អន្តរជាតិ
លី សៀនឡុង ថាលោកគ្មានមហិច្ឆតារៀបចំឲ្យកូនឡើងកាន់តំណែងជំនួសដូចប្អូនៗលោកចោទឡើយ
× ប្អូនៗរបស់នាយករដ្ឋមន្ត្រីសិង្ហបុរីលោក លី សៀនឡុង (Lee Hsein Loong) បានបញ្ចេញសេចក្តីថ្លែងការណ៍មួយ ចោទថា លោក លី សៀនឡុង មិនគោរពបណ្តាំឪពុក និងមានមហិច្ឆតារៀបចំផ្លូវសម្រាប់ឲ្យកូនខ្លួនបន្តកាន់កាប់តំណែងកំពូលនេះ។ ក្រោយមានការចោទប្រកាន់ពីសំណាក់បងប្អូនបង្កើតខ្លួននេះ លោក លី សៀនឡុង បានចេញមុខបដិសេធ ការចោទប្រកាន់ថាលោកមហិច្ឆតារៀបចំឲ្យកូនប្រុសរបស់លោកឡើងកាន់តំណែងនយោបាយ។ ក្នុងនាមជាមេដឹកនាំម្នាក់ លោក លី សៀនឡុង ប្តេជ្ញារក្សាតម្លៃជាមូលដ្ឋាននៃសង្គមសិង្ហបុរី ដែលជាការផ្តល់តម្លៃដល់អ្នកចេះដឹង និងមានសមត្ថភាពខ្ពស់កាន់កាប់ការងារធំៗក្នុងជួររដ្ឋាភិបាលនោះ។
រឿងរ៉ាវផ្ទៃក្នុងនៃគ្រួសារត្រកូលលី ត្រូវបានបងប្អូនបង្កើតរបស់នាយករដ្ឋមន្ត្រី លី សៀនឡុង មានដូចជា លោកស្រី Lee Wei Ling និង លោក Lee Hsien Yang ទម្លាយចេញជាសាធារណៈតាមរយៈ សេចក្តីថ្លែងការណ៍មួយដែលមានចំណងជើងថា «តើមានអ្វីកើតឡើងចំពោះតម្លៃរបស់លោក លី ក្វាន់យូ?» ដែលមានកម្រាស់ ៦ទំព័រ នៅម៉ោង ២ រំលងអាធ្រាត ថ្ងៃពុធ។
យោងតាមសារព័ត៌មានសិង្ហបុរី The Straits Times លោកស្រី Lee Wei Ling និង លោក Lee Hsien Yang បានបញ្ជាក់ក្នុងសេចក្តីថ្លែងការណ៍ថា អ្នកទាំងពីរនាក់បាត់បង់ជំនឿចិត្តលើបងប្រុសរបស់ខ្លូនលោកនាយករដ្ឋមន្ត្រី លី សៀនឡុង ហើយ។
អ្នកទាំងពីរក៏បានសង្កត់ធ្ងន់ផងដែរថា ពួកគេបានតាមដានយ៉ាងយកចិត្តទុកដាក់និងបារម្ភខ្លាំងថា វានឹងអាចមានការប្រើប្រាស់ស្ថាប័នរដ្ឋដើម្បីប្រឆាំងខ្លួន រួមទាំងភរិយារបស់លោក Lee Hsien Yang លោកស្រី Suet Fern ថែមទៀតផង។
១. លោក លី សៀនឡុង មិនគោរពបណ្តាំលោក លីក្វាន់យូរ?
តាមពិតទៅ ជម្លោះក្នុងក្រុមគ្រួសារកើតឡើងក្រោយការស្លាប់របស់ស្ថាបនិកសិង្ហបុរីលោក លី
ក្វាន់យូរ។ ប្អូនទាំងពីររបស់លោក លី សៀនឡុង បានអះអាងថា បន្ទាប់ពីការស្លាប់របស់ស្ថាបនិកសិង្ហបុរីលោក លី ក្វាន់យូ វាមានការផ្លាស់ប្តូរច្រើននៅសិង្ហបុរី ដែលវាមិនឆ្លុះបញ្ចាំងពីអ្វីដែលលោក លី ក្វាន់យូ ចង់បានឡើយ។
រឿងចម្រូងចម្រាសទីមួយគឺ បណ្តាំរបស់លោក លី ក្វាន់យូ ឲ្យកម្ទេចផ្ទះលោកចោលពេលលោកស្លាប់។ ប្អូនលោក លី សៀនឡុង ទាំងពីរសុទ្ធតែជាសមាជិកនៃក្រុមប្រឹក្សាអាណាព្យាបាលដែលមើលថែទាំទ្រព្យសម្បត្តិឪពុករបស់ខ្លួន ហើយពួកគេបានអះអាងក្នុងសេចក្តីថ្លែងការណ៍ខាងលើថា លោក លី សៀនឡុង និងភរិយាលោកស្រី Ho Ching ជំទាស់បណ្តាំឪពុក ហើយរក្សាផ្ទះទុក។ គេចោទប្រកាន់ថាការរក្សាផ្ទះរបស់លោកឪពុកទុកនេះប្រៀបបីដូចជាការទទួលមរកតកមួយដែលជួយបង្កើនអំណាចនយោបាយរបស់លោកនិងក្រុមគ្រួសារផងដែរ។
តាមពិតទៅ ក្នុងបទសម្ភាសមួយដែលគេប្រើប្រាសក្នុងសៀវភៅមួយក្បាលចំណងជើងថា« Hard Truths to Keep Singapore Going» មួយកាលពីឆ្នាំ ២០១១ លោក លី ក្វាន់យូ បានបញ្ជាក់ច្បាស់ថាបំណងរបស់លោកគឺ បំផ្លាញផ្ទះមួយខ្នងរបស់លោកចោលមែន ពេលលោកស្លាប់។ លោកបានប្រាប់គណៈរដ្ឋមន្ត្រីសិង្ហបុរីថា ពេលលោកស្លាប់ ត្រូវវាយកម្ទេចផ្ទះនោះចោលផង។ អ្វីដែលគួរឲ្យកត់សម្គាល់ថា លោកបានរៀបរាប់ពីហេតុផលមួយចំនួនដែរដែលជំរុញឲ្យលោកចង់កម្ទេចផ្ទះនោះចោលដែរ ក្នុងនោះមានការចំណាយច្រើនសម្រាប់ការជួសជុលថែទាំងផ្ទះចាស់ដែលមានអាយុកាលប្រហែលជាង១០០ឆ្នាំទៅហើយនោះ។ ប៉ុន្តែ លោកមិនបានការលើកឡើងពីហេតុផលផ្សេងទៀតឡើយ។
យ៉ាងណាមិញ ស្ថាបនិកសិង្ហបុរីរូបនេះបានបន្ថែមថា បើសិនជាកូនៗលោកមិនអាចធ្វើតាមអ្វីដែលលោកចង់ទេ គេត្រូវរក្សាផ្ទះចាស់នេះទុកមិនឲ្យអ្នកណាផ្សេងទៅរស់នៅឡើយ លើកលែងតែកូនលោកឬសាច់ញាតិតត្រឡប់ទៅនៅវិញ។
ត្រឡប់មកវិញ ប្អូនលោក លី សៀនឡុងទាំងពីរនាក់ចោទបន្ថែមថា លោក លី សៀនឡុង និងភរិយារបស់ខ្លួនមានមហិច្ឆតានយោបាយថែមទៀតសម្រាប់កូនប្រុសរបស់ខ្លួនដែរ។
២. លី សៀនឡុង ថាលោកមិនមានមហិច្ឆតារៀបចំឲ្យកូនឡើងធំដូចការចោទប្រកាន់ឡើយ
ក្រោយការបញ្ចេញសេចក្តីថ្លែងការណ៍នេះ លោក លី សៀនឡុង បានចេញមុខបកស្រាយភ្លាមៗដែរទោះបីជាលោកកំពុងស្ថិតនៅក្នុងពេលវិសមកាលក៏ដោត។ លោកខកចិត្តនិង សោកស្តាយបំផុតដែលប្អូនៗរបស់លោកនាំគ្នាយកបញ្ហាផ្ទៃក្នុងគ្រួសារមកលេងសើចដោយទម្លាយចេញជាសាធារណៈដូច្នេះ។
ចាប់តាំងពីឪពុកស្លាប់ក្នុងខែមីនាឆ្នាំ២០១៥ ក្នុងនាមជារៀមច្បងគ្រួសារ លោក លី សៀនឡុង បានប្រឹងប្រែងយ៉ាងខ្លាំងក្នុងដោះស្រាយបញ្ហាផ្ទៃក្នុងគ្រួសារនិងបង្រួមបង្រួមគ្រួសារត្រកូល លី ផង។ ប៉ុន្តែលោកលី សៀនឡុង សោកស្តាយខ្លាំងនៅពេលប្អូនៗធ្វើឲ្យប៉ះពាល់ខ្លាំងដល់កិត្តិយសគ្រួសារនិងមរតកក្រុមគ្រួសារទាំងមូលផង។
ហើយលោកក៏បានបញ្ជាក់ឲ្យអស់ចម្ងល់ផងដែរថា លោកគ្មានមហិច្ឆតាឯណាចង់ឲ្យកូនប្រុសលោកស្នងតំណែងឡើយ។លោកបានលើកឡើងដូច្នេះ៖« ខ្ញុំពិតជាសោកស្តាយខ្លាំងណាស់ចំពោះការចោទប្រកាន់មិនសម្យហេតុផលរបស់ពួកគេមកលើខ្ញុំ។ ភរិយាខ្ញុំ និងខ្លួនខ្ញុំផ្ទាល់ក៏សុំបដិសេធចោលរាល់ការចោទប្រកាន់ទាំងនេះ ជាពិសេសការអះអាងឆ្កួតឡប់ដែលថា ខ្ញុំមានមហិច្ឆតានយោបាយវែកផ្លូវឲ្យកូនប្រុសខ្ញុំឡើងធ្វើធំនោះតែម្តង»។
ក្នុងនាមជានាយករដ្ឋមន្ត្រីសិង្ហបុរី លោក លី សៀនឡុង ក៏បានប្តេជ្ញាបន្តធ្វើរឿងត្រឹមត្រូវនិងបម្រើប្រជាជនសិង្ហបុរីឲ្យបានល្អតាមដែលអាចធ្វើបានជាពិសេសរក្សាតម្លៃជាមូលដ្ឋាននៃសង្គមសិង្ហបុរីដោយផ្តល់តម្លៃអ្នកចេះដឹងនិងមានសមត្ថភាព។
លោក លី សៀនឡុង បានបញ្ជាក់ដូច្នេះ«ខ្ញុំនឹងបន្តធ្វើតាមអ្វីដែលឪពុកម្តាយខ្ញុំចង់បាន។ ស្របពេលជាមួយគ្នានោះ ខ្ញុំនឹងបន្តបម្រើប្រជាជនសិង្ហបុរីដោយស្មោះត្រង់ និ ងឲ្យបានល្អបំផុតតាមដែលខ្ញុំអាចធ្វើបាន។ ជាពិសេស យើងបន្តអនុវត្តតម្លៃស្នូលនៃសង្គមដែលជ្រើសរើសអ្នកចេះដឹងនិងមានសមត្ថភាពឲ្យបំពេញការងារក្នុងក្បាលម៉ាស៊ីនដឹកនាំប្រទេសផង»៕
Tag:
លី សៀនឡុង
លី ក្វាន់យូរ
Lee Wei Ling
Lee Hsien Yang
© រក្សាសិទ្ធិដោយ thmeythmey.com