កម្មករ កម្មការិនី នៅរោងចក្រសៅលែន រាប់រយនាក់នៅតែបន្តធ្វើកូដកម្ម មិនចូលធ្វើការ ដោយសារថៅកែរោងចក្រនេះ នៅតែមិនប្តូរបំណងកាត់ប្រាក់បំណាច់ឆ្នាំរបស់ពួកគេ អំឡុងពេលកម្មករធ្វើដំណើរទៅបោះឆ្នោត។ មកដល់ថ្ងៃទី ៧ ខែ មិថុនា ភាគីខាងរោងចក្រនៅមិនទាន់មានដំណោះស្រាយណាមួយ ដែលធ្វើឲ្យកម្មករយល់ស្របនោះទេ។ ក្រុមកម្មករ គ្រោងនាំគ្នាទៅតវ៉ា នៅក្រសួងការងារវិញម្តង ប្រសិនបើរោងចក្រ នៅតែមិនមានដោះស្រាយតាមការចង់បានរបស់ពួកគេទេនោះ។
ការនាំគ្នាទៅតវ៉ានៅក្រសួងការងារ គឺជាជំហានបន្ទាប់ ដែលក្រុមកម្មករ កម្មការិនីនៃរោងចក្រសៅលែន នឹងធ្វើបន្ត ប្រសិនបើការតវ៉ារបស់ពួកគេនៅមុខរោងចក្រសៅលែន មិនមានប្រសិទ្ធភាព។ រោងចក្រកាត់ដេរសម្លៀកបំពាក់ សៅលែន ឬហៅរោងចក្រ ៦ ជាន់ ស្ថិតនៅភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ហើយបច្ចុប្បន្នរោងចក្រនេះ មានកម្មករប្រមាណ ១ ពាន់នាក់។
ការតវ៉ារបស់កម្មករ កម្មការិនីរោងចក្រនេះ រាប់រយនាក់ ដោយសាររឿងឈប់សម្រាកពេលបោះឆ្នោត។ កម្មករ ខឹងសម្បារនឹងថៅកែរោងចក្រ ដែលកាត់លុយបណាច់ឆ្នាំរបស់ពួកគេចំនួនពីរថ្ងៃ ក្រោមហេតុផលថា កម្មករ ធ្វើដំណើរទៅបោះឆ្នោត មុនថ្ងៃបោះឆ្នោតមួយថ្ងៃ ពោលគឺនៅថ្ងៃសៅរ និងក្រោយបោះឆ្នោតមួយថ្ងៃ គឺថ្ងៃចន្ទ។ ថ្ងៃអាទិត្យ ជាថ្ងៃបោះឆ្នោតជ្រើសរើសក្រុមប្រឹក្សាឃុំ សង្កាត់ ខាងរោងចក្រ ឲ្យកម្មករឈប់សម្រាក ដោយមិនកាត់លុយនោះទេ ពីព្រោះអនុវត្តតាមការសម្រេចរបស់ក្រសួងការងារ និងបណ្តុះបណ្តាលជីវៈ។
អ្នកស្រី អ៊ិន សានី កម្មការិនី ដែលកំពុងតវ៉ានៅមុខរោងចក្រសៅលែន និយាយថា កម្មករ កម្មការិនី ដែលមកធ្វើការនៅភ្នំពេញ ភាគច្រើនរស់នៅតាមបណ្តាខេត្ត ដោយអ្នកខ្លះមកពីខេត្តរតនៈគិរី មណ្ឌលគិរី បាត់ដំបង កំពង់ចាម ព្រៃវែង ស្វាយរៀង ជាដើម ដែលមិនអាចឲ្យពួកគេ ធ្វើដំណើរទៅមក ដើម្បីបោះឆ្នោត ត្រឹមតែរយៈពេលមួយថ្ងៃនោះទេ។ «បោះឆ្នោតថ្ងៃអាទិត្យ ពួកយើងត្រូវទៅថ្ងៃសៅរ ហើយត្រឡប់មកវិញនៅថ្ងៃចន្ទ បានគ្រប់គ្រាន់។ តែរោងចក្របែរជាកាត់លុយយើងទៅវិញ។ យើងមិនអាចទទួលយកបានទេ»។ នេះជាការលើកឡើងរបស់កម្មការិនីវ័យ ៣០ ឆ្នាំ មកពីខេត្តស្វាយរៀងខាងលើ។
នៅក្បែរអ្នកស្រី អ៊ិន សានី កញ្ញា ស ចិន្តា កម្មការិនី ម្នាក់ទៀត ដែលចូលរួមតវ៉ាដែរនោះ បានប្រាប់សារព័ត៌មានថ្មីៗបន្ថែមលើអ្នកស្រី សានី ថា ការតវ៉ារបស់កម្មករ កម្មការិនី ធ្វើឡើងតាំងពីរសៀលថ្ងៃសុក្រទី ២ ខែមិថុនា មកម្លេះ នៅពេលដែលកម្មករទទួលព័ត៌មានពីថៅកែរោងចក្រថា ភាគីរោងចក្រ នឹងកាត់ប្រាក់បំណាច់ឆ្នាំចំនួនពីរថ្ងៃ បើកម្មករ ឈប់សម្រាក ថ្ងៃសៅរ និងថ្ងៃចន្ទ ដើម្បីធ្វើដំណើរទៅបោះឆ្នោត និងត្រឡប់មកពីបោះឆ្នោតនៅឯស្រុកកំណើតវិញ។ កម្មការិនីវ័យ ២០ ឆ្នាំ មកពីខេត្តព្រៃវែងរូបនេះ រៀបរាប់យ៉ាងនេះថា៖« យើងតវ៉ា តែភាគីរោងចក្រ មិនអើពើ ទើបយើងទុកការតវ៉ាមួយឡែក ដោយនៅថ្ងៃសៅរយើងធ្វើដំណើរទៅស្រុកកំណើតដើម្បីទៅបោះឆ្នោតសិន»។
ក្រោយត្រឡប់មកពីបោះឆ្នោតវិញ នៅថ្ងៃអង្គារ ក្រុមកម្មករគ្រោងនឹងចូលធ្វើការវិញ ប្រសិនបើភាគីរោងចក្រមិនសម្រេចកាត់លុយពួកគេ តែផ្ទុយទៅវិញ ក្តីសង្ឃឹមរបស់កម្មករ មិនបានដូចបំណងឡើយ ដោយរោងចក្រនៅតែរក្សាជំហរដដែល។ ដូច្នោះហើយ កម្មករ កម្មការិនី នៅតែធ្វើកូដកម្ម មិនចូលធ្វើការនៅមុខរោងចក្រដដែលរហូតដល់ថ្ងៃទី ៧ ខែមិថុនា។
តំណាងក្រុមកម្មករដែលតវ៉ា លោក ហ៊ឹម ជីវ័ន្ត បានថ្លែងថា កម្មករ កម្មការិនី ពិតជាមិនអាចទទួលយកបានឡើយ ចំពោះទង្វើរបស់ថៅកែរោងចក្រដែលកាត់លុយបំណាច់ឆ្នាំពួកគេចំនួន ២ ថ្ងៃ ដោយគ្រាន់តែ កម្មករ ប្រើសិទ្ធិជាពលរដ្ឋ ដើម្បីទៅបោះឆ្នោត ៥ ឆ្នាំម្តងនោះ។ លោក បញ្ជាក់យ៉ាងនេះថា៖«កម្មករ-កម្មការិនីយើង កំពុងតែមានប្រែខែតិចផង មកកាត់លុយគ្នាទៀត គ្មានអាណិតគ្នាសោះឡើយ»។ បើតាមលោក ជីវ័ន្ត ជាទូទៅប្រាក់បំណាច់ឆ្នាំ ភាគីរោងចក្រគិតឲ្យកម្មករចំនួន ១៨ ថ្ងៃ ។ បើធ្វើការគណនា កម្រៃប្រាក់បំណាច់ឆ្នាំ ១ ថ្ងៃ ស្មើនឹងចំនួនប្រាក់ខែក្នុងមួយខែចែកនឹង ៣០ ថ្ងៃ។
ឆ្លើយតបនឹងការតវ៉ារបស់កម្មករ កម្មការិនី សារព័ត៌មានថ្មីៗ មិនអាចទាក់សុំការបកស្រាយពីភាគថៅកែរោងចក្របានទេ នៅថ្ងៃទី ៧ ខែមិថុនា នេះ។ យ៉ាងណា លោក ឈាន សុផាត តំណាងសហជីពខ្មែរនៅក្នុងរោងចក្រនេះ ដែលកម្មករតវ៉ាចោទថា មានទំនោរការពារក្រុមហ៊ុននោះ បាននិយាយក្រោយពីប្រជុំជាមួយភាគីរោងចក្រថា បញ្ហាដែលមិនអាចដោះស្រាយបានដោយសារ ក្រុមកម្មករមិនបន្ទន់ឥរិយាបថ ហើយលោកថា ការធ្វើកូដកម្មរបស់កម្មករ កម្មការិនី មិនមែនសំណើជាលាយលក្ខណ៍អក្សរច្បាស់លាស់ទៅក្រុមហ៊ុន ក៏ជាចំណុចដែលមិនអាចដោះស្រាយបានដែរ។
បើគ្មានការប្រែប្រួលទេនោះ នៅថ្ងៃទី ៨ ខែមិថុនា ក្រុមកម្មករ កម្មការិនី នឹងទៅតវ៉ា ដោយនាំយកញត្តិទៅដាក់នៅក្រសួងការងារ ដើម្បីឲ្យក្រសួងជួយរកដំណោះស្រាយ។ នេះបើតាមការបញ្ជាក់របស់លោក ហ៊ឹម ជីវ័ន្ត៕