កីឡាអន្តរជាតិ
អន្តរជាតិ
Man Utd ខកចិត្ត ដ្បិត Griezmann សម្រេចមិនចាកចេញពី At-Madrid
× Antoine Griezmann បានបញ្ជាក់យ៉ាងច្បាស់ថាគេនឹងបន្តរួមរស់ជាមួយ Atletico Madrid នៅរដូវកាលក្រោយនេះទៀត និងថែមទាំងលើកហេតុផលថា វាជាការផ្ទេមួយដ៏អាក្រក់បំផុតបើសិនជាចាកចេញពីក្រុមដែលកំពុងជាប់បម្រាមមិនអាចទិញកីឡាករចូលរហូតដល់ខែមករា ឆ្នាំ២០១៨។
ខ្សែប្រយុទ្ធវ័យ២៦ឆ្នាំរូបនេះ ធ្លាប់មានទំនាក់ទំនងខ្លាំងជាមួយនឹងការផ្ទេទៅកាន់ Manchester United នៅរដូវកាលថ្មីខាងមុខនេះ។ ប៉ុន្តែដោយសារ ចាញ់បណ្តឹងជុំវិញបញ្ហាបម្រាមទិញដូរកីឡាករជាអនីតិជនខុសនឹងច្បាប់ FIFA ហើយតុលាការអាជ្ញាកណ្តាលកីឡា CAS ប្រកាសឲ្យ Atletico Madrid ចាញ់ក្តី មិនអាចនាំចូលកីឡាករបានរហូតដល់ខែមករាឆ្នាំក្រោយនោះ Griezmann ក៏បានសម្រេចចិត្តមិនចាកចេញពទៅចូលរួមជាមួយក្រុមផ្សេងឡើយ។
អតីតសមាជិកក្រុម Real Sociedad ដែលធ្លាប់ជាប់ឈ្មោះលំដាប់ទី៣ជាកីឡាល្អប្រចាំឆ្នាំលំដាប់ពិភពលោក Ballon d'Or កាលពីឆ្នាំមុនបានប្រាប់ទូរទស្សន៍បារាំងថា៖« វាជាពេលលំបាកសម្រាប់ក្លិប។ វាពិតជាអាក្រក់មើលណាស់ប្រសិនបើខ្ញុំចាកចេញនៅពេលនេះ ហើយខ្ញុំបាននិយាយជាមួយថ្នាក់ដឹកនាំក្លិបរួចហើយ ថាយើងនឹងបន្តជាមួយគ្នានៅរដូវកាលក្រោយនេះទៀត»។
មុនការសម្រេចបន្តស្នាក់នៅទឹកដី Vicente Calderón ខ្សែប្រយុទ្ធអន្តរជាតិបារាំងរូបនេះ ក៏ធ្លាប់ប្រាប់ទូរទស្សន៍បារាំង French TV ក្នុងកម្មវិធី Quotidien ដែរថារូបគេអាចផ្លាស់ទៅកាន់ទឹកដី Old Trafford នារដូវក្តៅខាងមុខនេះជាមួយនឹងភាគរយ ៦លើ១០។ លើសពីនេះទៅទៀតនោះ គេឃើញមានក្រុមអ្នកគាំទ្ររបស់បិសាចក្រហមមួយចំនួនបានពាក់អាវលេខ៧ ជាមួយនឹងឈ្មោះ Griezmann រួចទៅហើយនាពេលកន្លងមកផងដែរ។
ដំណឹងនេះអាចជាការខកចិត្តខ្លាំងដែសម្រាប់ Man Utd និងអ្នកគាំទ្រទាំងអស់ដែលរំពឹងថានឹងបានរូបគេមករួមក្រុមនារដូវកាលក្រោយ៕
Tag:
បាល់ទាត់
Antoine Griezmann
Atletico Madrid
Manchester United
© រក្សាសិទ្ធិដោយ thmeythmey.com