ជាតិ
សង្គមជាតិ
កម្មការនីម្នាក់ស្លាប់ និង២៤នាក់សន្លប់ ក្នុងឧបទ្ទវហេតុនៅរោងចក្រអាកាសសិត
× ភ្នំពេញ៖ កម្មការនីម្នាក់បានស្លាប់នៅតាមផ្លូវបញ្ជូនទៅមន្ទីរពេទ្យ និង២៤នាក់ទៀត សន្លប់ នៅក្នុងរោងចក្រមួយក្នុងខណ្ឌដង្កោ ជាយខាងត្បូងរាជធានីភ្នំពេញ។ នេះបើតាមសេចក្តីប្រកាសព័ត៌មាន របស់ក្រសួងការងារ និងបណ្តុះបណ្តាលវិជ្ជាជីវៈ ដែលបានផ្សព្វផ្សាយនៅថ្ងៃទី៣១ ខែឧសភានេះ។
កម្មការនី ឈ្មោះ ខាត់ សាម៉ើ បម្រើការងារនៅក្រុមហ៊ុនអាកាសសិត ហ្គាមិន ខូអិលធីឌី បានស្លាប់នៅតាមផ្លូវបញ្ជូនទៅមន្ទីរពេទ្យ ដោយសារកម្មការនីខាងលើនេះ បានដួលក្នុងបន្ទប់ទឹកនៅក្នុងរោងចក្រដែលខ្លួនកំពុងបម្រើការងារ។ ហេតុការណ៍នេះ បានកើតឡើងនៅរសៀលថ្ងៃទី៣១ ឧសភា នៅក្នុងរោងចក្រខាងលើ ដែលមានទីតាំងស្ថិតនៅក្នុងភូមិទឹកថ្លា ក្នុងសួនវឌ្ឍន២ ផ្លូវជាតិលេខ៣ សង្កាត់ខណ្ឌដង្កោជាយខាងត្បូងរាជធានីភ្នំពេញ។
សេចក្តីប្រកាសព័ត៌មានក្រសួងការងារបានសរសេរថា៖«បន្ទាប់ពីកម្មការនី ខាត់ សាម៉ើ ដួលសន្លប់ក្នុងបន្ទប់ទឹក ត្រូវបានក្រុមហ៊ុនបញ្ជូនទៅសង្គ្រោះភ្លាមនៅមន្ទីរសម្រាកព្យាបាល ឃាង មុន្លីវុត រួចបញ្ជូនបន្តទៅមន្ទីរពេទ្យកាល់ម៉ែត ដោយស្ថានភាពធ្ងន់ធ្ងរ ជនរងគ្រោះបានស្លាប់នៅតាមផ្លូវ»។
សេចក្តីប្រកាសខាងលើ ដែលបានចុះផ្សាយនៅលើទំព័រហ្វេសប៊ុកផ្លូវការរបស់ក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា ដំណឹងនៃការស្លាប់របស់កម្មការនីខាងលើ បានធ្វើកម្មករដែលធ្វើការងារក្នុងរោងចក្រចំនួន២៤នាក់ មានការភិតភ័យ បណ្តាលឲ្យសន្លប់តៗគ្នា។ «កម្មការនីទាំង២៤នាក់ បានបញ្ជូនមកព្យាបាលនៅមន្ទីរសម្រាកព្យាបាល ឃាង មុន្លីវុត ដោយឡែក អ្នកស្លាប់ ត្រូវបានបញ្ជូនទៅគេហដ្ឋាន ដើម្បីធ្វើបុណ្យតាមប្រពៃណីខ្មែរ»។
ពាក់ព័ន្ធបញ្ហាខាងលើនេះ ក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ថា ក្រសួងនឹងបន្តជួយដោះស្រាយទុក្ខលំបាករបស់កម្មការនី និងក្រុមគ្រួសារ តាមគោលរបបសន្តិសុខសង្គមនៃបេឡាជាតិរបបសន្តិសុខសង្គម៕
Tag:
កាត់ដេរ
កម្មករ
ស្លាប់
© រក្សាសិទ្ធិដោយ thmeythmey.com