អន្តរជាតិ
អតីតនាយករដ្ឋមន្ត្រីថៃ យីងឡាក់ សម្រក់ទឹកភ្នែកក្នុងថ្ងៃកំណើតដើម្បីសុំយុត្តិធម៌ពីតុលាការ អតីតនាយករដ្ឋមន្រ្តីថៃ យីងឡាក់ ស៊ីណាវ៉ាត់ សម្រក់ទឹកភ្នែកពេលជួបអ្នកគាំទ្រក្នុងថ្ងៃខួបកំណើត (រូបភាព The Nation)
× អតីតនាយករដ្ឋមន្ត្រីថៃ យីងឡាក់ ស៊ីណាវ៉ាត់ ឈានដល់វ័យ៥០ឆ្នាំកាលពីថ្ងៃទី២១ ខែមិថុនា។ ប៉ុន្តែលោកស្រី យីងឡាក់ កំពុងរុំព័ទ្ធដោយក្ដីក្ដាំនៅឯតុលាការជុំវិញកម្មវិធីទិញស្រូវរបស់រដ្ឋាភិបាលលោកស្រីដែលធ្វើឲ្យខាតបង់លុយរាប់លានដុល្លារ។ ចំថ្ងៃខួបកំណើតរបស់ខ្លួន អតីតនាយករដ្ឋមន្ត្រីដែលត្រូវយោធាធ្វើរដ្ឋប្រហារទម្លាក់រូបនេះ បានអះអាងថាលោកស្រីមិនមានកំហុសអ្វីឡើយក្នុងករណីនេះ និងសុំឲ្យតុលាការផ្ដល់យុត្តិធម៌ផង។
អតីតនាយករដ្ឋមន្ត្រីថៃ លោកស្រី យីងឡាក់ ស៊ីណាវ៉ាត់ បានសម្រក់ទឹកភ្នែកក្នុងថ្ងៃកំណើតអាយុ៥០ឆ្នាំរបស់ខ្លួន ខណៈលោកស្រីកំពុងរងពាក្យបណ្ដឹងធ្វើឲ្យខាតបង់លុយរដ្ឋរាប់លានដុល្លារក្នុងគម្រោងទិញស្រូវ ពេលធ្វើជានាយករដ្ឋមន្ត្រី។ លោកស្រី យីងឡាក់ បានឆ្លៀតឱកាសនេះដើម្បីសុំយុត្តិធម៌ និងការអាណិតអាសូរពីសំណាក់តុលាការ ព្រោះលោកស្រីជាមនុស្សគ្មានកំហុសអ្វីឡើយ ហើយលោកស្រីក៏មិនរត់ចោលស្រុកដែរ។
សារព័ត៌មាន The Nation ផ្សាយថា លោកស្រី យីងឡាក់ ដែលអមដំណើរដោយមន្ត្រីជាន់ខ្ពស់បក្សភឿថៃ បានទៅកាន់វត្តមួយក្នុងទីក្រុងបាងកក នៅថ្ងៃទី២១ ខែមិថុនា ដើម្បីធ្វើពិធីសាសនាក្នុងថ្ងៃខួបកំណើតទី៥០ឆ្នាំរបស់លោកស្រី។ អតីតនាយករដ្ឋមន្ត្រីរូបនេះ ក៏បានស្រក់ទឹកភ្នែកចំពោះមុខមនុស្សម្នាជាច្រើន ព្រោះជីវិតរបស់លោកស្រីពិតជាពិបាកណាស់ក្នុងឆ្នាំនេះ។ បើទោះជានេះមិនមែនជាលើកទីមួយក្ដី លោកស្រីនិយាយថា លោកស្រីមិនអាចទប់អារម្មណ៍ដ៏លំបាកនេះបានឡើយ។
នៅពេលនេះ លោកស្រី យីងឡាក់ ជាប្អូនស្រីបង្កើតអតីតនាយករដ្ឋមន្ត្រី ថាក់ស៊ីន ស៊ីណាវ៉ាត់ កំពុងតស៊ូក្ដីក្ដាំនៅតុលាការកំពូលក្រោមបទចោទធ្វេសប្រហែសក្នុងការងារដែលបណ្ដាលឲ្យរដ្ឋខាតបង់ទឹកប្រាក់ក្រោមកម្មវិធីទិញអង្ករពីកសិករក្នុងតម្លៃថោក។ ពេលជានាយករដ្ឋមន្ត្រីនៅឡើយ លោកស្រី ជាប្រធានគណៈកម្មាធិការគោលនយោបាយស្រូវអង្ករទៀតផង។ ក្រុមអ្នកប្រឆាំងបានរិះគន់កម្មវិធីទិញអង្ករថាជាការទាក់ទាញការគាំទ្រពីប្រជាជនប៉ុណ្ណោះ។
ក្នុងករណីរកឃើញកំហុសមែននោះ លោកស្រី យីងឡាក់ អាចមានទោសជាប់ពន្ធនាគារដល់ទៅ១០ឆ្នាំ និងត្រូវហាមឃាត់ធ្វើនយោបាយទៀតផង។ លើសពីនោះ លោកស្រីអាចត្រូវបង់ប្រាក់សំណង ដល់ទៅ៣៥ពាន់លានបាត (៩៩៦.៨៧លានដុល្លារ) ដែលស្មើនឹងជាង២០ភាគរយនៃទឹកប្រាក់ខាតសរុប១៧៨ពាន់លានដុល្លារ។ ទឹកប្រាក់ខាតបង់ដ៏ច្រើន ត្រូវបានប៉ាន់ស្មានដោយគណៈកម្មាធិការមួយបង្កើតដោយរបបយោធា។
សវនាការចុងក្រោយសម្រាប់ចុងចោទ នឹងធ្វើឡើងនៅថ្ងៃទី២១ ខែកក្កដាខាងមុខ ហើយភាគីទាំងសងខាងក្នុងករណីនេះ មានពេល៣០ថ្ងៃមុននឹងផ្ដល់សក្ខីកម្មចុងក្រោយរបស់ពួកគេ។ បន្ទាប់ពីនោះ តុលាការមានពេល ១៤ថ្ងៃដើម្បីសម្រេចចិត្ត និងចេញសាលក្រមតែម្ដង។ យ៉ាងណានោះ លោកស្រី យីងឡាក់ ប្រកាសហើយថាលោកស្រីនឹងរឹងមាំ ហើយជម្នះរាល់ឧបសគ្គទាំងអស់។ លោកស្រីក៏ជឿថាលោកស្រីគ្មានកំហុសអ្វីទេ ហើយតុលាការនឹងផ្ដល់យុត្តិធម៌ឲ្យលោកស្រី៕
Tag:
ថៃ
យីងឡាក់ ស៊ីណាវ៉ាត់)
© រក្សាសិទ្ធិដោយ thmeythmey.com