កីឡាអន្តរជាតិ
អន្តរជាតិ
Ronaldo រកបាន៩៣លានដុល្លារ ក្លាយជាអត្តពលិករកចំណូលបានច្រើនជាងគេលើលោក
× Cristiano Ronaldo បានក្លាយជាអត្តពលិកដែលរកចំណូលបានច្រើនជាងគេបំផុតលើលោកប្រចាំឆ្នាំ២០១៧ ពោលគឺរកបាន៩៣លានដុល្លារក្នុងរយៈពេល១២ខែ។
ទស្សនាវដ្ដី Forbes បានស្រង់ទិន្នន័យប្រាក់ចំណូលទាំង៩៣លានដុល្លាររបស់ខ្សែប្រយុទ្ធក្រុម Real Madrid វ័យ៣២ឆ្នាំនេះ តាមរយៈប្រាក់ឈ្នួលប្រចាំឆ្នាំ ប្រាក់បន្ថែម និងការលក់សិទ្ធិផ្សាយពាណិជ្ជកម្មផ្សេងៗកាលពីឆ្នាំមុន ដែលកើនរហូតដល់ទៅ៥លានដុល្លារ។ Ronaldo ក៏ធ្លាប់គ្រងតំណែងនេះម្តងផងដែរកាលពីឆ្នាំ២០១៦។
ប្រធានក្រុមជម្រើសជាតិព័រទុយហ្គាល់រូបនេះ នាំមុខកីឡាករបាល់បោះ LeBron James ដែលរកប្រាក់បាន ៨៦លានដុល្លារ ឈរនៅចំណាត់ថ្នាក់លេខ២ និងលេខ៣គឺខ្សែប្រយុទ្ធរបស់ Barcelona កីឡាករ Lionel Messi ដែលរកចំណូលបាន ៨០លានដុល្លារ។
Forbes បានចាត់ចំណាត់ថ្នាក់ខាងលើនេះ ក្នុងចំណោមអត្តពលិកទាំង១១ប្រភេទកីឡាករផ្សេងៗគ្នា ក្នុងនោះរួមមានកីឡាករបាល់បោះមកពីក្របខណ្ឌ NBA រហូតដល់ ៣២នាក់ ក្នុងចំណោមអត្តពលិកទាំង១០០នាក់ដែលមានឈ្មោះក្នុងបញ្ជីនេះ ដែលកើនពី១៨នាក់កាលពីឆ្នាំ២០១៦។ ក្រៅពីនោះមានអ្នកកីឡាបេសប៊ល (Baseball) ២២នាក់ អ្នកលេងកីឡាបាល់ឱបរបស់អាមេរិក ១៥នាក់ កីឡាករបាល់ទាត់៩នាក់ រួមជាមួយនឹងកីឡាករផ្សេងៗទៀត។
សរុបប្រាក់ចំណូលប្រចាំឆ្នាំ២០១៦របស់អត្តពលិកទាំង១០០នាក់ដែលរកបានក្នុងរយៈពេល១២ខែចុងក្រោយ មានចំនួន ៣.១១ពាន់លានដុល្លារអាមេរិក ធ្លាក់ចុះជាងឆ្នាំមុនដែលរកបាន ៣.១៥លានដុល្លារអាមេរិក៕
ខាងក្រោមនេះជាឈ្មោះកីឡាករទាំង១០រូបដែលរកចំណូលបានច្រើនជាងគេប្រចាំឆ្នាំ២០១៧
1-Cristiano Ronaldo កីឡាករបាល់ទាត់ ($93m/£72.05m)
2-LeBron James កីឡាករបាល់បោះ ($86.2m/£66.79m)
3-Lionel Messi កីឡាករបាល់ទាត់ ($80m/£61.98m)
4-Roger Federer កីឡាករវាយកូនបាល់ ($64m/£49.58m)
5-Kevin Durant កីឡាករបាល់បោះ ($60.6m/£46.95m)
6-Andrew Luck កីឡាករបាល់ឱប ($50m/£38.74m)
7-Rory McIlroy កីឡាករវាយកូនហ្គោល ($50m/£38.74m)
8-Stephen Curry កីឡាករបាល់បោះ ($47.3m/£36.64m)
9-James Harden កីឡាករបាល់បោះ ($46.6m/£36.10m)
10-Lewis Hamilton កីឡាករប្រណាំងរថយន្ត Formula 1 ($46m/£35.64m)
Tag:
Forbes
Cristiano Ronaldo
អត្តពលិករកចំណូលច្រើនជាងគេ
© រក្សាសិទ្ធិដោយ thmeythmey.com