កីឡាអន្តរជាតិ
អន្តរជាតិ
Ronaldo បង្កប់ន័យឌឺដង Messi តាមរយៈរូបមួយសន្លឹកក្នុងបណ្តាញសង្គម
× Cristiano Ronaldo បានជួយ Real Madrid ឈ្នះជើងឯក UEFA Champions League លើកទី១២ ពីជ័យជម្នះ៤-១ លើក្រុម Juventus នាការប្រកួតផ្តាច់ព្រ័ត្រ ក្នុងក្រុង Cardiff ប្រទេសវេលស៍កាលពីចុងសប្តាហ៍កន្លងទៅ និងអាចបង្កើតកំណត់ត្រាជាច្រើនមិនធ្លាប់មានពីមុនមកក្នុងប្រវត្តិសាស្ត្របាល់ទាត់។ ជាមួយគ្នានេះ CR7 បានបង្ហោះរូបកាត់តមួយសន្លឹកលើបណ្តាញសង្គម Instagram ក្នុងន័យដឺដងដល់ខ្សែប្រយុទ្ធ Barcelona កីឡាករ Lionel Messi ថែមទៀត។
ក្រោយរកបានពីរគ្រាប់ក្នុងចំណោម៤គ្រាប់ ខ្សែប្រយុទ្ធអន្តរជាតិព័រទុយហ្គាល់រូបនេះ ក្លាយជាកីឡាករដែលអាចស៊ុតបញ្ចូលទីបាន៣លើកក្នុងការប្រកួតផ្តាច់ព្រ័ត្រ Champions League។ ជាមួយគ្នានេះដែរ Ronaldo ក៏អាចរកបានគ្រាប់ទី១២ ពីការប្រកួតក្របខណ្ឌអឺរ៉ុបរដូវកាលនេះ លើសគូប្រជែង Lionel Messi ដែលរកបាន១១គ្រាប់។
យ៉ាងណាក៏ដោយ បើតាម Express ចុះផ្សាយនៅថ្ងៃទី៥ ខែមិថុនានេះ តារាពូកែស៊ុតបាល់បញ្ចូលទី វ័យ៣២ឆ្នាំ នៅតែអាចរកពេលដើម្បីឆ្នៃរូបភាពមួយសន្លឹក Troll ដៃគូប្រជែង Messi ក្នុងន័យលេងសើចទៀតផង។ រូបភាពនោះ ប្រធានក្រុមជម្រើសជាតិអាហ្សង់ទីន វ័យ២៩ឆ្នាំ បានឈរហុចពាន Ballon d'Or ទៅឲ្យ Ronaldo ខណៈរូបគេសើចរំភើប ប្រៀបដូចជាគូស្នេហ៍មួយគូហុចចិញ្ជៀនដើម្បីសុំរៀបការអ៊ីចឹង។
បន្ទាប់ពីជួយក្រុមក៏ដូចជារូបគេផ្ទាល់ដើម្បីបង្កើតកំណត់ត្រាបាល់ទាត់ជាច្រើននោះ អតីតសមាជិកក្រុមបិសាចក្រហម ដែលអាចរកបានគ្រាប់ទី៦០០ពីគ្រប់កម្មវិធីនេះ ត្រូវបានគេមើលឃើញថា អាចរំពឹងខ្ពស់ និងមានភាគរយច្រើនដើម្បីឈ្នះពាន Ballon d'Or ជាលើកទី៥ ស្មើជាមួយនឹង Messi ដែរ៕
Tag:
បាល់ទាត់
Champions League
Ballon d\'Or
Cristiano Ronaldo
Lionel Messi
© រក្សាសិទ្ធិដោយ thmeythmey.com