អន្តរជាតិ
លោក ប្រាយុទ្ធ ប្រាប់អ្នកប្រឆាំងដែលភៀសខ្លួនថា «បើខ្លាំងចូលស្រុក កុំស្រែកពីបរទេស»
× នាយករដ្ឋមន្ត្រីថៃ ប្រាយុទ្ធ ចន្ទអូចា (Prayuth Chan-o-cha) នៅថ្ងៃទី២១ ខែមិថុនា បានបង្ហាញការខឹងសម្បារយ៉ាងខ្លាំងនឹងក្រុមអ្នកប្រឆាំងរដ្ឋាភិបាលយោធានៅបរទេស ដែលតែងរិះគន់ការដឹកនាំរបស់លោកនាពេលកន្លងមក។ លោកឧត្តមសេនីយ៍ ប្រាយុទ្ធ បានប្រាប់ឲ្យក្រុមអ្នករិះគន់ទាំងនោះ បើក្លាហានត្រូវត្រឡប់ចូលប្រទេសវិញ ដើម្បីទទួលទោសតាមច្បាប់របស់ថៃ ហើយត្រូវឈប់និយាយរិះគន់រដ្ឋាភិបាលរបស់លោកពីបរទេសនោះឡើយ។
ខណៈដែលកំពុងផ្ដល់សុន្ទកថានៅសាកលវិទ្យាល័យក្នុខេត្ត Khon Kaen មេដឹកនាំរបបសឹកថៃ លោក ប្រាយុទ្ធ ចន្ទអូចា ក៏ឆ្លៀតនិយាយរិះគន់ក្រុមប្រឆាំងការដឹកនាំរបស់លោក ដែលកំពុងគេចខ្លួនរស់នៅឯបរទេស។ លោក ប្រាយុទ្ធ ដែលកាន់អំណាចបានជាងបីឆ្នាំមកហើយនោះ មិនពេញចិត្តឡើយពាក្យរិះគន់របស់ក្រុមប្រឆាំាំង ហើយលោកក៏បានប្រាប់ឲ្យពួកគេវិលចូលស្រុកវិញ ដើម្បីទទួលខុសត្រូវតាមផ្លូវច្បាប់ ព្រោះពួកគេរងការចោទប្រកាន់ច្រើន។
បើតាមកាសែតបាងកកប៉ុស្តិ៍ មេដឹកនាំរដ្ឋាភិបាលយោធាថៃរូបនេះ មិនបានបញ្ចេញឈ្មោះពួកអ្នករិះគន់ការដឹកនាំរបស់លោកឡើយ តែលោកបានប្រាប់ឲ្យពួកគេបញ្ឈប់ការរិះគន់ពីបរទេសទៀតទៅ។ ជាមួយនឹងការប្រាប់ឲ្យចូលស្រុកដើម្បីអនុវត្តទោស លោក ប្រាយុទ្ធ និយាយដែរថា ពាក្យសម្ដីរិះគន់របស់ពួកគេ មិនអាចឲ្យលោកអត់ទ្រាំនៅស្ងៀមបានឡើយ ហើយលោកត្រូវតែនិយាយឆ្លើយទៅកាន់ពួកគេវិញ។
តាមពិតទៅ នៅក្រោមការគ្រប់គ្រងរបស់ខ្លួន របបយោធាដែលដណ្ដើមអំណាចកាលពីឆ្នាំ២០១៤ បានអនុវត្តទោសយ៉ាងតឹងរ៉ឺងលើអ្នកនិយាយរិះគន់ការដឹកនាំរបស់ខ្លួន ហើយជាពិសេសនោះ គឺការអនុវត្តច្បាប់ស្ដីពីការប្រមាដចេស្ដាមហាក្សត្រតែម្ដង។ ជនជាតិថៃជាច្រើនត្រូវបានចោទថាបំពានបញ្ញត្តិនេះដែលមានចែងក្នុងមាត្រា១១២ នៃក្រមព្រហ្មទណ្ឌថៃ ហើយជនសង្ស័យប្រឈមមុខការជាប់ពន្ធនាគារដល់ទៅ១៥ឆ្នាំក្នុងមួយករណី។
អ្នកដែលរកការចោទប្រកាន់ថាបានបំពានមហាក្សត្រជាច្រើននាក់រាប់តាំងពីអ្នកប្រាជ្ញា អ្នកប្រវត្តិសាស្ត្រ និងអ្នកកាសែតបរទេសផងនោះ បានភៀសខ្លួនទៅក្រៅប្រទេស ដើម្បីគេចពីការចាប់ខ្លួនទៅអនុវត្តទោស ហើយខ្លះទៀតបានស្វែងរកសិទ្ធិជ្រកកោននយោបាយនៅឯបរទេសតែម្ដង។ ជាមួយគ្នារបបយោធាថៃក៏ហាមប្រជាជនពីការផ្លាស់ប្ដូរព័ត៌មានជាមួយពួកគេតាមប្រព័ន្ធអនឡាញផង ព្រោះពួកគេបានបំពានមាត្រា១១២ ។
អស់ពេលបីឆ្នាំមកនេះ របបសឹកថៃ រងការពាក្យរិះគន់មិនតិចឡើយ ដោយសារការរឹតត្បិតសិទ្ធិសេរីភាពប្រជាជន។ ពលរដ្ឋថៃជាច្រើន រួមទាំងអ្នកនយោបាយខ្លះផងនោះ ក៏បានរិះគន់លោក ប្រាយុទ្ធ ថាចង់ក្រាញអំណាចដឹកនាំប្រទេសយូរអង្វែងទៀត និងមិនព្រមប្រគល់អំណាចទៅឲ្យរដ្ឋាភិបាលស៊ីវិលឡើយ។ នេះ ក៏ព្រោះតែផែនការបោះឆ្នោតនៅឆ្នាំក្រោយ នៅតែស្រពិចស្រពិលនៅឡើយ បើទោះជារដ្ឋធម្មនុញ្ញថ្មីចូលជាធរមានក៏ដោយ៕
Tag:
ថៃ
ប្រាយុទ្ធ ចន្ទអូចា
© រក្សាសិទ្ធិដោយ thmeythmey.com