កម្ពុជា នឹងធ្វើជាម្ចាស់ផ្ទះនៃកិច្ចប្រជុំថ្នាក់រដ្ឋមន្ត្រីទេសចរណ៍ក្នុងខែនេះ

ជាតិ

សេដ្ឋកិច្ច

កម្ពុជា នឹងធ្វើជាម្ចាស់ផ្ទះនៃកិច្ចប្រជុំថ្នាក់រដ្ឋមន្ត្រីទេសចរណ៍ក្នុងខែនេះ

09, Jun 2017 , 8:19 am

រូបភាព

ដោយ:

ភ្នំពេញ៖ កម្ពុជា នឹងរៀបចំកិច្ចប្រជុំរដ្ឋមន្ត្រីទេសចរណ៍ នៃដៃគូសន្ទនាសហប្រតិបត្តិការអាស៊ីលើកទី២ និងសន្និសីទអន្តរជាតិលើកទី១ ស្ដីពីទេសចរណ៍ប្រកបដោយនិរន្តរភាព និងទីក្រុងបេតិកភណ្ឌ។ កិច្ចប្រជុំទាំងនេះ នឹងប្រព្រឹត្តទៅ ចាប់ពីថ្ងៃទី១១ ដល់ថ្ងៃទី ១៦ខែមិថុនា នៅទឹកដីអង្គរ ខេត្តសៀមរាប ។

សេចក្ដីជូនដំណឹងរបស់ក្រសួងទេសចរណ៍ ចេញផ្សាយនៅថ្ងៃទី៦ខែមិថុនា បានឲ្យដឹងថា កម្ពុជា នឹងធ្វើជាម្ចាស់ផ្ទះរៀបចំកិច្ចប្រជុំរដ្ឋមន្ត្រីទេសចរណ៍ នៃដៃគូសន្ទនាសហប្រតិបត្តិការអាស៊ីលើកទី២ និងសន្និសីទអន្តរជាតិលើកទី១ ស្ដីពីទេសចរណ៍ប្រកបដោយនិរន្តរភាព និងទីក្រុងបេតិកភណ្ឌ។

ព្រឹត្តិការណ៍នេះនឹងរៀបចំនៅខេត្តសៀមរាប ចាប់ពីថ្ងៃទី១១ ដល់ថ្ងៃទី ១៦ខែមិថុនា នៅទឹកដីអង្គរ ដោយមានរដ្ឋមន្ត្រីទេសចរណ៍ និងប្រតិភូជាន់ខ្ពស់មកពី ២១ ប្រទេសចូលរួម។
សេចក្តីជូនដំណឹងដដែល ក៏បានបញ្ជាក់ដែរថា នៅថ្ងៃទី១២ខែមិថុនា សម្ដេចនាយករដ្ឋមន្ត្រី ហ៊ុន សែន នឹងធ្វើជាអធិបតី បើកកិច្ចប្រជុំរដ្ឋមន្ត្រីទេសចរណ៍ នៃដៃគូសន្ទនាសហប្រតិបត្តិការអាស៊ីលើកទី២នេះ។

រដ្ឋមន្ត្រីក្រសួងទេសចរណ៍ លោក ថោង ខុន បានថ្លែងនៅក្នុងកិច្ចប្រជុំគណៈកម្មាធិការអន្តរក្រសួង ដែលទទួលរៀបចំវេទិការអន្តរជាតិនេះ កាលពីថ្ងៃទី៦មិថុនាថា វេទិកានេះ នឹងដាក់ចេញវិធាន និងទិសដៅថ្មីៗ សម្រាប់ធ្វើពិពិធកម្មផលិតផលទេសចរណ៍ និងការតម្រង់ទិសសម្រាប់អភិវឌ្ឍន៍ទេសចរណ៍បេតិភណ្ឌវប្បធម៌ ប្រកបដោយនិរន្តរភាពនៅកម្ពុជា ដោយផ្សារភ្ជាប់ទៅនឹងទស្សនទាន នៃការកសាងភាពជាដៃគូសហប្រតិបត្តិការថ្មីនៃទេសចរណ៍ និង វប្បធម៌ ដែលបានដាក់ចេញនៅក្នុងសេចក្កីថ្លែងការរួមសៀមរាប នៅក្នុងសន្និសីទពិភពលោកស្ដីពីទេសចរណ៍ និងវប្បធម៌ កាលពីខែកញ្ញាឆ្នាំ២០១៥ ៕