ជាតិ
ភ្លៀងអាចធ្លាក់នៅទូទាំងប្រទេសពីថ្ងៃទី៦ ដល់ទី១២ ខែមិថុនា
× ភ្នំពេញ៖ បើតាមការអង្កេតស្ថានភាពអាកាសធាតុរបស់ក្រសួងធនធានទឹក និងឧតុនិយម ជ្រលងសម្ពាធទាប កំពុងគ្របដណ្ដប់លើភាគខាងកើត និងខ្ពង់រាបភាគឦសាននៃផ្ទៃប្រទេសកម្ពុជា។ ទន្ទឹមនឹងនេះ ខ្យល់មូសូងនិរតី ក៏កំពុងបង្កើនឥទ្ធិពល មកលើកម្ពុជាផងដែរ។ ស្ថានភាពទាំងនេះ អាចនឹងបង្កឲ្យមានភ្លៀវធ្លាក់នៅតាមបណ្ដាខេត្តនានា រួមទាំងភ្នំពេញផង ក្នុងកំឡុងថ្ងៃទី៦ ដល់ថ្ងៃទី១២ខែមិថុនា។ នេះបើតាមសេចក្ដីជូនដំណឹងរបស់ក្រសួងធនធានទឹក និងឧតុនិយម។
ក្រសួងធនធានទឹក និងឧតុនិយម បានព្យាករថា ខេត្តកោះកុង ព្រះសីហនុ និងខេត្តកែប អាចនឹងមានភ្លៀងធ្លាក់រាយប៉ាយច្រើន។ នៅលើផ្ទៃសមុទ្រ អាចនឹងមានភ្លៀងធ្លាក់ លាយឡំនឹងខ្យល់បក់បោកខ្លាំង ធ្វើឲ្យផ្ទៃសមុទ្រមានរលកខ្ពស់។
ចំណែកនៅខេត្តព្រៃវែង ស្វាយរៀង កំពង់ចាម ត្បូងឃ្មុំ ក្រចេះ និងខេត្តមណ្ឌលគិរី អាចនឹងមានភ្លៀងធ្លាក់ច្រើន។ នេះបើតាមក្រសួងធនធានទឹកដដែល ដែលបន្តថា ខេត្តប៉ៃលិន បាត់ដំបង ពោធិ៍សាត់ សៀមរាប បន្ទាយមានជ័យ ឧត្តរមានជ័យ ព្រះវិហារ កំពង់ធំ កំពង់ឆ្នាំង ស្ទឹងត្រែង និងខេត្តរតនគិរី អាចនឹងមានភ្លៀងធ្លាក់ពីមធ្យមទៅបង្គួរ។ ដោយឡែកក្រុងភ្នំពេញ ខេត្តកំពង់ស្ពឺ កណ្ដាល តាកែវ និងខេត្តកំពត អាចនឹងមានភ្លៀងធ្លាក់ពីតិចទៅមធ្យម។
ជាមួយគ្នានេះ ក្រសួងអំពាវនាវដល់ប្រជានេសាទ និងអ្នកធ្វើដំណើរតាមសមុទ្រទាំងអស់ ត្រូវបង្កើនការប្រុងប្រយ័ត្នខ្ពស់ ពិសេសចាប់ពីថ្ងៃទី៦ដល់ថ្ងៃទី១១ខែមិថុនា ៕
© រក្សាសិទ្ធិដោយ thmeythmey.com