រជុំមហាអំណាចសេដ្ឋកិច្ចទាំង៧ (G7) ប្រធានាធិបតីអាមេរិក ក៏មិនទាន់ផ្ដល់ចម្លើយឲ្យបានច្បាស់លាស់ជុំវិញជំហរដកខ្លួនពីកិច្ចព្រមព្រៀងបម្រែបម្រួលអាសធាតុដែរ។
យ៉ាងណាក្ដី ទស្សនកិច្ចក្រៅប្រទេសមួយជុំលើកនេះ អាមេរិក ក៏ទទួលបានប្រយោជន៍មិនតិចដែរ។ បើតាមទីភ្នាក់ងារព័ត៌មាន Reuters លោក ត្រាំ បាននិយាយថា លោកបានប្រមូលកម្លាំងអន្តរជាតិបានច្រើនក្នុងការប្រយុទ្ធប្រឆាំងភេរវកម្មនិយម ហើយលោកចាត់ទុកជានេះជោគជ័យមួយក្នុងដំណើរទស្សនកិច្ចនេះ។ លើសពីនោះ អាមេរិក និងអារ៉ាប៊ីសាអូឌីត ក៏បានចុះកិច្ចព្រមព្រៀងទិញអាវុធតម្លៃ១១០ពាន់លានដុល្លារថែមទៀត។
យ៉ាងណាមិញ ប្រធានាធិបតីអាមេរិក មិនបានធ្វើសន្និសីទកាសែតបិទបញ្ចប់ទស្សនកិច្ចដូចរាល់ដងឡើយ។ នេះ ទំនងជាលោក ត្រាំ មិនចង់ឆ្លើយនឹងសំណួររបស់អ្នកសារព័ត៌មាន ដែលនឹងសួរនាំលោកជុំវិញបញ្ហាក្នុងស្រុក គឺការស៊ើបអង្កេតរបស់ FBI ពាក់ព័ន្ធនឹងលូកដៃរបស់រុស្ស៊ីក្នុងការរៀបចំលទ្ធផលនៃការបោះឆ្នោតឆ្នាំ២០១៦ ។ បញ្ហានេះ កំពុងអុកឡុករដ្ឋបាលលោក ត្រាំ កាន់តែខ្លាំង ព្រោះសូម្បីតែកូនប្រសាររបស់លោក ក៏មានឈ្មោះជាប់ពាក់ព័ន្ធដែរ។
បញ្ហានេះ ធ្វើឲ្យលោក ត្រាំ ឈឺក្បាលខ្លាំង ព្រោះការស៊ើបអង្កេតនៅតែបន្ត បើទោះជាលោកបានបណ្ដេញលោក ចន ខូមី (John Comey) ពីតំណែងនាយក FBI ក្ដី។ ក្រុមប្រជាធិបតេយ្យបានរិះគន់លោក ត្រាំ លើការបណ្ដេញលោក ខូមី ដោយចោទលោកថាព្យាយាមបិទបាំងសកម្មភាពរបស់លោក។ យ៉ាងណាក្ដី នាយកស្ដីទី FBI ដែលចូលកាន់តំណែងបន្តពីលោក ខូមី ក៏ប្រកាសបន្តការស៊ើបអង្កេតលើក្រុមការងារបោះឆ្នោតរបស់លោក ត្រាំ ដើម្បីស្វែងរកការពិត៕
© រក្សាសិទ្ធិដោយ thmeythmey.com