អាជ្ញាធរនឹងសង់ស្ពានដែកមួយខ្សែ ដើម្បីសម្រួលចរាចរណ៍ អំឡុងពេលស្ពានជ្រោយចង្វារចាស់ដាក់ឲ្យជួសជុល

ជាតិ

អាជ្ញាធរនឹងសង់ស្ពានដែកមួយខ្សែ ដើម្បីសម្រួលចរាចរណ៍ អំឡុងពេលស្ពានជ្រោយចង្វារចាស់ដាក់ឲ្យជួសជុល

19, Jun 2017 , 9:19 pm

រូបភាព

ដោយ:

ភ្នំពេញ៖ អាជ្ញាធររាជធានីភ្នំពេញនឹងចាប់ផ្ដើមសាងសង់ស្ពានដែកឆ្លងកាត់ទន្លេសាបមួយខ្សែ នៅក្នុងខែកក្កដាខាងមុខនេះ ដើម្បីសម្រួលចរាចរណ៍បណ្ដោះអាសន្ន ក្នុងអំឡុងពេលដែលស្ពានមិត្តភាពកម្ពុជា-ជប៉ុន (ស្ពានជ្រោយចង្វារចាស់) នឹងត្រូវដាក់ឲ្យជួសជុល។ នេះបើតាមអ្នកនាំពាក្យសាលារាជធានីភ្នំពេញ លោក ម៉េត មាសភក្ដី ។

លោក ម៉េត មាសភក្ដី បានថ្លែងប្រាប់សារព័ត៌មានថ្មីៗថា សាលារាជធានីភ្នំពេញបានជ្រើសរើសក្រុមហ៊ុនជប៉ុនលើគម្រោងស្ថាបនាស្ពានដែកនេះ ដោយនឹងត្រូវប្រើរយៈពេលប្រមាណ ៦ខែ ដើម្បីបញ្ចប់ការសាងសង់។ ប៉ុន្តែ លោកមិនអាចបញ្ជាក់ពីទំហំថវិកាសម្រាប់គម្រោងមួយនេះបាននោះទេ។

អ្នកនាំពាក្យសាលារាជធានីភ្នំពេញរូបនេះ បញ្ជាក់ថា ស្ពានដែកនេះនឹងត្រូវសាងសង់ពីចំណុចក្បែរឃ្លាំងស្តុកប្រេងឥន្ធនៈសូគីម៉ិច ផ្លូវជាតិលេខ៥ តភ្ជាប់ទៅផ្លូវជាតិលេខ៦ ។ ទីតាំងនេះមានចម្ងាយប្រហែល ២,៥ គីឡូម៉ែត្រខាងជើងស្ពានជ្រោយចង្វារ។

ចំពោះការបិទស្ពានជ្រោយចង្វារចាស់ដើម្បីដាក់ឲ្យជួសជុល អាជ្ញាធរមិនទាន់ជូនដំណឹងនៅឡើយ។ អ្នកនាំពាក្យក្រសួងសាធារណការ និងដឹកជញ្ជូន លោក វ៉ា ស៊ឹមសុរិយ៉ា ឲ្យដឹងថា ភាគីជប៉ុន ដែលជាអ្នកផ្ដល់ជំនួយលើគម្រោងនេះ កំពុងជ្រើសរើសក្រុមហ៊ុនម៉ៅកាសាងសង់តាមរយៈការដេញថ្លៃ។ លោកប្រាប់ថាប្រហែលពីរបីខែខាងមុខនេះ ការដេញថ្លៃនឹងត្រូវបញ្ចប់ ហើយក្រសួងនឹងជូនដំណឹងពីពេលវេលាជាក់លាក់នៃការបិទចរាចរណ៍លើស្ពានជ្រោយចង្វារចាស់។

តាមគម្រោង ការជួសជុលកែលម្អស្ពានជ្រោយចង្វារចាស់ នឹងត្រូវចំណាយថវិកាប្រមាណ ៣០លានដុល្លារអាមេរិក ដែលនឹងបញ្ចប់ក្នុងរយៈពេល ២២ខែ។ ទីភ្នាក់ងារសហប្រតិបត្តិការអន្តរជាតិជប៉ុន (JICA) ទទួលអនុវត្តគម្រោងនេះ៕